काठमाडाैँ । प्रतिपक्ष दल नेपाली कम्युनिष्ट पार्टी (नेकपा) का सांसद प्रमेशकुमार हमालले संविधानको मर्ममाथि नै प्रश्न उठाउन थालेकाले सरकारद्वारा गठित संविधान संशोधन बहसपत्र तयार पारिएको कार्यदलबाट आफनो पार्टी अलग हुनु परेको स्पष्ट पार्नुभएको छ ।

बिहीवार प्रतिनिधि सभा बैठकमा विशेष समय लिएर बोल्दै उहाँले उक्त स्पष्टिकरण दिनुभएको हो । सांसद हमालले लोकतन्त्र, गणतन्त्र, संघीयता, धर्मनिरपेक्षता लगायतका आधारभुत कुराहरुमा प्रश्न उठाउने गरी आफ्नो पार्टीले संविधान संशोधनको बहसमा सहभागी हुनै नसक्ने अडान समेत राख्नु भयो । उहाँले संविधानको पूर्ण पालना गर्ने सपथसहित बनेको वर्तमान सरकारले संविधानको आधारमाथि नै हमला गर्ने काम गरिरहेको आरोप लगाउनु भयो ।

सांसद हमालले भन्नुभयो,‘संविधानलाई मान्छौ भनेर प्रतिज्ञा खाएर, शपथ खाएर बहाली भएको सरकार हो । यसका कुनैपनि आधारभूत कुराहरुमाथि प्रश्न उठान पाईदैन । लोकतन्त्र, गणतन्त्र, संघीयता, धर्मनिरपेक्षता, समतामूलक सहभागिता र त्यसमा हामीले राखेका कैयन मौलिक अधिकारका विषयहरु त्यति मात्रै होइन, हाम्रो मुलुक, देश, हाम्रो देशको अर्थतन्त्र समाजवाद उन्मुख हुनेछ भनेर संविधानमा लेखिएको छ । हामीले यी विषयहरुमा प्रश्न उठाउने गरी संशोधनको खाका तयार गर्न सक्दछौँ ? यसको प्रक्रिया के हो, शुरु देखिनै यसकोबारे प्रश्न उठाएका छौ । हुनुपर्दछ । राष्ट्रिय सहमतीबेगर संविधान संशोधनको प्रक्रिया अघि बढ्नसक्छ ? त्यसैले गर्दा अहिले संविधान संशोधन सम्बन्धि त्यो डकुमेन्ट लेख्नका लागि तयार गरिएको कार्य दलबाट मेरो पार्टी त्यसमा अलग हुने म सादर अनुरोध गर्न चाहन्छु । अब हामी त्यो प्रक्रिया जुन अपारदर्शी छ, त्रुटीपूर्ण छ । जसले संविधानको मर्ममाथि प्रश्न उठाउन खोज्छ, त्यो प्रक्रियामा हामी संलग्न हुँदैनौ । यसको मतलव हामी संशोधनसँग सरोकार नै राख्दैनौ भन्ने होइन ।’

सांसद हमालले संविधान संशोधन राष्ट्रिय सहमतीको आधारमा मात्रै अघि बढन सक्ने धारणा समेत राख्नुभयो ।

काठमाडाैँ । प्रतिपक्ष दल नेपाली कम्युनिष्ट पार्टीका सांसद प्रमेशकुमार हमालले सुशासन सत्ता पक्षलाई लाग्दैन ? भनि सरकारलाई प्रश्न गर्नुभएको छ ।
बिहीवार प्रतिनिधि सभा बैठकमा विशेष समय लिएर बोल्दै उहाँले उक्त कुरा गर्नुभएको हो ।

प्रधानमन्त्री बालेन्द्र साहदेखि सत्तारुढ दलका कुनैपनि व्यक्तिलाई सरकारले सुशासनको मामिलामा छुट दिएको भन्दै सांसद हमालको आक्रोश थियो । उहाँले वर्तमान सरकारले जवाफदेहिता र पारदर्शिता विपक्ष दलहरुसँग मात्रै खोजेर प्रतिसोधको राजनीति गरिरहेको जिकिर पनि गर्नुभयो । सांसद हमालले विपक्षलाई विना कारण पहिला थुन्ने अनि हेर्ने काम मात्रै सरकारले गरिरहेको भन्दै आपत्ति जनाउनु भयो ।

उहाँले भन्नुभयो,‘सरकारका कतिपय गतिविधि प्रतिशोधपूर्ण हुन कि भन्ने भान हुनेगरी काम गरिराखेको छ । आतंकित तुल्याउने गरी काम गरिराखेको छ । हिजो कुरा उठेको थियो । पहिला थुन्ने अनि सुन्ने । मलाई त्यस्तो लाग्दैन । पहिला थुन्ने अनि जे पर्छ हेर्ने । त्यो नियतिमा सरकार गईरहेको छ । त्यसैले सुशासनको विषयमा गम्भिर प्रश्न उठेको छ । सुशासन सत्ता पक्षलाई लाग्दैन ? सरकार प्रमुखदेखि, सरकारमा रहेकादेखि, यो संसदमा रहेकाहरु पारदर्शी हुनुपर्दैन, जवाफदेही हुनु पर्दैन ? जवाफदेहिता अरुलाई मात्रै थोपर्ने हो ?’

सांसद हमालले सरकारको कसैको इसारमा चलिरहेको भान भईरहेको पनि बताउनु भयो ।