काठमाडौँ। सरकारले पूर्व गृहमन्त्री सुधन गुरुङ मन्त्री हुँदा र त्यसपछि उठेका सार्वजनिक सरोकारका विषयमा अध्ययन तथा छानविन गर्न समिति गठन गरेको छ।

मन्त्रिपरिषद्को २०८३ वैशाख २८ गतेको बैठकले उच्च अदालतका पूर्वन्यायाधीश अच्यूतप्रसाद भण्डारी अध्यक्ष, महालेखा नियन्त्रक शोभाकान्त पौडेल र सहन्यायाधीवक्ता अच्युतमणी नेउपाने सदस्य रहने गरी समिति गठन गर्ने निर्णय गरेको हो।

प्रधानमन्त्री वालेन्द्र शाहकी प्रेस तथा अनुसन्धान विज्ञ दिपा दाहालका अनुसार समितिलाई प्रतिनिधिसभा सदस्य समेत रहेका पूर्व गृहमन्त्री गुरुङ्गका सम्बन्धमा सार्वजनिकरुपमा उठेका विषयमा सत्यतथ्य अध्ययन तथा छानविन गरी सरकारसमक्ष रायसुझावसहित १५ दिनभित्र प्रतिवेदन बुझाउने जिम्मेवारी दिइएको छ।

काठमाडौँ । आज त्यस्तै पौने २ बजेतिर गृहमन्त्री सुधन गुरुङ प्रधानमन्त्री बालेन्द्र शाहलाई भेट्न सिंहदरबार पुगे । त्यसबेला प्रधानमन्त्री कार्यालयका अधिाकरीहरुलाई पनि उहाँ आउेन सूचना थिएन ।

उनी अकस्मात भित्र छिरे र आफ्ना विरुद्धमा मिडिया र सोसल मिडियामा निकै विरोध भइरहेकाले सत्यतथ्य बाहिर ल्याउने गरी एउटा छानबिन समिति बनाइदिन आग्रह गरे ।

उनी प्रधानमन्त्रीको कार्यकक्ष छिर्नासाथ कुर्सीमा पनि नबसी सो समिति बनाइदिन आग्रह गरेका थिए । त्यसपछि प्रधानमन्त्री एकछिन केही नबोली बसिरहे ।

त्यसो त हिजो पनि गुरुङले प्रधानमन्त्रीलाई भेटेर यही प्रस्ताव गरेका थिए । तर उनको सो मागका पक्षमा प्रधानमन्त्री थिएनन् । प्रधानमन्त्रीले हिजो पनि सुधनलाई राजीनामा दिन नै भनेका थिए ।

सचिवालय स्रोतका अनुसार आज पनि सुधनको सो माग सुन्नासाथ प्रधानमन्त्रीले भनेका थिए– ठिकै छ, त्यो समिति त बनाउँला, बनाउनु पनि पर्छ । त्यसले छानबिन पनि गर्छ । यदि निर्दोष ठहरिएमा तपाइँ पुनः गृहमन्त्री बन्न सक्ने अधिकार छँदैछ, तर अहिले चाहिँ राजीनामा गर्नुहोस् ।

त्यसपछि गृहमन्त्री गुरुङले गोजीबाट राजीनामा झिकेर प्रधानमन्त्रीलाई बुझाएका थिए । राजीनामा दिएको केही मिनेटमै गृहमन्त्री गुरुङ हस्त धन्यवाद भन्दै त्यहाँबाट बाहिरिएका थिए ।

प्रधानमन्त्रीको सचिवालय स्रोत भन्छ– जसरी राजीनामा पनि बोकेरै बुझाउने गरी नै उहाँ आउनुभएको थियो, ठिक त्यसैगरी उहाँले फेसबुक स्टाटस पनि पहिले नै तयार पारेको हुनुपर्छ । किनभने उहाँ यहाँबाट बाहिरिए लगत्तै फेसबुकबाट आफूले राजीनामा दिएको घोषणा गर्नुभएको थियो ।

मन्त्री गुरुङले आफैँले सार्वजनिक गरेको सम्पत्ति विवरणमा उल्लेख नभएका अपारदर्शी सम्पत्तिहरुको सूचनाहरु विभिन्न मिडियामा सार्वजनिक हुन थालेपछि गृहमन्त्री सुधन निकै अत्तालिएको समाचार स्रोतको दाबी छ ।

त्यसैकारण मंगलबार पनि उनले प्रधानमन्त्री बालेन र पार्टी सभापति लामिछानेसँग दुई–दुईपल्ट भेटेर कुरा गरेका थिए । ती भेटमा पनि उनले छानबिन समिति बनाएर आफ्नो सम्पत्ति र त्यसको आर्जन पृष्ठभूमि खोतल्ने अवसर दिनुहोस् भनेर भनेका थिए ।

सम्भवत आज पनि उनी यसै विषयमा अन्तिम पटक अनुरोध गर्छु नमानेमा राजीनामा दिनेछु भनेर प्रधानमन्त्री भेट्न गएको हुनुपर्छ ।

