काठमाडौं । अत्यधिक विषादी प्रयोग भएको भन्दै सरकारले भारतीय आँपको पैठारीमा रोक लगाएको विषयलाई समर्थन गर्दै राष्ट्रिय उपभोक्ता मञ्चका अध्यक्ष प्रेमलाल महर्जनले स्वदेशी आँप उपभोग गर्न आग्रह गरेका छन्।

सामाजिक सञ्जालमार्फत आफ्नो धारणा सार्वजनिक गर्दै महर्जनले विषादीयुक्त आँप खानुभन्दा नखानु नै राम्रो हुने र खाने भए स्वदेशी उत्पादनलाई प्राथमिकता दिनुपर्ने बताएका छन्। उनले नेपाल आँप उत्पादनमा करिब ९० प्रतिशत आत्मनिर्भर रहेको कृषि विभागको तथ्यांक उल्लेख गर्दै स्वदेशी उत्पादनले अधिकांश माग धानिरहेको बताएका छन्।

महर्जनका अनुसार फलफूलको राजा मानिने आँप व्यावसायिक तथा आर्थिक दृष्टिले महत्वपूर्ण बाली हो। नेपालमा वार्षिक करिब ४ लाख ५० हजारदेखि ५ लाख मेट्रिक टनसम्म आँप उत्पादन हुने गरेको छ, जसबाट देशको करिब ९० प्रतिशत माग पूर्ति भइरहेको छ।

कुल फलफूल खेती हुने क्षेत्रफलमध्ये करिब ३२ देखि ३५ प्रतिशत हिस्सा आँप खेतीले ओगटेको छ। उत्पादनको अधिकांश हिस्सा मधेश प्रदेशमा हुने गरेको छ। नेपालमा मालदह, दशहरी, आम्रपाली, बम्बई र कल्कत्तिया जातका आँप उत्पादन हुने भए पनि मालदह जातले बजारको करिब ९० प्रतिशत हिस्सा ओगटेको छ।

उनले नेपालका २४ भन्दा बढी जिल्लामा व्यावसायिक रूपमा आँप खेती भइरहेको जानकारी दिँदै सिराहा र सप्तरीलाई प्रमुख उत्पादन क्षेत्रका रूपमा उल्लेख गरेका छन्। यसबाहेक धनुषा, महोत्तरी, सर्लाही, रौतहट, बारा, पर्सा, दाङ, बाँके, बर्दिया र कैलालीमा पनि उल्लेख्य उत्पादन हुने गरेको उनले बताएका छन्।

महर्जनका अनुसार काठमाडौं उपत्यकामा मात्रै आँपको सिजनमा दैनिक करिब १०० टन आँप खपत हुने गर्छ।

नेपालमा पर्याप्त मात्रामा स्वदेशी उत्पादन उपलब्ध भइरहेका बेला विषादीयुक्त भारतीय आँपको आयातमा रोक लगाउने सरकारी निर्णय उचित रहेको उनको भनाइ छ। उनले उपभोक्तालाई स्वदेशी आँप खरिद गरी स्थानीय किसानको उत्पादनलाई प्रोत्साहन गर्न पनि आग्रह गरेका छन्।