काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले भारतीय प्रधानमन्त्री नरेन्द्र माेदीसँगको भेटवार्ता फलदायी रहेको बताएका छन्।

प्रधानमन्त्री मोदीसँग करिब एक घण्टा लामो भेटवार्तापछि सामाजिक सञ्जालमार्फत प्रतिक्रिया दिँदै लामिछानेले नेपाल र भारतले विगतका सीमितताभन्दा माथि उठेर विकास कूटनीतिको नयाँ युगतर्फ अघि बढ्नुपर्ने धारणा व्यक्त गरेका हुन्।

उनले प्रधानमन्त्री मोदीको नेपाल–भारत सम्बन्धबारेको दृष्टिकोणप्रति सहमति जनाउँदै साझा सभ्यतागत सम्बन्ध, डिजिटल करिडोर तथा सहज आवागमन र कनेक्टिभिटीलाई प्राथमिकतामा राखेर दुवै देशबीचको सहकार्यलाई थप मजबुत बनाउन सकिने उल्लेख गरेका छन्।

लामिछानेले नेपाल र भारतबीचको साझेदारी पारस्परिक विश्वास, प्रगति र साझा समृद्धिमा आधारित हुनुपर्नेमा जोड दिँदै रास्वपा दुवै देशका नागरिकको हितका लागि यस्ता सम्भावनालाई व्यवहारमा रूपान्तरण गर्न प्रतिबद्ध रहेको बताएका छन्।

उनले नेपाल र भारतबीचको सहकार्यलाई नयाँ उचाइमा पुर्‍याउन विकास, प्रविधि र जनस्तरको सम्बन्धलाई थप सुदृढ बनाउनुपर्ने आवश्यकता औँल्याएका छन्।

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने नेतृत्वको प्रतिनिधिमण्डलले आज भारत भ्रमणका क्रममा भारतका गृहमन्त्री अमित शाहसँग भेट गर्ने कार्यक्रम रहेको छ।

उक्त भेटमा नेपाल–भारत सम्बन्धका विविध पक्ष, आपसी हितका विषय, लोकतान्त्रिक अभ्यास, सुरक्षा सहकार्य तथा दुई देशका राजनीतिक दलहरूबीचको संवाद र सहकार्यलाई थप सुदृढ बनाउने विषयमा छलफल हुने अपेक्षा गरिएको छ।

भेटवार्तालाई नेपाल–भारत सम्बन्धलाई थप सुदृढ बनाउने अवसरका रूपमा हेरिएको छ।

काठमाडाैँ । राष्ट्रिय स्वतन्त्र पार्टी (रास्वपा) का सभापति रवि लामिछानेले विधि र कानुन बनाउँदा जनताको हित र भावनालाई केन्द्रमा राख्नुपर्नेमा जोड दिनुभएको छ । पार्टीको प्रशिक्षण विभागले सांसदहरूका लागि आयोजना गरेको प्रशिक्षणको समापन समारोहमा आज उहाँले सामाजिक प्रतिष्ठालाई सफलताको मानक बनाउनेभन्दा कानुन बनाउने जिम्मेवारी लाग्न निर्देशनसमेत दिनुभयो ।

सभापति लामिछानेले देशमा रहेका समस्या समाधानका लागि अध्यादेश ल्याइएको र पार्टी नेतृत्वको सरकार जनताको हितभन्दा बाहिर नजाने प्रष्ट पार्नुभयो । “सरकारले सोचेर कदम चालिरहेको छ, आजसम्म सरकारले गरेका निर्णयबाट दुःख मनाउन गर्नुपर्ने अवस्था छैन”, उहाँले भन्नुभयो,“कतिपय कानुन निर्माणलाई ‘फास्ट ट्र्याक’मा लिएर जान अध्यादेश ल्याइएको हो । नीतिगत कमजोरी सुधार र विकासका काममा गति दिन अध्यादेश ल्याइएकाले देश र नागरिकलाई अप्ठ्यारो पर्ने कुनै निर्णय गरेका छैनौँ । हामी जनताको माया र देशको भविष्यप्रति चिन्तित छौँ ।”