उनी त्यहाँ पुगेका थिए छानबिन समिति माग्न, तर पनि प्रधानमन्त्रीले चाहिँ हिजोकै राजीनामाको अडान दोहोर्याएपछि उनले कुनै सवाल जवाफ नगरीकनै गोजीबाट राजीनामा झिकेर बुझाएर हिंडेका थिए ।

काठमाडौं: गृहमन्त्री सुधन गुरुङले आफ्नो पदबाट राजीनामा दिएका छन् ।

केही दिनदेखि शेयर खरिदबिक्री, सम्पत्ति आर्जन र हाल पक्राउ परेका विभिन्न व्यक्तिसँग उठबस र नाम जोडिएपछि चौतर्फी आलोचना भएपछि उनले राजीनामा दिएका हुन् ।

उनको सचिवालयले एक प्रेस नोट लेख्दै भनेको छ, मसँग सम्बन्धित विषयमा निष्पक्ष छानबिन होस् र पदमा रहँदा  स्वार्थको द्वन्द्व  (conflict of interest)  नदेखियोस र त्यसमा कुनै असर नपरोस् भन्ने उद्देश्यले मैले आजकै मितिदेखि लागू हुने गरी गृह मन्त्री पदबाट राजीनामा दिएको छु।

गुरुङको सचिवालयले जारी गरेको मन्त्री गुरुद्धको भनाई :

म, सुदन गुरुङ, मिति २०८२ चैत १३ गतेदेखि गृह मन्त्रीको जिम्मेवारीमा इमानदारीपूर्वक काम गर्दै आएको छु। पछिल्ला दिनहरूमा नागरिक स्तरबाट मेरो शेयर लगायतका विषयमा उठेका प्रश्न, टिप्पणी र जनचासोलाई मैले गम्भीर रूपमा लिएको छु।

मेरो लागि पदभन्दा ठूलो कुरा नैतिकता हो, र जनविश्वासभन्दा ठूलो शक्ति कुनै हुँदैन। आज देशमा सुशासन, पारदर्शिता र जवाफदेहिताको माग गर्दै उठिरहेको न्भल श् आन्दोलनले पनि यही सन्देश दिएको छ सार्वजनिक जीवन स्वच्छ हुनुपर्छ, नेतृत्व उत्तरदायी हुनुपर्छ।मेरा ४६ जना भाइ बहिनिहरुको रगत र बलिदानी को आडमा बनेको सरकारलाई कसैले प्रश्न गर्छ भने त्यसको जवाफ नैतिकता हो।

त्यसैले, मसँग सम्बन्धित विषयमा निष्पक्ष छानबिन होस् र पदमा रहँदा स्वार्थको द्वन्द्व नदेखियोस नदेखियोस र त्यसमा कुनै असर नपरोस् भन्ने उद्देश्यले मैले आजकै मितिदेखि लागू हुने गरी गृह मन्त्री पदबाट राजीनामा दिएको छु।

मैले आफ्नो तर्फबाट नैतिक जिम्मेवारी निर्वाह गरेको छु। अब मेरो अपिल छ, प्रिय सञ्चारकर्मी मित्रहरू, आम नेपाली दाजुभाइ, दिदीबहिनी र युवाहरू, यदि हामी साँच्चै परिवर्तन चाहन्छौँ भने सत्य, इमानदारी र आत्मशुद्धिको बाटोमा सबै उभिनैपर्छ।कति मिडियाकर्मी साथी हरु को कहा कहा स्वीट शेयर छ बिस्तारै आउला, रामराज्यको चाहना राख्नेहरूले त्याग र नैतिक साहस पनि देखाउन सक्नुपर्छ।

काठमाडौँ । सवारी दुर्घटनामा परी निधन भएका ट्राफिक प्रहरी इन्स्पेक्टर अभय लामाको अन्त्येष्टि आज स्वयम्भुमा सम्पन्न भएको छ।

अन्त्येष्टि कार्यक्रममा गृहमन्त्री सुधन गुरुङ स्वयं सहभागी भई श्रद्धाञ्जली अर्पण गर्नुभएको थियो।

सो क्रममा मन्त्री गुरुङले दिवंगत इन्स्पेक्टर लामाको शव आफैंले बोकेर अन्तिम सम्मान प्रकट गर्नुभएको दृश्यले उपस्थितहरूलाई भावुक बनाएको थियो।

दुर्घटनामा ज्यान गुमाएका इन्स्पेक्टर लामाले ट्राफिक व्यवस्थापन र जनसेवामा पुर्‍याएको योगदानको उच्च प्रशंसा गर्दै सहभागीहरूले उहाँप्रति श्रद्धाञ्जली व्यक्त गरेका थिए।

राज्यको सुरक्षामा खटिएका एक कर्मठ प्रहरी अधिकृतको असामयिक निधनले सुरक्षा निकायसहित सर्वसाधारणमा शोकको वातावरण सिर्जना भएको छ।

