काठमाडौं: हिजोदेखि नेपालका सामाजिक सञ्जालमा एउटा बहस बडो जोडतोडका साथ उठेको छ एकजना चिकित्सक रामेश कोइरालाले देश छोडे भनेर । उनले उपकुलपति पदमा नियुक्ति चहन्थे रे, नपाएपछि अमेरिका पुगेर राजीनामा पठाए रे । चर्चाको विषय यही हो ।

यसको निकै चोटिलो र छोटो मिठो जवाफ दिएका छन् राप्रपाका नेता रविन्द्र मिश्रले । आफ्नो फेसबुक स्टाटसमा उनी लेख्छन् ‘वास्तवमा यो स्थिति आउनमा तपाइँहरु जस्ताको चरम राजनीतिक आग्रह त्यत्तिकै जिम्मेवार छ ।’

देश छोडेर पलायन भएको विषयलाई पनि संसारै छोडेजस्तो गरी उनले अरुले जस्तो लेखेका त छैनन्, तर फेसबुकमा सामान्य दुःख मनाउ भने गरेका छन् । आफूलाई फेसबुकमा तुच्छ शब्दमा तथानाम र भ्रामक कुरा लेखेर हैरान पारेपछि ब्लक नै गर्नुपरेको तथ्य पनि उनले खुलाएका छन् ।

गंगालाल अस्तालका मुटु रोगका यी चिकित्सकले बिपी काेइराला स्वास्थ्य विज्ञान प्रतिष्ठानकाे उपकुलपति चाहेका र त्यो नपाएपछि देश छोडेको कुरा आएको छ । उनले आफूले देश छोडेको कुरा फेसबुकमा लेखेका छन् र राजीनामा पनि फेसबुकमै राखेका छन् । तर पनि उपकुलपति नपाएको कुरा भने आफूले लेखेका छैनन् दोस्रो पटक पनि उनलाई त्यो नियुक्ति नदिइएको कुरा समाचारमा लेखाएका छन् ।

रविन्द्र मिश्रले भनेजस्तै यो स्थिति आउनमा के चरम राजनीतिक आग्रह नै हो त ? उनले पालेको चरम राजनीतिक आग्रह वास्तवमा उनको सामाजिक सञ्जालमा पनि स्पष्टसँगै देखिन्छ । अहिले उनका बारेका प्रतिक्रियाहरु मानिसहरुले दिइरहेको हेर्दा थाहा हुन्छ कि उनले यतिधेरै ट्वीटमा लेखिरहँदा विरामीको उपचार कुन बेला गर्थे ?

राप्रपाकै अध्यक्ष राजेन्द्र लिङदेन आफूलाई सामाजिक सञ्जालबाट रामेशले हैरान पारेको भनेका छन् भने आज बिहानदेखि रवि लामिछानेको एउटा पुरानो भिडियो आएको छ कि उनले रामेशले आफ्ना विरुद्धमा लेखेर दुःख दिएको कुरा पत्रकार सम्मेलन गरेरै जानकारी गराएका रहेछन् ।

अरु त भैगए राजनीतिक नेताहरु, डा रामेशले आफ्नै सिनियर चिकित्सक डा जागेश्वर गौतमलाई पनि के गरेका रहेछन् भन्ने कुरा उनी आफैँले ट्वीटरमा लेखेका छन् । आफू निर्देशक हुँदा स्वास्थ्यमन्त्री गगन थापासँग प्रसुती गृहको सबै सर्जरी फ्रि गर्ने योजनामा बनाएको र त्यो हुन नदिनेमा यिनै रामेश रहेको पनि उनले उल्लेख गरेका छन् । प्रत्यक्ष रुपमा उनले नभने पनि आफूले त्यसपछि राजीनामा दिएको र त्यसको साक्षी रामेश रहेको डा गौतमले बताएका छन् ।

उनले नेपाली कांग्रेसका सभापति शेरबहादुर देउवालाई लेखेका ट्वीट पढ्दा पनि भान त्यस्तै हुन्छ । तीमध्येका केही यहाँ प्रस्तुत गरिएका ट्वीटहरु हेर्दा लाग्छ देउवाले केही कुरा मिडियामा बोले कि त्यसको प्रतिवादमा एउटा ट्वीट गरिहाल्दा रहेछन् । त्यो पनि निकै तुच्छ भाषामा र एउटा चिकित्सकको जस्तो मान मर्यादा पनि नराखेरै ।

