काठमाडौं । नागरिक उन्मुक्ति पार्टीकी अध्यक्ष रञ्जिता श्रेष्ठ र संरक्षक रेशम चौधरीबीच सामाजिक सञ्जालमा दोहोरी चलेको छ ।

अध्यक्ष श्रेष्ठले सामाजिक सञ्जालमार्फत् आफूलाई पार्टी संरक्षक चौधरीले मुद्दा दायर गरेको र त्यसको पेशी आइतबार तोकिएको विषय सार्वजनिक गरेपछि रेशमले आज सामाजिक सञ्जालमार्फत् नै जवाफ फर्काएका छन् । रेशमले रञ्जिताविरुद्ध मुद्दा हालेको नभई निर्वाचन आयोगविरुद्ध भएको स्पष्ट मात्र पारेका छैनन्, तीललाई पहाड नबनाउन पनि सचेत गराएका छन् ।

रेशमले भनेका छन्– केही स्वार्थी मान्छेले तिम्रो मेरो सम्बन्ध र नागरिक उन्मुक्ति पार्टीलाई सिद्ध्याउने खेलमा सहजै खेलेको मैले त बुझेको थिएँ तर तिमिले बुझेनौ ।

रेशमले छोरी भन्नेसंग, भाउजू भन्नेसंग र भान्जी भन्नेहरुसँग सजग रहन सुझाव दिएका छन् । उनले रञ्जितालाई भेट्न काठमाडौं आइरहेको जानकारी दिएका छन् । दुई जना मात्र वार्ता गर्ने प्रस्ताव लिएर उनी काठमाडौं आउन लागेका हुन् । एक आपासमा बसेर मन माझ्ने र मिल्दा पनि मनैले मिल्न, छुट्टीँदा पनि जग नहसाएर छुट्टीयौं भन्ने प्रस्तावसहित रेशम काठमाडौं आउन लागेका हुन् ।

रेशमले सामाजिक सञ्जालमा लेखेकका छन्–

शान्त तलाउमा ढुंगा हानेर तरंगित बनाउनेहरु सबको पहिचान छ । कसको स्वार्थ कहाँ र के का लागि छ त्यो पनि थाहा छ ।

यो सबलाई नजिकैबाट मैले पनि नियालिरहेको छुँ तर बोलेको छैन । मेरो चरीत्र हत्या हुनेगरी पोष्टिएका अक्षरको जरुर हिसाब होला ।

प्यारी रन्जिता, मैले तिमिलाई मुद्दा हालेको होइन,निर्वाचन आयोगलाई हो । अदालतले कारण देखाउ आदेश जारिगर्दा निर्वाचन आयोगको जवाफमा तिमिलाई पनि सोध्ने आदेश गरेको मात्रै हो । तिललाई पहाड बनाउनु हुन्न,समाजमा धेरै जान्ने बुझ्ने मान्छे छन् ।

केही स्वार्थी मान्छेले तिम्रो मेरो सम्बन्ध र नागरिक उन्मुक्ति पार्टीलाई सिद्ध्याउने खेलमा सहजै खेलेको मैले त बुझेको थिएँ तर तिमिले बुझेनौ ।

तिमी सोझी र अन्जान छ्यौ तर मुडि छ्यौ भनेर नजिकबाट बुझ्नेले त्यसको फाइदा उठाए ।

१. माननीय इन्दिरा गिरिलाई कार्वाही गर्न उक्साए ।

२. माननीय घनश्याम चौधरीलाई संसदीय दलको नेताबाट हटाउन लागाए ।

३. तिमिलाई उकासी उकासी पत्र माथी पत्र काट्न लगाए ।

यो सब गराउनेलाई भोलिको परिणाम थाहा थियो । यिनले हाम्रो संवादलाई कसरी रोक्न सकिन्छ,अहिले पनि रोक्ने प्रयत्न गरिनै राखेका छन् । तर अब रोकिनुहुन्न । संवादको सुरुवात गरे दुबैको मन हल्का होला ।

नबिर्सनु रन्जिता, यिनले हामिलाई राम्रो नाच्यो भनेर थपडी बजाए जस्तो नाटक मात्रै गरेका हुन् । वास्तवमा यिनले हामी दुबैलाई नङ्ग्याई राखेका मात्रै हुन् ।