सभापति लामिछानेले नेपाली जनताले परिवर्तनका लागि रास्वपालाई जनमत दिएको भन्दै चुनाव जित्दैमा सर्वगुण सम्पन्न छौँ भनेर नसोच्न सांसदहरूलाई आग्रह गर्नुभयो । उहाँले विगतमा अन्य राजनीतिक दलले अनवरत सङ्घर्ष गरेर परिवर्तन ल्याएको उल्लेख गर्दै अब जनताको अवस्था बदल्ने जिम्मेवारी आफूहरूको काँधमा आएकाले सोहीअनुसार काम गर्नुपर्नेमा जोड दिनुभयो । “विगतमा दलहरूले अनवरत सङ्घर्ष गरेर एकतन्त्रीय शासन ढालेका हुन्, जीवन जोखिममा राखेर परिवर्तनको यात्रामा होमिएका पार्टीहरूसँग केही असहमति भए पनि हामीले उहाँहरू जस्तो धेरै सङ्घर्ष गर्नुपरेको छैन”, उहाँले भन्नुभयो,“हिजो व्यवस्था बदलियो तर अवस्था नबदलिएकाले जनताले हामीलाई पत्याएका हुन् ।

विभिन्न राजनीतिक दलमा आस्थावानहरूले आफ्नो दल छोडेर हामीलाई मत दिएका छन्, त्यसैले कसैको मानमर्दन गर्नुहुँदैन ।” सभापति लामिछानेले आमनागरिक, समाज र देशले हामीलाई हेरिरहेको भन्दै देश बनाउने काममा रचनात्मक भूमिका खेल्न सांसदहरूलाई निर्देशन दिनुभयो । “हामी जीवनी लेख्ने यात्रामा हैन, इतिहास लेख्न हिँडेका हौँ । त्यसैले पार्टीमा योगदानको मूल्य माग्ने बेला भएको छैन । अब सबै मिलेर अवस्था बदल्ने क्रान्तिमा लागौँ”, उहाँले भन्नुभयो । सभापति लामिछानेले सबै सुकुमवासी र भूमिहीनलाई सरकारले अधिकार दिने बताउनुभयो ।

“हामीले चुनावमा गरेका वाचाअनुसार काम गर्छौं । सुकुमवासी समस्यालाई उच्चस्तरीय आयोग बनाएर स्थायी समाधान गर्छौं ।संविधानको मर्मअनुसार सबैका अधिकार सुनिश्चित गर्न हामी प्रतिबद्ध छौँ”, उहाँले भन्नुभयो । सभापति लामिछानेले संवैधानिक व्यवस्थाअनुसार प्रधानन्यायाधीशको सिफारिस भएको बताउनुभयो । उहाँले सरकार बजेट बनाउन व्यस्त रहेको र त्यसलाई उत्कृष्ट बनाउने गरी अर्थमन्त्रीसँग छलफल भएको जानकारी दिनुभयो ।

उहाँले सिङ्गै देश हाम्रो निर्वाचन क्षेत्र हो भन्ने ठानेर राज्यको सामथ्र्य बढाउने गरी काम गरिने धारणा राख्नुभयो । सभापति लामिछानेले सरकारले आमजनमानसमा सकारात्मक सन्देश दिने गरी काम गरिरहेको र सरकारको भूमिकालाई थप प्रभावकारी बनाउने गरी खबरदारी सधैँ अपेक्षित रहेको बताउनुभयो ।

काठमाडौं । राष्ट्रिय स्वतन्त्र पार्टीको प्रशिक्षण विभागद्वारा प्रतिनिधिसभा सदस्यहरूका लागि आयोजित दुई दिने प्रशिक्षण कार्यक्रमअन्तर्गत आज जावलाखेलस्थित स्टाफ कलेजमा पार्टी सभापति रवि लामिछाने ले सम्बोधन गर्नुहुने भएको छ ।

अपराह्न २ः३० बजे हुने उक्त सम्बोधन कार्यक्रममा सञ्चारकर्मीहरूलाई उपस्थित भई समाचार सम्प्रेषण गर्न पार्टीले अनुरोध गरेको छ ।

प्रशिक्षण कार्यक्रम प्रतिनिधिसभा सदस्यहरूको क्षमता अभिवृद्धि, संसदीय भूमिका प्रभावकारी बनाउने तथा समसामयिक राजनीतिक विषयमा अभिमुखीकरण गर्ने उद्देश्यले आयोजना गरिएको बताइएको छ ।