काठमाडौँ: गृहमन्त्री सुधन गुरुङ र नेपालका लागि जनवादी गणतन्त्र चीनका राजदूत चाड माओमिङ बीच आज गृहमन्त्रालयमा शिष्टाचार भेटवार्ता सम्पन्न भएको छ।

भेटवार्तामा राजदूत माओमिङले गृहमन्त्री गुरुङलाई बधाई दिँदै सफल कार्यकालको शुभकामना व्यक्त गरेका थिए। जवाफमा गृहमन्त्री गुरुङले नेपाल ‘एक चीन नीति’प्रति प्रतिबद्ध रहेको स्पष्ट पार्दै नेपालको भूमिमा चीनविरुद्ध कुनै गतिविधि हुन नदिने प्रतिबद्धता दोहोर्‍याए। उनले नेपालको सार्वभौमिकता, स्वाधीनता र भौगोलिक अखण्डताको रक्षा गर्न सरकार सधैं सचेत रहेको पनि बताए।

भेटका क्रममा गृहमन्त्री गुरुङले नेपालमा भिसा नवीकरण नगरी अवैध रूपमा बसेका चिनियाँ नागरिकलाई स्वदेश फिर्ता गर्ने प्रक्रियालाई प्रभावकारी बनाउन आवश्यक समन्वय र सहजीकरणका लागि अनुरोध गरेका थिए।

यसैगरी, चीनको सहयोगमा सञ्चालित आयोजना समयमै सम्पन्न गर्न, नेपाल–चीन रेलमार्ग निर्माण अघि बढाउन तथा द्विपक्षीय व्यापार सहजीकरणमा थप पहल गर्न पनि गृहमन्त्रीले आग्रह गरे।

दुवै पक्षबीच नेपाल–चीन सीमाक्षेत्रमा हुने आपराधिक गतिविधि नियन्त्रणका लागि सहकार्य बढाउने विषयमा समेत छलफल भएको थियो। उक्त विषयमा चिनियाँ पक्षले सकारात्मक धारणा राख्दै नेपालको सुरक्षा निकायको क्षमता अभिवृद्धिमा सहयोग गर्न तत्पर रहेको जनाएको छ।

साथै, पछिल्लो समय सिन्धुपाल्चोक जिल्लाको तातोपानी नाकाबाट हुने आवतजावतमा समस्या आएको भन्ने समाचारप्रति चिन्ता व्यक्त गरिएको थियो। यसबारे राजदूत माओमिङले सीमाक्षेत्रमा कुनै अवरोध नरहेको स्पष्ट पार्दै त्यस्ता समाचार भ्रामक रहेको बताएका छन्।

भेटवार्तामा दुवै देशबीचको ऐतिहासिक सम्बन्धलाई अझ सुदृढ र विस्तार गर्दै भविष्यमा सहकार्यलाई नयाँ उचाइमा पुर्‍याउने सहमति व्यक्त गरिएको गृहमन्त्रालयले जनाएको छ।

काठमाडौं ।गृहमन्त्री सुधन गुरुङ पोखराको फेवाताल जग्गा प्रकरणमा आफै ठगिएको जनाउनु भएको छ ।

गृहमन्त्री गुरुङले सर्वोच्च अदालतको आदेशबमोजिम फेवातालको जग्गा मिचेर बनाइएको संरचना हटाउन पोखरा महानगरसँग मिलेर अभियान चलाइरहेका बेला उनले लिजमा लिएको जग्गासमेत अतिक्रमणभित्रकै रहेको पाइएको हो ।

जग्गा लिजमा लिँदा जग्गा धनीले अतिक्रमित जग्गा भन्ने तथ्य लुकाई झुक्याइ लिजमा दिएर ठगेको भन्दै मन्त्री गुरुङसहित तीन जना साझेदार कानुन उपचारमा जाने भएका छन् ।

पोखराको फेवाताल किनारमा साहसिक पर्यटनको प्रवर्द्धन गर्ने पवित्र उद्देश्यका साथ आजभन्दा करिब ८-१० वर्ष अगाडि मन्त्री गुरुङसहित तीन जना युवा उद्यमीहरू मिलेर ‘एड्भेन्चर स्पोर्ट्स नेपाल’ सञ्चालन गर्ने योजना अघि बढाएका थिए । ‘देशमै केही गरौँ भन्ने हुटहुटी र ऊर्जा बोकेका हामीले ठूलो लगानी र सपनाका साथ काम सुरु गरेका थियौँ। जग्गा भाडामा लिनुपूर्व हामीलाई जग्गाधनीहरूले उक्त जग्गा ६५ मिटरको मापदण्डभित्र पर्दैन भनी विश्वास दिलाएका थिए। लालपूर्जामा समेत जग्गा सुरक्षित रहेको देखाएका थिए, तर पछि नगरपालिकाबाट बुझ्दा त्यो त मापदण्डभित्र पर्दो रहेछ,’ मन्त्री गुरुङले भने ।

