काठमाडौं । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत पदाधिकारी चयनका लागि भएको मतदान सम्पन्न भएको छ। मतदानको निर्धारित समय सकिएसँगै मतपेटिका बन्द गरिएको निर्वाचन आयोग स्रोतले जनाएको छ।

निर्वाचन आयोगका अनुसार पदाधिकारी चयनका लागि १ हजार २८९ मत खसेको छ। यसअघि केन्द्रीय सदस्य चयनका क्रममा भने २ हजार ९५९ प्रतिनिधिले मतदान गरेका थिए।

केन्द्रीय सदस्य निर्वाचनको तुलनामा पदाधिकारीतर्फ मतदान गर्ने प्रतिनिधिको संख्या उल्लेख्य रूपमा घटेको देखिएको छ। तथ्यांकअनुसार केन्द्रीय सदस्य निर्वाचनमा मतदान गरेका प्रतिनिधिमध्ये १ हजार ६७० जनाले पदाधिकारी निर्वाचनमा मतदान नगरी फर्किएका छन्।

पदाधिकारीतर्फ कम मतदान हुनुको कारणबारे निर्वाचन समितिले औपचारिक धारणा सार्वजनिक गरिसकेको छैन। यद्यपि, प्रतिनिधिहरू मतदान प्रक्रिया पूरा नगरी महाधिवेशन स्थलबाट फर्किएका कारण मत संख्या घटेको स्रोतको भनाइ छ।

मतदान सकिएसँगै मतगणनाको तयारी गरिएको छ भने पदाधिकारी निर्वाचनको नतिजा आजै सार्वजनिक गर्ने तयारी गरिएको छ।

गत असार ७ गतेदेखि सञ्चालनमा रहेको रास्वपाको प्रथम राष्ट्रिय महाधिवेशन आजै समापन गर्ने कार्यक्रम छ। महाधिवेशनअन्तर्गत पाँच पदाधिकारी पदका लागि निर्वाचन भएको हो।