काठमाडौं । राष्ट्रिय स्वतन्त्र पार्टीले आगामी स्थानीय तह निर्वाचनलाई लक्षित गर्दै उम्मेदवार छनोट सम्बन्धी तयारी अघि बढाएको छ। यसैक्रममा ‘स्थानीय तह उम्मेदवार छनोट रूपरेखा २०८३’ को मस्यौदा प्रतिवेदन पार्टीको सचिवालय बैठकमा पेश गरिएको छ।

उक्त मस्यौदा प्रतिवेदन उम्मेदवार छनोट रूपरेखा निर्माण समितिको तर्फबाट पार्टी सभापति रवि लामिछानेलाई औपचारिक रूपमा हस्तान्तरण गरिएको हो। पार्टीले आगामी निर्वाचनमा पारदर्शी, योग्य र जनमुखी उम्मेदवार चयन गर्ने उद्देश्यले रूपरेखा तयार पारिएको जनाएको छ।

पार्टीका अनुसार मस्यौदामा उम्मेदवारको योग्यता, मूल्यांकनका आधार, छनोट प्रक्रिया तथा स्थानीय तहको आवश्यकतालाई प्राथमिकतामा राख्ने विषय समेटिएका छन्। पार्टीभित्र आन्तरिक छलफलपछि उक्त मस्यौदालाई अन्तिम रूप दिइने बताइएको छ।

काठमाडाैँ । राष्ट्रिय स्वतन्त्र पार्टीका सभापति रवि लामिछानेले उद्योगी व्यवसायीहरूलाई डर–त्रासमा नपर्न आग्रह गरेका छन् । आइतवार निजी क्षेत्रका प्रतिनिधिहरुको भेटमा उनले सरकारको उद्देश्य निजी क्षेत्रलाई हतोत्साही बनाउने नभई नीति सुधार गर्ने रहेको बताएका हुन् । उनले सरकारको सुशासन अभियानमा साथ दिन उद्योगी व्यवसायीहरुलाई आग्रह गरे ।

उनले सरकार उद्योगी व्यवसायीहरुसँग सहकार्य गरेर नै अगाडी बढ्न चाहेका बताए । तर अर्थतन्त्रलाई कमजोर बनाउने गतिविधिहरूमा राज्यले कडाइका साथ निगरानी राख्ने उनकाे भनाइ छ। विगतमा राजनीतिक अस्थिरता र परिवेशका कारण व्यवसायीहरू विभिन्न शक्तिकेन्द्रको दबाबमा परेका घटनाहरूलाई सरकारले राम्रोसँग बुझेको उनले बताए । उनले अब अवस्था नदोहोरिनेमा ढुक्क हुन आग्रह गरे। सरकार सरकारले उधोगी व्यवसायीलाई नीतिले नै सुरक्षा दिने उनकाे भनाइ छ  ।

तपाईंहरुको मनोबल अलिकति के भएको हो ? कस्तो भएको हो, अलिकति डर त्रास देखिएको भन्ने सुनेको कारणले तपाईंहरुसँग बसेर छलफल गर्न खोजेको हो । तपाईंहरु अलिकति पनि चिन्ता मान्न पर्दैन । यो सुशासनको एजेण्डालाई अलिकति द्रुत गतिमा अगाडी बढाउनको लागि केही प्रश्नहरु तपाईंकोसम्म आइपुगेछ भने त्यसलाई यहाँहरुले सहज रुपमा लिईदिनुहोला । तर हामी मिलेर नै काम गर्ने हो । सरकारको कुनै व्यवसायीलाई हतोत्साही बनाएर, उसको व्यवसायलाई धराशायी बनाएर जाने कुनैपनि उद्देश्य छैन । हामीले बोक्नुपर्ने वा अफ्ठ्यारोमा पार्नुपर्ने तपाई कोही पनि हुनुहुन्छ । त्यसैले जुन किसिमको डर भएको हो कि भन्ने तपाईंहरुमा जुन वातावरण सिर्जना भएको छ, कुनैपनि डरबाट तपाईहरु मुक्त हुनुहोला,” उनले भने ।