आफूहरुलाई झुक्याएको थाहा पाएपछि तत्कालै काम रोकेको पनि गुरुङले बताए । ‘हामीलाई झुक्याएर, ठगेर जग्गा भाडामा दिइएको यो तथ्य थाहा पाउने बित्तिकै मैले नैतिकताका आधारमा तत्कालै सम्पूर्ण निर्माण कार्य र लगानी रोकिदिएको थिएँ। एउटा युवा उद्यमीका रूपमा हाम्रो सपना र लगानीमाथि जुन खेलबाड भयो, त्यो स्वीकार्य छैन,’ उनले भने ।

मन्त्री गुरुङले यो ठगीविरुद्ध कानुनी उपचार खोज्ने तयारी गरेका छन् । ‘हामीलाई पर्न गएको यो अन्याय र ठगी विरुद्ध, कडाभन्दा कडा कानुनी उपचारका लागि हामी अब कानुनी प्रक्रियामा कत्ति पनि विचलित नभई अगाडि बढ्ने व्यहोरा सबैमा अवगत गराउन चाहन्छु,’ मन्त्री गुरुङले भने ।

खोटाङ। खोटाङमा विद्यमान रहेका शान्ति, सुरक्षासम्बन्धी समस्या यथाशीघ्र समाधान गरिदिन माग गर्दै गृहमन्त्री सुधन गुरुङलाई ज्ञापनपत्र बुझाइएको छ ।

श्रम संस्कृति पार्टीका महासचिवसमेत रहनुभएका खोटाङबाट निर्वाचित प्रतिनिधिसभा सदस्य आरेन राईले राईले आज सिंहदरबारस्थित गृहमन्त्रालय पुगेर जिल्लाको शान्ति, सुरक्षासम्बन्धी समस्या तत्काल समाधान गरी आमनागरिकको डरत्रासमुक्त भएर बाँच पाउने अधिकार सुनिश्चित गरिदन आग्रह गर्दै गृहमन्त्री गुरुङलाई ज्ञापनपत्र बुझाउनुभएको हो ।

गृहमन्त्री गुरुङको कार्यकक्षमा पुगेर बुझाइएको ज्ञापनपत्रमा केपिलासगढी गाउँपालिकाको बाक्सिला बजारमा सञ्चालित इलाका प्रहरी कार्यालय, छितापोखरी र भडाँरेघाटमा सञ्चालित अस्थायी प्रहरी चौकी भवन निर्माण गरिदिन माग गरिएको छ । जिल्लाका सबै अस्थायी प्रहरी चौकीलाई स्थायी गराउन तथा दिक्तेल रुपाकोट मझुवागढी नगरपालिका–१० पाथेका र केपिलासगढी गाउँपालिका–७ सुङ्देलमा स्थायी प्रहरी चौकी स्थापनाका लागि तत्काल पहल गरिदिन माग गरिएको सांसद राईले जानकारी दिनुभयो ।

जन्तेढुङ्गा गाउँपालिकाको चिसापानी बजारमा सञ्चालित सशस्त्र प्रहरी बलको बेस क्याम्प हटाउने नेपाल सरकारको निर्णयसमेत रोक्न ज्ञापनपत्रमा अनुरोध गरिएको छ । चिसापानीमा सञ्चालित सशस्त्र प्रहरी बलको बेस क्याम्प हटाउने विषयमा अहिलेसम्म कुनै आधिकारिक जानकारी नआएको सशस्त्र प्रहरी बल नेपाल नं ७ गुल्म, हलेसीका गुल्मपति सशस्त्र प्रहरी नायब उपरीक्षक शैलेन्द्र न्यौपानेले जानकारी दिनुभएको छ ।

नागरिकलाई सबैभन्दा पहिले शान्ति, सुरक्षा प्रत्याभूति दिलाउन गृहमन्त्रीलाई भेटेर ज्ञापनपत्र बुझाइएको सदस्य राईले बताउनुभयो । “नागरिकले आफू सुरक्षित छु भन्ने महसुस गरेपछि मात्र अन्य विषयको अपेक्षा गरेका हुन्छन् । त्यसैले सबैभन्दा पहिले सुरक्षासँग सम्बन्धित समस्या समाधान गरिदिन गृहमन्त्रीलाई भेटेर ज्ञापनपत्र बुझाएको छु । उहाँले पनि सकारात्मक प्रतिक्रिया दिनुभएको छ”, उहाँले भन्नुभयो, “अब अरु विषयगत मन्त्रालय पुगेर जिल्लाका सबै समस्या राख्नेछु । पार्टीको नीतिअनुसार ज्ञापनपत्र बुझाउन सुरु गरेको छु । बाँकी मन्त्रालयमा चाँडै ज्ञापनपत्र बुझाउनेछु ।”