स्वभावैले देउवा धेरै भाषण गर्दैनन्, नत मिडियामा अन्तर्वार्ता दिन नै खासै रुची राख्दछन् । तर पनि देउवा जति बोलेका छन् त्यो भन्दा बढी उनले ट्वीटमा एक हिसाबले गाली गलौज नै गरेका छन् । तर पार्टी सभापतिलाई यसरी लेख्दा पनि महामन्त्री गगन थापाका बारेमा भने उनले बखानै गरेका हुन्छन् । तर तिनै रामेशलाई आफैँ स्वास्थ्यमन्त्री हुँदा पनि गगन थापाले उपकुलपति बनाएका थिएनन् । समाचार स्रोत भन्छ वर्तमान स्वस्थ्यमन्त्री प्रदीप पौडेल पनि उनलाई उपकुलपति बनाउने पक्षमा थिएनन् । मन्त्री पौडेल र रामेश साथी हुन्, त्यसैले रामेशले औपचारिक बैठकहरुमै धेरैका अगाडि मन्त्रीलाई तिमी भनिदिन्थे । यसले प्रदीपलाई अप्ठेरो महसुस हुने गरेको थियो ।

पार्टीका सभापतिमाथि यो हर्कत गर्ने अनि उनैले नियुक्ति दिएनन् भनेर समाचार लेखाउने र देश छोड्ने कति तर्कपूर्ण काम हो ? हुनत सबै चिकित्सकले राजनीति नै गर्नुपर्छ भन्ने छैन, यो देशमा कैयौँ प्रतिष्ठित र नाम चलेका चिकित्सक छन् दशकौँदेखि देश र नागरिकको सेवा गरेका, तर उनीहरुको पार्टी कुन हो भन्ने कुरा आजका दिन सम्म पनि खुलेको छैन ।

यसो भनेर मैले रामेशको राजनीतिक अधिकार माथि कुनै प्रश्न गरेको होइन, गर्न पनि मिल्दैन । उनले कांग्रेस पार्टी रोज्न पाउँछन् रोजे । तर यदि पार्टीमै बस्ने हो भने त त्यही पार्टीका अध्यक्षलाई सामाजिक सञ्जालमै गालीगलौज गर्न पाइएला र ? यसो गर्न पाइने विधानको व्यवस्था कुनै पार्टीमा पनि छैन । अनि पार्टीका अध्यक्ष या प्रमुख व्यक्तिलाई गालीगलौज नै गर्ने अनि फेरि कतिपय पदाधिकारीलाई चाहिँ हाइहाइ गर्ने उनको संस्कारलाई कसरी अर्थ लगाउने ?

उनले हिजो अमेरिकाबाट राजीनामा पठाउँदा मेरो दिमागमा एउटा जिज्ञासा जन्मिएको छ कि आज सन्दुक रुइत, भगवान कोइरालाहरुले पनि यसरी पदका लागि राजीनामाको बार्गेनिङ या सौदाबाजी गरेको भए उनीहरुको उचाइ के यहाँसम्म पुग्थ्यो त ?

सम्झिन्छु रामेशले काठमाडौँको मुटुमा रहेको मुटुरोग अस्पतालमा सरकारी जागिर खाँदै ट्वीट गरिरहँदा सन्दुकले भने ताप्लेजुङ, तेह्रथुम, खोटाङतिरका विकट गाउँहरुका बृद्धबृद्धाहरुका आँखामा ज्योति भरिरहेका हुन्थे । तर आजको वास्तविकता यो को कि उनीहरु कहिल्यै सरकारी जागिर या नियुक्तिको मोलमोलाई गरेनन् । नत, यो वा त्यो पद नदिने हो भने देश छोड्छु पनि भनेनन् ।

सन्दुक र भगवानहरु अमेरिका नभास्सिएर पनि देशको सेवा गरिरहेकै छन्, उनको कद झन् बढेको छ, घटेको छैन । सेवा गर्ने ठाउँ देशमा धेरै छन् जहाँ चित्रप्रसाद वाग्ले जस्ता चिकित्सकहरु पनि घरगाउँमै पुगेर नागरिकका मनमुटुको सेवा गरेका थिए । खै, उनीहरुलाई कहिल्यै रामेशलाई जस्तो देश छोड्न मन लागेन नत सरकारी जागिरको अवसरकै पछि लागे ।