उनले वर्तमान सरकार चुनावमा आफूहरुले गरेको वाचापत्रको आधारमा नै सञ्चालन हुने बताए । जनताले वाचापत्र हेरेर नै भोट दिएको उल्लेख गर्दै उनले वाचापत्रभन्दा दायाँबायाँ नजाने दाबी गरे । उनले उद्योगी व्यवसायीहरुलाई आफ्ना कमीकमजोरीलाई पनि मूल्याङ्कन गर्न आग्रह गरे। आन्तरिक लेखापरीक्षण गर्न सुझाव दिँदै उनले विगतका कमजोरी सच्याउने प्रक्रियामा राज्यसँग सहकार्य गर्न आग्रह गरे। नीतिगत सुधार, सुशासन र आर्थिक सुधार नै वर्तमान सरकारको मुख्य लक्ष्य रहेको उनकाे भनाइ छ । उनले आर्थिक सुधारका लागि गरिने कानून कार्यान्वयनका क्रममा आवश्यक सहयोग गर्न व्यवसायीहरू तयार हुनुपर्नेमा जोड दिए। उनले विगतमा जस्तो उद्योगी व्यवसायीहरु समस्या लिएर नेताको घरघरमा पुग्न नपर्ने बताए ।

उनले भने,”यो सरकार वाचा पत्र हेरेर चल्छ । यही भनेर हामीले भोट मागेका हौँ । जनताले हामीलाई भोट दिएको पनि यो वाचा गरेको हुनाले हो । यसभन्दा अगाडि के भयो, त्यसको क्रिटिसिजममा मैले समय खेर फाल्नु नै छैन, तपाईंहरु सबैलाई थाहा पाएकै कुरा हो । हिजो जुन अवस्थामा राजनीति थियो, त्यो अवस्थामा तपाईँहरू बाध्य हुनुभयो, तपाईँहरूमध्ये दुई जनाले पनि मेरो घर देख्नुभएको छैन, होला । बाँकीलाई पनि भन्छु तपाईँले कहिल्यै मेरो घर देख्नु पर्दैन । तपाईँले कहिल्यै मेरो पार्टीको सदस्यता लिनुपर्दैन । तपाईं मेरो पार्टीको अफिसमा एक पाइलो टेक्नु पर्दैन । चाहिनै पर्दैन, जरुरतै छैन । पोलिसीले प्रोटेक्ट गर्ने हो ।”

सरकारले ५–७ वर्षभित्र मध्यम आय भएको मुलुक बन्ने लक्ष्य राखेको उल्लेख गर्दै उनले उक्त लक्ष्य प्राप्तिका लागि निजी क्षेत्रको भूमिका महत्वपूर्ण हुने बताउनु भयो । निजी क्षेत्रको क्षमताका आधारमा नै सरकारले लक्ष्य निर्धारण गरेको उनको भनाइ छ । उनले सरकार लगानीमैत्री वातावरण बनाउन तयार रहेकोले निर्धक्क भएर व्यापार व्यासाय सञ्चालन गर्न आग्रह गरे ।

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले घरबारविहीन नागरिकको उचित व्यवस्थापनको जिम्मा सरकारले लिने बताउनुभएको छ ।

आज सिंहदरबारमा बसेको रास्वपा संसदीय दलको अनौपचारिक बैठकमा उहाँले जोखिमयुक्त क्षेत्रको बस्ती व्यवस्थापनका क्रममा सरकारले कसैलाई घरबारविहीन नबनाउने बताउनुभयो ।

“जोखिमपूर्ण स्थानमा रहेका सुकुम्बासीलाई पटकपटक सूचना दिएर सुरक्षित स्थानमा सरल तरिकाले सारिएको छ”, सभापति लामिछानेको भनाइ उद्धृत गर्दै रास्वपाका प्रवक्ता मनिष झाले भन्नुभयो, “ढल र बाढीको छेउमा बस्न बाध्य नागरिकको सुरक्षित बासस्थानबारे चिन्ता छ र सबैको भविष्यबारे चिन्ता गर्नु यो सरकारको कर्तव्य हो ।”

