काठमाडाैँ । सगरमाथा आरोहण गर्ने पहिलो ट्रान्स महिला निलम पौडेलले हिमाल आरोहणका लागि आवश्यक प्रायोजन (स्पोन्सरशिप) प्राप्त गर्न आफूले ठुलो संघर्ष गर्नुपरेको भन्दै गुनासो गर्नुभएको छ ।

बुधवार राजधानीमा आयोजित एक कार्यक्रममा बोल्दै उहाँले सगरमाथा आरोहण गर्नको लागि सरकारी निकायसहित साझेदार संस्थाहरुबाट पर्याप्त सहयोग नपाएको गुनासो गर्नुभएको हो ।

उहाँले यौनिक तथा लैङ्गिक अल्पसंख्यक समुदायप्रति समाजमा अझै पनि विभेदपूर्ण दृष्टिकोण रहेको उल्लेख गर्दै आफू ट्रान्स समुदायको भएकै कारण सहयोग पाउन नसकेको बताउनु भयो । उहाँले विभिन्न कार्यक्रम तथा फेसन शोहरू आफ्नै लगानीमा सञ्चालन गर्दै आएको भएपनि सगरमाथा आरोहण जस्तो अन्तरराष्ट्रिय महत्वको अभियानका लागि भने सहयोग प्राप्त हुने अपेक्षा गरेपनि त्यस्तो हुन नसकेको बताउनु भयो ।

उहाँले विभिन्न पालिका तथा वडा कार्यालयहरुले छलफलका लागि बोलाएको भएपनि आफू यौनिक तथा लैङ्गिक अल्पसंख्यक समुदायको भएको थाहा पाएपछि पछि हट्ने गरेको बताउनु भयो । उहाँले यौनिक तथा लैङ्गिक अल्पसंख्यक समुदायका सदस्यहरू पर्यटन क्षेत्रमा टुरिस्ट गाइडका रूपमा सक्रिय रहेको र नेपालको पर्यटन प्रवद्र्धनमा योगदान पुर्याइरहेको पनि बताउनु भयो । राज्यले यौनिक तथा लैङ्गिक अल्पसंख्यक समुदायको योगदानको सम्मान गर्दै नेपाललाई एलजीबीटीआई–मैत्री राष्ट्रको रुपमा नागरिकसमक्ष सन्देश प्रवाह गर्नुपर्ने बताउनु भयो ।

उहाँले भन्नुभयो, ‘हिमाल आरोहणको लागि स्पोन्सर गरिरहेका ब्राण्ड र कम्पनीहरुले मेरो प्रश्तावलाई सिधै अस्वीकार गरिदिनुभयो । हामी ट्रान्सहरुलाई सधैं नराम्रो नजरले किन हेर्ने ? हामी पनि राम्रो काम गर्न सक्छौँ तपाईंहरु साथ दिनुस् न । मैले आफैंले आफ्नै पैसामा धेरै इभेन्टहरु गरेर आएको छु । मलाई कसैले पनि साथ दिएको छैन । मैले आफ्नै पैसा लगानी गरेर फेसन सोको आयोजना समेत गर्ने गरेको छु । त्यहाँ सहयोग मिलेन । सगरमाथा आरोहण गर्न जाँदा त सहयोग मिल्छ भन्ने आश थियो त्यो पनि भएन । अहिले हाम्रो कम्युनिटीको धेरै  जना टुरिष्ट गाइड हुनुहुन्छ । हामीले नेपालको पयर्टन प्रवद्र्धनको लागि समेत सहयोग गरिरहेका छौँ । यौनिक तथा लैङ्गिक अलपसंख्यक समुदायले गरिरहेको योगदानलाई कदर गर्दै राज्यले नेपाल देश एलजिपिटीआई फ्रेण्ड्ली छ र हामी पनि सबै काम गर्न सक्छौँ भनेर भनिदिनुभयो भने राम्रो हुन्छ ।’

व्यवसायिक मेकअप कलाकार निलम पौडेलले मध्य जेठमा विश्वको सर्वोच्च शिखर सगरमाथाको सफलतापूर्वक आरोहण गरी कीर्तिमान कायम गर्नुभएको थियो । उहाँले यो सफलता सीमान्तकृत समुदायको ठूलो जित भएको बताउनु भयो ।