देशको माया हुनेले अहिले विदेशमा भएका प्रतिभाहरुलाई स्वदेश फर्किन सन्देश दिने हो, तर पनि मैले त देश छोडेँ तैँले पनि छोड् भन्ने जस्तो आसयले विदेशबाट राजीनामा पठाउने होइन । उनले दिन खोजेको सन्देश देश बनाउन युवाहरुलाई स्वदेशमै रहनु भन्ने हो कि अरु नै केही हो ? मैले बुझ्न सकेको छैन ।

अनि नेपाली समाजले पनि विदेशिएकाको हाइहाइलाई यसैगरी ललकार्ने कि देशभित्रै भविष्य छ भन्ने ? रामेश कसरी लखेटिएका हुन् र ? उनी सरकारी अस्पतालका जागिरे होइनन् र ?

नियुक्ति भन्ने कुरा त मागेजति र आफूलाई चाहिएजति उनले मात्र होइन अरुले पनि पाएका छैनन् । त्यसैले त थप अर्थात् अतिरिक्त पद नपाउँदैमा समाचार लेखाएर विदेशबाटै राजीनामा पठाउने उनको प्रवृत्ति मन नपराउने पनि सामाजिक सञ्जालमा धेरै देखिएका छन् ।

काठमाडौं । वरिष्ठ मुटुरोग विशेषज्ञ डा.रामेश कोइरालाले पेशासँग देश नै छाडेर विदेशिएका छन् । डा. कोइराला लामो समयदेखि काठमाडौंको सहिद गंगालाल हृदय केन्द्रमा कार्यरत थिए । उनले सरकारी नियुक्तिको पहल गरे पनि सफल नभएपछि देश नै छाडेर विदेशिएका हुन् ।

सहिद गंगालाल राष्ट्रिय हृदय केन्द्र बाँसबारीका कार्डियोभास्कुलर विभागका प्रमुख वरिष्ठ कन्सल्टेन्ट कार्डियाक सर्जन कोइरालाले पदबाट राजीनामा दिएर विदेशिएका हुन् ।

उनले बुधबार एक्समा पोस्ट गर्दै व्यक्तिगत कारणले काम गर्न असमर्थ रहेको जनाउँदै आगामी असोज ३० गतेदेखि लागू हुने गरी राजीनामा दिएको बताएका छन् ।

उनी अमेरिका पुगेको खबर सार्वजनिक भएपछि धेरैले चिन्ता र चासो राखेका छन् ।

राप्रपाका वरिष्ठ उपाध्यक्ष रविन्द्र मिश्रले सामाजिक सञ्जालमा लेखेका छन्–

अत्यन्तै दुखी छु!

डा रामेश कोइराला र मेरो खासगरी राजनीतिक कुरा कहिल्यै मिलेन। ‘मार्ग परिवर्तन’ गर्नुअघि पनि मिलेन। उनी मलाई अधिकांश स्थितिमा शुरूदेखि नै अति तुच्छतापूर्वक खेदिरहने थोरै ‘बौद्धिक’ मध्येका एक थिए।

स्थिति यतिसम्म अपाच्य भयो कि मैले उनलाई ट्विटरमा ब्लक गरिदिएँ र तत्काल उनले पनि मलाई ब्लक गरिदिए।

तर आज उनले गङ्गालाल र देश छोडेर गएकोमा अत्यन्तै दुखी छु। हण्डर-ठक्कर सहेर, सरकारी अस्पतालमा सरकारी तलब खाएर, विदेश गएको भए महिनामैँ दशौँ लाख कमाउने अवसर छाडेर उनी जत्तिको मानिस जसरी नेपाल बसेका थिए, र उनले जेजस्तो सेवा दिएका थिए, त्यसको जति प्रशंसा गरे पनि पुग्दैन। म तपाईँलाई नमन गर्छु।

देशको वर्तमानको पीडा र भविष्यमा आउने अझ गम्भिर अवस्था कसले बुझिदिने!