सभापति लामिछानेले देशैभरि अव्यवस्थित बसोबाससम्बन्धी समस्यालाई एक विशेष आयोग बनाएर शीघ्र सम्बोधन गरिने बताउनुभयो ।

“सरकारले कोही सुकुम्बासीलाई घरबारविहीन हुन दिने छैन, आवश्यक समन्वयका लागि सुझाव स्वागत योग्य छ”, उहाँले भन्नुभयो, “तर अनावश्यक राजनीतिकरण गर्नुहुँदैन । कसैलाई बाढीको जोखिम र ढलको छेउ बस्न बाध्य बनाएर ‘भोट बैंक’ को राजनीति गर्नु गलत हो ।”

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले संक्रमणकालीन न्याय तथा आम न्यायको सन्दर्भमा शहीद परिवारको पीडालाई राज्यले पहिलो प्राथमिकतामा राख्नुपर्ने बताएका छन् ।

सञ्चारकर्मीहरूसँगको कुराकानीका क्रममा उनले न्यायको सबैभन्दा ठूलो हतारो आफ्ना सन्तान गुमाएका आमाहरूलाई हुने उल्लेख गर्दै उनीहरूको आँसु पुछ्ने काम राज्यको पहिलो दायित्व हुनुपर्ने धारणा राखे । पूर्वप्रधानमन्त्री एवं नेकपा (एमाले) अध्यक्ष केपी शर्मा ओलीलाई प्रतिशोध साँधेर पक्राउ गरिएको हो भन्ने प्रश्नको जवाफ दिँदै लामिछानेले न्यायको वास्तविक हतारो बालबालिका गुमाएका परिवारसँग हुने बताएका हुन् ।

उनले शहीद तथा घाइते परिवारको न्याय प्राप्त गर्ने अधिकार प्राथमिकतामा पर्नुपर्नेमा जोड दिँदै राजनीतिक रूपमा पनि उनीहरूको पीडालाई बेवास्ता गर्न नहुने बताए । उनले भने, “न्यायको हतारो त घरमा आफ्नो कलिला बालबालिका गुमाएका आमाहरूलाई होला नि । त्यो जति हतारो अरू कसैलाई पनि हुँदैन । न्यायको हक सबैलाई छ, तर शहीदका आमाको आँसु पुछ्ने काम सबैभन्दा पहिला हुनुपर्छ ।”

सभापति लामिछानेले आफ्नो पार्टी र नेतृत्व निरन्तर ‘पब्लिक अडिट’ मा रहेको उल्लेख गर्दै हरेक गतिविधि, अभिव्यक्ति र राजनीतिक निर्णय नागरिकको निगरानीमा रहेको बताए । उनले रास्वपाका सबै निर्णय पारदर्शी हुने र जनअपेक्षाअनुसार नै पार्टी अघि बढ्ने प्रतिबद्धता व्यक्त गरे ।

काठमाडौं। संघीय संसदअन्तर्गत प्रतिनिधि सभाको आज बस्ने बैठकमा राष्ट्रिय स्वतन्त्र पार्टीका सभापति रवि लामिछानेले सम्बोधन गर्ने कार्यक्रम तय भएको छ।

संघीय संसद सचिवालयका अनुसार आज अपरान्ह २ बजे बस्ने प्रतिनिधि सभाको बैठकमा सभापति लामिछानेले समसामयिक राजनीतिक विषयमा आफ्नो धारणा राख्ने तयारी गरिएको छ।

काठमाडाैँ । राष्ट्रिय स्वतन्त्र पार्टी (रास्वपा)का सभापति रवि लामिछानेले निर्वाचनमा जनताले दिएको अभिमतलाई सम्मान गर्दै देश र जनताप्रति जिम्मेवार भएर प्रस्तुत हुन आफ्ना नवनिर्वाचित प्रतिनिधिसभा सदस्यलाई निर्देशन दिएका छन् ।

रास्वपाद्वारा नवनिर्वाचित प्रतिनिधिसभा सदस्यका लागि ललितपुरमा आयोजित अभिमुखीकरण कार्यक्रममा सभापति लामिछानेले सार्वजनिक रूपमा जथाभावी अभिव्यक्ति दिने र प्राप्त अभिमतलाई मनोरञ्जनका रूपमा लिने छुट कसैलाई नरहेको स्पष्ट पारे ।