प्रधानमन्त्री वालेन्द्र शाहले यही चैत १६ गते सांसदहरूसँग राख्नुभएको छलफलमा श्रम संस्कृति पार्टीका कोही पनि सांसद सहभागी भएका थिएनन् । हर्कराज राई ‘हर्क साम्पाङ’ले नेतृत्व गर्नुभएको श्रम संस्कृति पार्टीबाट प्रतिनिधिसभामा प्रत्यक्ष र समानुपातिक गरी सात जना सदस्य निर्वाचित भएका छन् ।

पार्टीको नीतिअनुसार प्रधानमन्त्रीले बोलाउनुभएको सांसदको भेलामा आफूहरू नगएको महासचिव राईले जानकारी दिनुभयो । “पार्टीको नीतिअनुसार छुट्टाछुट्टै मन्त्रालय पुगेर ज्ञापनपत्रमार्फत जिल्लाको समस्या राख्छौँ । अरु सांसदले पनि मन्त्रालय पुगेरै आ–आफ्नो जिल्लाका समस्या राख्नेछन्”, उहाँले भन्नुभयो, “यो प्रक्रिया प्रभावकारी हुन्छ भन्ने हाम्रो पार्टीको ठहर छ । हामी जनताका समस्या समाधानका लागि गम्भीर भएर निरन्तर लागिरहन्छौँ ।”

इलाका प्रहरी कार्यालय बाक्सिला बजार तथा अस्थायी प्रहरी चौकीहरू छितापोखरी र भँडारेघाट जीर्ण भवनमा सञ्चालन हुँदै आएका छन् । दश स्थानीय तह रहेको जिल्लामा एउटा जिल्ला प्रहरी कार्यालय, चारवटा इलाका प्रहरी कार्यालय (क), दुईवटा इलाका प्रहरी कार्यालय (ख), १९ वटा स्थायी प्रहरीचौकी र १० वटा अस्थायी प्रहरी चौकी सञ्चालनमा छन् ।  रासस

काठमाडौँट्गृठ हमन्त्री सुधन गुरुङले पशुपतिनाथ मन्दिरको दर्शन गर्नुभएको छ। आज बिहानै उहाँले पशुपतिनाथ परिसर पुगेर विधिपूर्वक पूजा–अर्चना गर्दै दर्शन गर्नुभएको हो। दर्शनसँगै उहाँले मन्दिर क्षेत्रको समग्र अवलोकन पनि गर्नुभएको जनाइएको छ।

गृहमन्त्री नियुक्त भएपछि उहाँ पहिलोपटक पशुपतिनाथ दर्शनका लागि पुग्नुभएको हो। आजकै दिन हनुमान जयन्ती परेको अवसर पारेर उहाँ मन्दिर पुगेको बताइएको छ। यसलाई धार्मिक तथा सांस्कृतिक दृष्टिले विशेष दिनका रूपमा हेरिने गरिन्छ।

हनुमान जयन्ती हिन्दू धर्मावलम्बीहरूका लागि अत्यन्त महत्वपूर्ण पर्वका रूपमा मनाइन्छ। यस दिन भगवान् हनुमानको जन्म भएको विश्वास गरिन्छ। विशेषगरी शक्ति, भक्ति, साहस र निष्ठाको प्रतीकका रूपमा हनुमानलाई पूज्ने गरिन्छ। देशभरका मन्दिरहरूमा पूजा–अर्चना, भजन–कीर्तन तथा धार्मिक कार्यक्रमहरू आयोजना हुने गर्छन् भने भक्तजनहरू बिहानैदेखि उपवास बस्दै मन्दिरमा दर्शनका लागि पुग्ने परम्परा रहेको छ।

आजको दिन पशुपतिनाथ क्षेत्रमा पनि बिहानैदेखि भक्तजनको ठूलो भीड लागेको थियो। सुरक्षाको विशेष व्यवस्था मिलाइएको थियो भने मन्दिर परिसर व्यवस्थित र अनुशासित देखिएको थियो। गृहमन्त्री गुरुङको उपस्थितिले सुरक्षा निकायहरू थप सक्रिय देखिएका थिए।

दर्शनपश्चात् गृहमन्त्री गुरुङले देशमा शान्ति, स्थिरता र समृद्धिको कामना गर्नुभएको बताइएको छ। साथै उहाँले मन्दिर क्षेत्रको सरसफाइ, व्यवस्थापन तथा तीर्थयात्रीहरूको सुविधाका विषयमा सम्बन्धित निकायसँग जानकारी लिँदै आवश्यक सुधारका लागि निर्देशनसमेत दिनुभएको थियो।

यस क्रममा पशुपति क्षेत्र विकास कोषका पदाधिकारीहरूले मन्दिर क्षेत्रको वर्तमान अवस्था, व्यवस्थापनका चुनौतीहरू तथा भइरहेका विकास निर्माणका कामबारे गृहमन्त्रीलाई जानकारी गराएका थिए। गुरुङले धार्मिक स्थलहरूको संरक्षण र प्रवर्द्धनमार्फत पर्यटन क्षेत्रलाई समेत टेवा पुग्ने विश्वास व्यक्त गर्नुभएको थियो।