गत चार वर्षमा (२०२१–२०२५) ८,६२४ नयाँ डाक्टरहरू नेपाल मेडिकल काउन्सिलमा दर्ता भए।

तीमध्ये ६,३६८ जनाले विदेश जाने हेतुले Good Standing Certificate प्राप्त गरे।

रामेशजी,

एकबारको जिन्दगी हो। तपाईँले असाधारण स्तरको सार्वजनिक सेवा गरिसक्नुभएको छ। जे पाउनु भएन, त्यसका लागि पश्चताप गर्नु पर्दैन (वास्तवमा यो स्थिति आउनमा तपाईँहरूजस्ताको चरम राजनीतिक आग्रह त्यत्तिकै जिम्मेवार छ)।

जहाँ रहनु हुन्छ, जे गर्नु हुन्छ — खुशी र सुखी रहनोस्। धेरैधेरै शुभकामना व्यक्त गर्दछु। अत्यन्तै दुखी। यस्तै हुने हो भने देश के होला!

नमरी बाँचे कालले साँचे कुनै दिन तपाईँको तुच्छताका बारे बसेर गफ गर्दै हाँसौँला!

डा. कोइराला देशमा बढ्दै गएको अतिराजनीतिकरणका कारण विरक्तिएर देश छाडेको हुनसक्ने बताइएको छ । उनले सरकारबाट समेत न्याय पाएका थिएनन् ।

बिपी कोइराला स्वास्थ्य विज्ञान प्रतिष्ठान र पोखरा स्वास्थ्य विज्ञान प्रतिष्ठानमा उपकुलपतिका लागि आवेदन दिएका कोइरालालाई सरकारले दुवैमा नियुक्त गरेको थिएन ।

सरकारले मंगलबार मात्र चार वटा स्वास्थ्य प्रतिष्ठानको उपकुलपति नियुक्त गरेको छ । कोइरालाले सामाजिक सञ्जालमा लेख्दै देश, पेसा र भूमिका सबै फरक भन्दै तस्बिरसमेत हालेका छन् । जसमा उनी परिवारका सदस्यसँग विदेश उड्न लागेको देखिन्छ ।

सामाजिक सञ्जाल एक्समा समसामयिक विकृति र विसंगतिका साथै चोटिला राजनीतिक स्टाटस लेख्ने कोइराला विभिन्न मिडियाका स्तम्भ लेखक पनि हुन् ।

डा. रामेशले सुरुमा गंगालाल हृदय केन्द्रको डाइरेक्टर बन्न चाहेका थिए ।

गत जेठ १४ गते स्वास्थ्यमन्त्री प्रदीप पौडेलको नेतृत्वमा बनेको उपकुलपति सिफारिस समितिले असार ४ गते आवेदन आह्वान गर्दा चारवटा स्वास्थ्य प्रतिष्ठानमा ५५ जनाले दाबी पेस गरेका थिए ।

कमिटीको अन्य सदस्यहरुमा स्वास्थ्य सचिव डा. विकास देवकोटा र राष्ट्रिय योजना आयोगका सदस्य डा. आरपी बिच्छा सदस्य थिए । कांग्रेसको भागमा परेको बीपी प्रतिष्ठान धरानको उपकुलपतिमा प्रा.डा. विक्रमप्रसाद श्रेष्ठ नियुक्त भएका छन् । बीपी कोइराला प्रतिष्ठान १३ आवेदकमध्ये कांग्रेसका तर्फबाट डा. संगीतासिंह भण्डारी, डा. रोशन पोखरेल, डा. रामेश कोइराला र डा. प्रह्लाद कार्की मुख्य प्रतिस्पर्धीका थिए ।

त्यस्तै पोखरा स्वास्थ्य विज्ञान प्रतिष्ठानमा डा. रामेश कोइराला, डा. विधाननिधि पौडेल, डा. राजेश अधिकारी, डा. प्रेमराज ज्ञवाली, अतिरिक्त स्वास्थ्य सचिव डा. श्रीकृष्ण श्रेष्ठ र हाल निमित्त उपकुलपति रहेका डा. भरतबहादुर खत्री मुख्य उम्मेदवार थिए । तर सरकारले खत्रीलाई नियुक्त गरेको थियो ।