“सञ्चारमाध्यममा विचार गरेर बोल्नुस् । बोल्दाखेरी वैदेशिक सम्बन्धमा कस्तो प्रभाव पार्छ भन्नेसमेत सोचेर जिम्मेवार भएर बोल्नुस् । नागरिकसँगको सम्पर्कलाई बलियो बनाउनुस्”, उनले भने, “हामीले नागरिकसँग गरेका करारपत्रलाई राम्रोसँग पढ्नुहोला । हामीमाथि देश बनाउने, देशमा परिवर्तन गर्ने जिम्मेवारी छ । जनताले दिएको अभिमतको पूर्णसम्मान गर्दै सकारात्मक परिवर्तनका पक्षमा लाग्नुछ ।”

काठमाडाैँ । राष्ट्रिय स्वतन्त्र पार्टी (रास्वपा) का सभापति रवि लामिछाने ले आफ्ना सांसदहरूलाई सार्वजनिक अभिव्यक्ति दिँदा संयम र जिम्मेवारी अपनाउन कडा निर्देशन दिएका छन् ।

बुधबार आयोजित अभिमुखीकरण कार्यक्रममा बोल्दै उनले सांसदहरू अब सामान्य अभियन्ता वा पेशाकर्मीको भूमिकामा नरहेको उल्लेख गर्दै पदीय गरिमा कायम राख्नुपर्नेमा जोड दिए। मिडियामा देखिनु वा सामाजिक सञ्जालमा ‘भाइरल’ हुनु आकर्षक लागे पनि त्यसले दीर्घकालीन रूपमा पार्न सक्ने प्रभावप्रति सचेत रहन उनले आग्रह गरे ।

कुनै पनि सार्वजनिक अभिव्यक्ति दिनुअघि पार्टी पंक्तिसँग आवश्यक सरसल्लाह गर्न निर्देशन दिँदै लामिछानेले सांसदहरूको बोली र व्यवहारले देशको अर्थतन्त्र र वैदेशिक सम्बन्धमा समेत असर पार्न सक्ने बताए। हल्का र असावधानीपूर्ण अभिव्यक्तिले जनताको विश्वासमा आँच आउने भन्दै उहाँले त्यस्ता गतिविधि नगर्न चेतावनी दिए ।

उनले सांसदहरूलाई सकेसम्म सरकारी अस्पतालमै उपचार गराउन सुझाव दिँदै जनताले भोग्ने समस्या प्रत्यक्ष रूपमा अनुभूति गर्नुपर्ने धारणा राखे । सरकारी सेवाको गुणस्तर सुधार्न स्वयंले त्यही सेवा उपयोग गर्नुपर्नेमा उनको जोड थियो।

साथै, सांसद पदले मात्र ज्ञान नदिने उल्लेख गर्दै उनले निरन्तर अध्ययनमा जोड दिन आग्रह गरे। संसद नचलेको समयमा ठूला सेमिनारमा मात्र सीमित नभई गाउँ–टोल, चिया चौतारा र जनस्तरमै पुगेर जनताको समस्या बुझ्न उनले निर्देशन दिए ।

काठमाडाैँ । राष्ट्रिय स्वतन्त्र पार्टी (रास्वपा) का सभापति रवि लामिछानेले नेपालको निजी क्षेत्र, गैरआवासीय नेपाली तथा अन्तर्राष्ट्रिय समुदायलाई निर्धक्क भएर नेपालमा लगानी गर्न आह्वान गरेका छन् ।

नयाँ दल र नयाँ अनुहारहरू सत्ता र शक्तिमा आउँदा अर्थतन्त्र तथा लगानीको वातावरणमा कुनै नकारात्मक प्रभाव नपर्ने बताउँदै उनले सबै सरोकारवालालाई आश्वस्त पारे । मुलुकको आर्थिक समृद्धिलाई आफ्नो पार्टीको प्रमुख एजेण्डा बनाइएको उल्लेख गर्दै लामिछानेले निजी क्षेत्रलाई विचलित नहुन आग्रह गरेका हुन् ।

