काठमाडौँ। रुसको सेन्ट पिटर्सबर्ग सहरमा माध्यमिक विद्यालय तहको अध्ययन पूरा गरेका विद्यार्थीको सम्मानमा वार्षिक ‘स्कार्लेट सेल्स’ महोत्सव भव्यताका साथ आयोजना गरिएको छ ।

आईतवार चलेको यस विशेष समारोहमा हजारौँको संख्यामा स्नातक विद्यार्थीको सहभागिता रहेको थियो । नेभा नदीको किनारमा आयोजित यस महोत्सवमा सांगीतिक प्रश्तुति, आकर्षक आतिशबाजी र प्रसिद्ध रातो पाल भएको जहाजको परेड प्रदर्शन गरिएको थियो ।

आयोजककाअनुसार यस वर्ष रुसभरका करिव ६६ हजार स्नातक विद्यार्थी र विभिन्न देशका ४ सय भन्दा बढी आमन्त्रित विद्यार्थीले यस कार्यक्रममा भाग लिएका थिए ।

उत्सवको शुरुवात प्यालेस स्क्वायरमा आयोजित एक कन्सर्टबाट भएको थियो । जहाँ रुसका प्रख्यात गायक तथा सांगीतिक समूहहरूले आफ्नो प्रश्तुति दिएका थिए । मध्यरातपछि, रातो रङका पालहरू सजाइएको रोसिया नामक जहाज नेभा नदीमा प्रवेश गरेसँगै कार्यक्रमले उत्कर्ष रूप लिएको थियो ।

आतिशबाजीको मनोरम दृश्यका बीच जहाजले यात्रा गरिरहँदा विद्यार्थीहरूले उत्साहका साथ खुशीयाली मनाएका थिए ।

सन् १९६८ देखि शुरु भएको यो महोत्सव अलेक्ज्याण्डर ग्रिनको प्रसिद्ध उपन्यास स्कार्लेट सेल्सबाट प्रेरित छ । हाल यो महोत्सव सेन्ट पिटर्सबर्गको एक प्रतिष्ठित सांस्कृतिक कार्यक्रम र रुसकै सबैभन्दा प्रभावशाली शैक्षिक उत्सवका रूपमा स्थापित भएको छ । सिन्ह्वा/न्युज एजेन्सी नेपाल