गृहमन्त्री गुरुङको आजको पशुपतिनाथ दर्शनलाई धार्मिक आस्था र सांस्कृतिक सम्मानसँगै आफ्नो कार्यकालको सुरुवातमा सकारात्मक सन्देश दिने कदमका रूपमा पनि लिइएको छ। साथै, हनुमान जयन्तीजस्तो पवित्र दिनमा गरिएको दर्शनलाई अझ विशेष र अर्थपूर्ण रूपमा हेरिएको छ।

काठमाडौँ, १६ चैतः गृहमन्त्री सुधन गुरुङले प्रहरी प्रधान कार्यालयको निरीक्षण गर्नुभएको छ ।

गृहमन्त्री गुरुङले आज प्रहरी प्रधान कार्यालयको निरीक्षण गरी प्रहरी कर्मचारीलाई निर्देशन दिनुभएको हो । उहाँलाई प्रहरी महानिरीक्षक दानबहादुर कार्कीलगायत उच्च पदस्थ प्रहरी कर्मचारीले स्वागत गर्नुभयो ।

निरीक्षण पश्चात आयोजित कार्यक्रममा गृहमन्त्री गुरूङले सीमित स्रोतसाधनका बाबजुद पनि नेपाल प्रहरीले प्राप्त गरेको जिम्मेवारीलाई उत्कृष्ट रूपमा निर्वाह गरेकामा धन्यवाद दिनुभयो । उहाँले आगामी दिनमा निर्धक्क भएर आफ्नो जिम्मेवारी बहन गर्न निर्देशन दिनुभयो । प्रहरीले आफ्नो भूमिका निर्वाह गर्ने क्रममा कुनै पनि तहबाट हस्तक्षेप नहुने गृहमन्त्री गुरूङको भनाइ थियो ।

गृहमन्त्री गुरूङले समाजले प्रहरीलाई हेर्ने दृष्टिकोणलाई परिवर्तन गर्नुपर्ने आवश्यकता रहेको बताउनुभयो । नागरिक र प्रहरीबीचको दूरी घटाउँदै शिष्ट बोली, बचन एवं व्यवहारका साथ नागरिकको समस्यालाई सम्बोधन गरी उत्कृष्ट सेवा प्रवाह गर्नुपर्नेमा उहाँले जोड दिनुभयो । आमनागरिकसँगको सम्बन्धलाई थप सुमधुर बनाउँदै प्रहरीले उपलब्ध साधनस्रोतहरू नागरिकको सेवाका लागि उच्चतम प्रयोग गर्न उहाँले जोड दिनुभयो । विपद् व्यवस्थापनमा नेपाल प्रहरीले अग्रपङ्क्तिमा रहेर भूमिका निर्वाह गर्नुपर्ने हुँदा प्रहरीलाई थप साधनस्रोतयुक्त बनाउनुका साथै समयानुकूल आवश्यक तालिमहरूको व्यवस्था गरिने गृहमन्त्री गुरूङले उल्लेख गर्नुभयो ।

प्रहरी कर्मचारीहरूको वृत्ति विकास कार्यसम्पादन एवं वैज्ञानिक प्रणालीको आधारमा हुने उल्लेख गर्दै गृहमन्त्री गुरूङले साङ्गठनिक सुदृढीकरणलाई विशेष प्राथमिकतामा राख्दै समयानुकूल प्रविधिमैत्री एवं साधनस्रोत सम्पन्न बनाउन प्रतिबद्ध रहेको बताउनुभयो ।

कार्यक्रममा गृहसचिव राजकुमार श्रेष्ठले नेपाल प्रहरीले विभिन्न कठिनाइका बाबजुद प्रतिनिधिसभा सदस्य निर्वाचनलाई ऐतिहासिक रूपमा शान्तिपूर्ण रुपले सम्पन्न गराउन प्रत्येक प्रहरी कर्मचारीले निर्वाह गरेको व्यावसायिक भूमिकाको उच्च सम्मान गर्नुभयो । निर्वाचनको समयमा नेपाल प्रहरीले प्रदर्शन गरेको सक्षमताले नेपाल प्रहरी जस्तोसुकै परिवेशमा कार्यसम्पदान गर्न सक्षम रहेको पुष्टि गरेको गृहसचिव श्रेष्ठले बताउनुभयो । विगतभन्दा फरक शैलीमा कार्यसम्पादन गर्नुपर्नेमा जोड दिँदै उहाँले सबै प्रहरी कर्मचारीहरूले उच्च मनोबलका साथ छिटिछरितो र प्रभावकारी सेवा प्रवाह गर्न निर्देशन दिनुभयो ।