देश निर्माणको अभियानमा विदेशमा रहेका नेपालीहरूको पुँजी र सीप अपरिहार्य रहेको उल्लेख गर्दै उहाँले डायस्पोरालाई नेपालमै फर्किएर लगानी तथा उद्यममा संलग्न हुन अपिल गरे। साथै, अन्तर्राष्ट्रिय लगानीकर्ताहरूलाई लक्षित गर्दै नेपाल लगानीका लागि सुरक्षित गन्तव्य रहेको दाबी गरे।

उनले भने, “तपाईंहरूले निर्धक्कसँग काम गर्न सक्ने वातावरण हामी बनाउँछौँ। तपाईं र तपाईंको लगानी यो देशमा सुरक्षित हुनेछ, निर्धक्क हुनुहोस्। कुनै पनि अमुक नेता वा पार्टीको संरक्षण आवश्यक पर्दैन, देशको नीतिले नै तपाईंको लगानीको संरक्षण गर्नेछ।”

उद्योग–व्यवसाय विस्तार, रोजगारी सिर्जना र सुशासनमा नयाँ मापदण्ड स्थापित गर्दै आर्थिक समृद्धिको बाटोमा निरन्तर अघि बढ्ने प्रतिबद्धता समेत उनले व्यक्त गरे ।

काठमाडाैँ । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्ना सांसदहरूलाई मन्त्री बन्नका लागि कुनै पनि प्रकारको लबिङ वा ‘मिडिया ट्रायल’ नगर्न स्पष्ट निर्देशन दिएका छन् ।

बुधवार आयोजित सांसदहरूको अभिमुखीकरण कार्यक्रमको समापन गर्दै उहाँले सरकारमा जाने विषयलाई लिएर सार्वजनिक रूपमा जथाभावी अभिव्यक्ति नदिन सचेत गराएका हुन्।

रास्वपाले प्राप्त गरेको अभूतपूर्व जनमतका कारण सरकारमा सहभागी हुने सम्भावना बढेसँगै सांसदहरूबिच मन्त्री बन्ने आकांक्षा देखिनु स्वाभाविक भए पनि त्यसलाई मिडियामा प्रचारको विषय नबनाउन उनले जोड दिए।

सभापति लामिछानेले पार्टीले कसलाई सरकारमा पठाउने भन्ने विषयमा हालसम्म कुनै निर्णय नगरेको जानकारी दिँदै मन्त्री छनोटको आधार व्यक्तिको क्षमता र विज्ञता हुने स्पष्ट पारे। कसैले पनि व्यक्तिगत रूपमा भनसुन वा दबाब दिन आवश्यक नरहेको उनको भनाइ थियो।

उनका अनुसार मिडियामा धेरै देखिने र नदेखिने दुवैथरी सांसदहरूको मूल्याङ्कन पार्टीले गरिरहेको छ। “तपाईंहरूमध्ये केही साथीहरूले मन्त्रालयको जिम्मेवारी सम्हाल्नुहुनेछ, तर ‘मन्त्री बनाइदिनुस्’ भनेर वा ‘म फलानो मन्त्री’ भन्दै मिडियामा प्रचार गर्ने काम बन्द गर्नुस्,” उनले भने ।

लामिछानेले सांसदहरूलाई चुनावका बेला जनतासँग गरिएको प्रतिवद्धता पत्र पुनः अध्ययन गर्न निर्देशन दिँदै मन्त्री बन्ने दौडभन्दा पनि जनताको दैनिक जीवन सुधारमा ध्यान केन्द्रित गर्न आग्रह गरे। उनले जनताको चुलो कसरी बल्छ र जीवनस्तर कसरी उकासिन्छ भन्ने विषयलाई प्राथमिकतामा राख्नुपर्नेमा जोड दिए।

काठमाडौं ।राष्ट्रिय स्वतन्त्र पार्टीका सभापति रवि लामिछानेले नेपाल कम्युनिष्ट पार्टी (एमाले) का अध्यक्ष तथा पूर्वप्रधानमन्त्री केपी शर्मा ओलीका पिता मोहनप्रसाद ओलीप्रति श्रद्धाञ्जलि व्यक्त गरेका छन्।

