काठमाडौँ। चितवनको भरतपुरमा जारी राष्ट्रिय स्वतन्त्र पार्टी (रास्वपा)को पहिलो महाधिवेशनमा मंगलवार उपसभापति डा. स्वर्णिम वाग्लले प्रश्तुत गर्नुभएको अर्थ–राजनीतिक प्रश्तावप्रति प्रतिनिधिहरुले गम्भीर असन्तुष्टि व्यक्त गरेका छन् ।

उपसभापति वाग्लेले प्रश्तुत गरेको पार्टीको अर्थराजनीतिक प्रश्तावमाथि प्रतिनिधिहरुबीच समूहगत छलफल समेत नगराइएको भन्दै उनीहरुले असन्तुष्टि व्यक्त गरेका हुन् ।

महाधिवेशन प्रतिनिधि जनकराज जोशीले बन्दसत्रमा प्रश्तुत अर्थ–राजनीतिक दस्तावेजमाथि पर्याप्त छलफल नभएको बताउनु भयो ।

उहाँले संघीय शासन प्रणालीमाथि नै प्रश्न उठाउने खालको प्रश्ताव आएको भन्दै केही प्रदेशका नागरिकले त्यसलाई स्वीकार गर्न नसकिने समेत बताउनु भयो । उहाँले उक्त अर्थराजनीतिक प्रश्तावले मधेस, कर्णाली र सुदूरपश्चिम प्रदेशका नागरिकको हितविपरित रहेको आरोप पनि लगाउनु भयो ।

उहाँले भन्नुभयो, ‘पार्टी उपसभापतिज्यूले बन्दसत्रमा प्रश्तुत गर्नुभएको अर्थराजनीतिक दस्तावेज कुनैपनि समूहमा छलफल नगराइकन, प्रतिनिधिहरुको बीचमा कुनैपनि किसिमको बहस भएन, गरिएको छैन । त्यो पनि समयको सीमाको कारण ठिकै छ भन्नेकुरा भयो । तर अर्थराजनीकि प्रश्ताव कस्तो आयो भने हाम्रो संघीय शासन प्रणालीमाथि नै अट्याक गर्नेगरी उक्त प्रश्ताव आएको छ । उक्त प्रश्ताव सुदूरपश्चिम, कर्णाली र मधेस प्रदेशका जनताले स्वीकार्छन् जस्तो मलाई लाग्दैन ।’

प्रतिनिधिहरुको संख्या अपेक्षाभन्दा बढी भएकाले महाधिवेशनको प्रक्रिया अगाडि बढ्न नसकेको महाधिवेशन प्रतिनिधि धर्मराज ताम्राकारले बताउनु भयो । उहाँले महाधिवेशनको कार्यतालिका व्यवस्थापनमा पार्टी नेतृत्व चुकेको कारण महाधिवेशन प्रतिनिधिलाई समेत गाह्रो हुने अवस्था आएको बताउनभयो ।

उहाँले भन्नुभयो, ‘निर्वाचन हिजो नै हुनुपर्ने हो खासमा । तर प्रतिनिधिको संख्या सोचेभन्दा बढी आइदिएको कारणले अहिलेसम्म कुनैपनि निर्वाचन प्रक्रिया अगाडि बढ्न सकेको छैन । हामी टाढाबाट आएका प्रतिनिधिलाई व्यक्तिगत रुपमा केही समस्या पनि छन् । तर समग्रमा ठिकै छ ।’

महाधिवेशन प्रतिनिधि दयाराम अधिकारीले पार्टीले छोटो समयमा लिएको संगठनात्मक स्वरुपजस्तो महाधिवेशन प्रभावकारी रुपमा अघि बढ्न नसकेको बताउनु भयो । उहाँले पदाधिकारीमा सहमतिको प्रयास भइरहेकाले निर्वाचन प्रक्रिया लम्बिएको हुनसक्ने आशंका व्यक्त गर्नुभयो ।

उहाँले भन्नुभयो, ‘यो चार पाँच वर्षको अवधीमा पार्टी विशाल भइसकेको छ । तर महाधिवेशनको व्यवस्थापनको सम्बन्धमा केही कमजोरीहरु देखिएका छन् । पार्टी नेतृत्वले पदाधिकारीमा सकभर चुनाव नगरी मिलेर जाउँ भन्ने विषयमा संवाद भइरहेको कारण महाधिवेशनको निर्वाचन प्रक्रिया केही लम्बिएको छ । महाधिवेशन प्रतिनिधिको समस्या बुझेर जसरी व्यवस्थापन हुनुपथ्र्यो, त्यस्तो हुन सकेको छैन ।’

महाधिवेशन प्रतिनिधि प्रेमा थारुले महाधिवेशन समयमै सम्पन्न हुन नसकेको र प्रतिनिधि तथा उम्मेदवारको अन्तिम सूचीसमेत सार्वजनिक नभएको भन्दै व्यवस्थापन पक्ष कमजोर देखिएको बताउनु भयो । उहाँले समयमै निर्वाचन प्रक्रिया शुरु हुन नसकेको विषयमा पार्टी नेतृत्व गम्भीर बन्नुपर्ने बताउनु भयो ।

उहाँले भन्नुभयो, ‘हिजो नै सकिनुपर्ने महाधिवेशन आजसम्म सकिएको छैन । प्रतिनिधि र उम्मेदवारको अन्तिम सूची समेत आइसकेको छैन । व्यवस्थापनको सम्बन्धमा केही फितलो व्यवस्थापन भएकै हो ।’

महाधिवेशनस्थलमा भेटिएका अधिकांश महाधिवेशन प्रतिनिधिहरुले महाधिवेशनको निर्वाचन प्रक्रिया तत्काल शुरु गर्नुपर्ने धारणा राखेका छन् । केहीले महाधिवेशनको बन्दसत्रमा प्रश्तुत प्रश्तावमाथि गम्भीर प्रश्न समेत गरे । –न्युज एजेन्सी नेपाल