प्रहरी महानिरीक्षक दानबहादुर कार्कीले नेपाल प्रहरीले मुलुकको संविधान र ऐन कानुनले निर्दिष्ट गरेको अधिकार तथा मानवअधिकारका राष्ट्रिय र अन्तरराष्ट्रिय मापदण्डको परिधिभित्र रहँदै सत्य, सेवा, सुरक्षणमको मर्मलाई निष्ठापूर्वक पालना गर्दै आएको बताउनुभयो । प्रहरीको दक्षताबाट राज्यको प्रभावकारिता पुष्टि हुने र नागरिकका अपेक्षा वास्तविक रूपमा सम्बोधन हुने उहाँको भनाइ थियो । महानिरीक्षक कार्कीले प्रहरी सङ्गठन र सङ्गठनमा आबद्ध जनशक्तिको क्षमता, दक्षता, मनोबल अभिवृद्धिमा प्रहरी सङ्गठन नेतृत्व लाग्दै आएको बताउनुभयो । सो अवसरमा प्रहरीले हालसम्म गरेको कार्यसम्पादनबारे गृहमन्त्री गुरुङलाई जानकारी गराइएको थियो । प्रहरी प्रधान कार्यालयमा रहेका डाटा सेन्टरलगायतको गृहमन्त्री गुरुङले अवलोकन समेत गर्नुभएको थियो ।रासस

काठमाडौं। गृहमन्त्री सुधन गुरुङले पूर्व ऊर्जामन्त्री दीपक खड्कालाई गत २४ भदौको आन्दोलनका क्रममा निजको निवासबाट बरामद भएको रकमको अनुसन्धानका सिलसिलामा आज नियन्त्रणमा लिइएको जनाउनु भएको छ ।

पक्राउ पुर्जी सहित उहाँले सामाजिक संञ्जाल मार्फत खड्का पक्राउ परेको जानकारी गराउनु भएको हो ।

नेपाल प्रहरीको केन्द्रीय अनुसन्धान व्युरो सीआईबीले आज बिहान पूर्वमन्त्री खड्का पक्राउ गरेको थियो ।

काठमाडौँ । गृहमन्त्री सुधन गुरुङले नेपाल प्रहरी र सशस्त्र प्रहरीका आइजिपीलाई गृह मन्त्रालयमा बोलाएका छन् । केही बेरअघि दुवै जना आइजीपी मन्त्रालयमा पुगेका प्रहरी स्रोतले जानकारी दियो ।

हिजो पनि रातिसम्म उनी प्रहरी आइजिपीसँग छलफल गरेका थिए । सो छलफलका क्रममा नै पूर्व प्रधानमन्त्री केपी ओली र पूर्व गृहमन्त्री रमेश लेखकलाई आज बिहान पक्राउ गर्ने रणनीति तय भएको थियो ।

छलफलमा नेपाल प्रहरीका महानिरीक्षक दानबहादुर कार्की, र सशस्त्र प्रहरीका महानिरीक्षक राजु अर्याल ,नेपाल प्रहरीको कार्य विभागका एआईजी उमाप्रसाद चतुरवेदी, उपत्यका प्रहरी प्रमुख एआईजी ईश्वर कार्की र सशस्त्र प्रहरीका कार्य विभाग प्रमुख गणेश ठाडा मगर सहभागी हुनुहुन्छ ।

आज पनि उनीहरुबीच साँझ सुरु भएको छलफलमा के कुरा भइरहेको छ भन्ने विषयमा नखुलेको भएपनि ओली लेखक पक्राउ पछिको अवस्थाका साथै अरु पनि केही पक्राउको रणनीति हुनसक्ने अनुमान गरिएको छ ।

काठमाडौं । गृहमन्त्री सुधन गुरुङले जिल्ला प्रहरी परिसर र सातदोबाटोस्थित प्रहरी वृत्त र उपत्यका ट्राफिक प्रहरी कार्यालयको निरीक्षण गर्नुभएको छ ।

गृहमन्त्री गुरुङ आफैँ गाडी चलाएर काठमाडौँ र ललितपुरका विभिन्न स्थानको अनुगमनमा निस्कनु भएको छ । मन्त्री गुरुङ शनिबार बिहानै पहिला रामशाहपथस्थित उपत्यका ट्राफिक प्रहरी कार्यालय बग्गीखाना पुग्नु भएको थियो ।

त्यसपछि उहाँले ललितपुरको पुल्चोकस्थित पुरानो मन्त्री क्वार्टर र जिल्ला प्रहरी परिसर ललितपुर जावलखेलको अनुगमन गरेको एक प्रहरी अधिकारीले जानकारी दिनुभयो ।

उपत्यका ट्राफिक प्रहरी कार्यालयले आफनो फेसबुक पेजमा लेखेको छ- नेपाल सरकारका माननीय गृहमन्त्री सुधन गुरुङ ज्यूबाट यस उपत्यका ट्राफिक प्रहरी कार्यालयको अनुगमन गर्नु हुँदै ।