सभापति लामिछानेले आज सामाजिक सञ्जालमार्फत श्रद्धाञ्जलि व्यक्त गर्दै अध्यक्ष ओलीका पिता मोहनप्रसाद ओलीको निधनले आफूलाई दुःखी बनाएको उल्लेख गरे ।

उनले दुःखद घडीमा दिवङ्गत पिताप्रति हार्दिक श्रद्धाञ्जलि अर्पण गर्दै शोकसन्तप्त परिवारजनमा धैर्यधारण गर्ने शक्ति प्राप्त होस् भन्ने कामना गरेका  छन् ।

दिवङ्गत मोहनप्रसाद ओलीको आज पशुपति आर्यघाटमा अन्त्येष्टि गरिएको छ ।

काठमाडौं: राष्ट्रिय स्वतन्त्र पार्टी (रास्वपा) का सभापति रबि लामिछाने रुघाखोकी सहित भाइरल ज्वरो आएर बिरामी परेका छन् ।

रबिको सचिवालयका अनुसार, दुई दिनदेखि रबि लामिछाने घरमै आराम गरिरहेका छन् ।

रास्वपाले सरकार गठनका लागि वार्ता र सम्वाद तिब्र बनाइरहेकै अवस्थामा भाइरल ज्वरोका कारण  उनी घरमै रहेकाले पार्टीका गतिविधिमा सक्रिय हुन कठिनाई भएको बताइएको छ ।

काठमाडौँ । राष्ट्रिय स्वतन्त्र पार्टीका सभापति रबि लामिछानेले प्रतिनिधिसभा सदस्य निर्वाचनमा गरेको खर्चको विवरण निर्वाचन आयाेगमा बुझाएका छन्।

चितवन जिल्ला प्रतिनिधिसभा सदस्य निर्वाचन क्षेत्र नम्बर २ बाट उम्मेदवार रहेका लामिछानेले प्रतिनिधिसभा सदस्य निर्वाचन ऐन, २०७४ को दफा ७२ तथा निर्वाचन आचारसंहिता अनुसार आफ्नो सम्पूर्ण निर्वाचन खर्चको विवरण पेश गरेका हुन्।

पेश गरिएको विवरण अनुसार उनले निर्वाचन अभियानका क्रममा कुल ९ लाख ८९ हजार ९८७ रुपैयाँ खर्च गरेका छन्। खर्च विवरणमा मनोनयन दर्ता शुल्कदेखि प्रचारप्रसार, यातायात, प्रशिक्षण तथा अन्य कार्यक्रमसम्बन्धी खर्च समावेश गरिएको छ।

विवरण अनुसार मनोनयन दर्ताका लागि १० हजार रुपैयाँ खर्च गरिएको छ भने नमुना मतपत्रसम्बन्धी सामग्रीमा ६८ हजार १६१ रुपैयाँ खर्च भएको उल्लेख छ। त्यसैगरी यातायात तथा इन्धनतर्फ २ लाख ९५ हजार रुपैयाँ खर्च भएको देखिएको छ।

मतदाता प्रशिक्षणका क्रममा खाजा व्यवस्थापनमा १४ हजार २०० रुपैयाँ खर्च गरिएको छ भने बृहत् प्रचारप्रसारका लागि ४६ हजार रुपैयाँ खर्च गरिएको विवरणमा उल्लेख छ। प्रचार सामग्रीतर्फ झण्डा र ब्याज खरिदमा १ लाख १२ हजार रुपैयाँ तथा ब्यानर र स्टिकर खरिदमा ५५ हजार रुपैयाँ खर्च गरिएको छ।

यसैगरी खाद्यान्न तथा राशन खरिदमा १ लाख ९६ हजार रुपैयाँ खर्च भएको छ। हवाई यात्रातर्फ तीन पटक गरी १३ हजार ६२६ रुपैयाँ खर्च भएको देखिएको छ भने गोष्ठी तथा भेलाका लागि १ लाख ८० हजार रुपैयाँ खर्च गरिएको विवरणमा उल्लेख गरिएको छ।

निर्वाचन आयोगले उम्मेदवारलाई निर्वाचन सम्पन्न भएपछि निश्चित समयभित्र आफूले गरेको खर्चको विस्तृत विवरण बुझाउनुपर्ने व्यवस्था गरेको छ।