सरल तरिकाले बुझ तिमी,मैले निर्वाचन आयोगको फैसला अदालत भन्दा गम्भीर र त्रुटिपूर्ण देखेपछी त्यसको प्रतिवाद मात्रै गरेको हुँ । सबका सामु अध्यक्ष स्विकारेको छुँ,तिम्रो मानमर्दन गरेको छैन । तिमिले यत्ति बुझ्नु रन्जु,हाम्रो पार्टी काठमाडौंमा एमाले र टीकापुरमा माओवादी किन बन्छ ? यो दुबै नबनेर नागरिक उन्मुक्ति पार्टी मात्रै बनोस् भन्ने मेरो चाहना हो ।

तिमिले बुझ्नु, यो चटकेहरुले हिजो म निर्दोष छ भन्दै मेरो गीत बजाएर भोट मागे,आज किन मलाई दोषी करार गरेर जेल हाल्ने षड्यन्त्र गर्दैछन् । मैले त राम्रोसँग बुझेको छुँ रन्जु,तिमी सिद्धिनु भनेको म सिद्धिनु हो तर तिमिले बुझेकी छ्यौ कि छैनौ,म सिद्धिनु भनेको तिमी पनि सक्किनु हो ?

हाम्रो आन्तरिक भेद बाहिर निकाल्न खोल्नेहरु दुबैका होइनन् । हामी सचेत रहनुपर्छ ।

तिमिलाई मेरो सुझाव छ रन्जु,अहिले केहिदिन ३ तत्वबाट टाढा रहनु,

१. छोरी भन्नेसंग

२. भाउजू भन्नेसंग

३. भान्जी भन्नेसंग

यी ३ को खेलबाट बच्नु कल्याण आफै हुन्छ ।

जसले तिमिलाई मन्त्री ज्यु भन्छ त्यो चाहिँ तिम्रो असलि कार्यकर्ता हो ।

अहिले म काठमाडौंमा केवल तिमी भेट्ने उद्धेश्यले मात्रै आउँदैछु । केवल २ जनाको मात्रै वार्तालाप होस् । एक आपसमा मन माझौँ । मिल्दा पनि मनैले मिलौं,छुट्टिदा पनि जग नहँसाएर छुट्टिऔं । हाम्रा सन्तान इष्टमित्र सबैलाई आहट भएको छ । यसैमा दुबैको भलाई छ र पार्टीको कल्याण पनि ।

जय नागरिक ।

काठमाडौं । नागरिक उन्मुक्ति पार्टीकी अध्यक्ष रञ्जिता श्रेष्ठ तनावमा परेकी छन् । आफ्नै श्रीमान पार्टी संरक्षक रेशम चौधरीले हालेको मुद्दाले लिएर उनी तनावमा परेकी हुन् ।

रेशमले दायर गरेको मुद्दाको पेशी आइतबारका लागि सरेको छ । यसैगरी लम्कीचुहा वार्ड ४ बस्ने रामेश्वर चौधरी लगायत ६४ जनाले हालेको मुद्दाको पेशी पनि आइतबार नै भन्ने जानकारी आएको उनले सामाजिक सञ्जालमा पोस्ट गर्दै भनेकी छन् ।

६४ जनाको नागरिकतासहित हालिएको मुद्दामा कसैको किर्ते हस्ताक्षर वा नागरिकताको दुरूपयोग भयो भनी पछि नपछुताऊनु होला भनेर रञ्जिताले चेतावनीसमेत दिइकी छन् । त्यति मात्र नभएर उनले आफैले खनेको खाल्डोमा आफै नफसिएला भनेर सचेतसमेत गराएकी छन् ।

रञ्जिताले सामाजिक सञ्जालमा लेखेकी छन्–

सरंक्षक ज्यूले मलाई प्रतिवादी बनाएर हाल्नु भएको मुद्दा आईतबार सुनुवाई हुने गरेर सरेको छ !

आईतबार सुनुवाई हुन्छ भन्ने जानकारी पाऊंदा पाऊंदै लम्की चुहा वार्ड ४ बस्ने रामेश्वर चौधरी लगाएत ६४ जनाले हालेको मुद्दाको पेशी पनी आईतवार भन्ने अर्को जानकारी सुन्न पाएं ।

६४ जनाको नागरीकता सहित हालीएको मुद्दामा कसैको कृर्ते हस्ताक्षर वा नागरीकताको दुरूपयोग भयो भनी पछि नपछुताऊनु होला

आफैले खनेको खाल्डोमा आफै नफसियला भन्न सकिन्न

जय नागरीक