काठमाडौं। गृहमन्त्री सुधन गुरुङले ओली र लेखकको पक्राउ प्रतिशोध नभै केवल न्यायको सुरुवात भएको जनाउनु भएको छ ।

ओली र लेखकलाई पक्राउ गरेपछि सामाजिक संञ्जालमा मन्त्री गुरुङले अब देशले नयाँ दिशा लिने समेत जनाउनु भएको छ ।

उहाँले लेख्नु भएको छ-

कानुनभन्दा माथि कोही छैन। पूर्व प्रधानमन्त्री केपी शर्मा ओली र निवर्तमान गृहमन्त्री रमेश लेखकलाई नियन्त्रणमा लिएका छौँ।

यो कसैप्रति प्रतिशोध होइन, केवल न्यायको सुरुवात हो। मलाई विश्वास छ, अब देशले नयाँ दिशा लिनेछ।

काठमाडौँ । सुधन गुरुङलाई राष्ट्रिय स्वतन्त्र पार्टी (रास्वपा)ले गृह मन्त्रालयको जिम्मेवारी दिएको छ।

गोरखा क्षेत्र नम्बर १ बाट निर्वाचित प्रतिनिधिसभा सदस्य गुरुङले आजै राष्ट्रपति निवासमा पुगेर गृहमन्त्रीको पद तथा गोपनीयताको शपथ लिने तयारी रहेको स्रोतले जनाएको छ।

नवनियुक्त गृहमन्त्री गुरुङलाई रास्वपाले सरकारमा महत्त्वपूर्ण जिम्मेवारीसहित अगाडि बढाएको हो। गृह मन्त्रालय देशको शान्ति–सुरक्षा, प्रशासनिक संयन्त्र तथा आन्तरिक व्यवस्थापनसँग प्रत्यक्ष जोडिएको संवेदनशील मन्त्रालय मानिन्छ।

यसअघि पनि रास्वपाले सरकार गठन प्रक्रियालाई तीव्रता दिँदै विभिन्न मन्त्रालयका जिम्मेवारी टुंग्याउने क्रम जारी राखेको छ।

काठमाडौँ । रास्वपाले गृह मन्त्रालयको जिम्मेवारी सुधन गुरुङलाई दिएको छ।

उनी गोरखा क्षेत्र नम्बर १ बाट निर्वाचित प्रतिनिधिसभा सदस्य हुन् ।

ललितपुर : गोरखा क्षेत्र नम्बर १ बाट राष्ट्रिय स्वतन्त्र पार्टी (रास्वपा) का तर्फबाट प्रतिनिधिसभा सदस्यमा निर्वाचित सुधन गुरुङले आफूले सरकारी सुविधा व्यक्तिगत जीवनमा प्रयोग नगर्ने र सांसदका रूपमा प्राप्त हुने तलब जनहितमै खर्च गर्ने घोषणा गर्नुभएको छ।

रास्वपाले नवनिर्वाचित प्रतिनिधिसभा सदस्यहरू (प्रत्यक्ष तथा समानुपातिक) का लागि चैत ३ र ४ गते ललितपुरमा आयोजना गरेको अभिमुखीकरण कार्यक्रमको अवसरमा युवानेता गुरुङले राजनीति आफूका लागि पद, प्रतिष्ठा वा सुविधा प्राप्त गर्ने माध्यम नभई जनताको आवाजलाई संसद्‌सम्म पुर्‍याउने जिम्मेवारी भएको बताउनुभयो।

उहाँले भन्नुभयो, “म सरकारी गाडी चढ्दिनँ, मेरो आफ्नै गाडी छ। सांसदको रूपमा पाउने तलब पनि आफ्नो व्यक्तिगत काममा प्रयोग गर्दिनँ। त्यो रकम जेन्जी आन्दोलनमा घाइते  व्यक्तिहरूको शिक्षा, स्वास्थ्य र बेरोजगार युवाहरूको सहयोगमा खर्च गर्नेछु।”

आन्दोलनदेखि संसद सदस्य बनेर अभिमुखीकरण कार्यक्रममा सहभागी हुँदासम्मको आफ्नो अनुभूति सुनाउँदै गुरुङले भन्नुभयो, यो यात्रा भावनात्मक, जिम्मेवारीपूर्ण र ऐतिहासिक अनुभव भएको छ। उहाँका अनुसार सडकमा उठेको आवाजलाई अब संसद्‌भित्रबाट नीतिगत रूपमा उठाउने अवसर मिल्नु आफैँमा ठूलो जिम्मेवारी हो।

उहाँले भन्नुभयो, “आन्दोलनमा रहँदा जनताको पीडा, आक्रोश र आशा नजिकबाट देखें। आज संसद् सदस्य भएर अभिमुखीकरण कार्यक्रममा सहभागी हुँदा लागिरहेको छ—अब त्यो आवाजलाई परिणाममा बदल्नुपर्ने समय आएको छ। यो खुसीभन्दा बढी जिम्मेवारीको क्षण हो।”

राजनीति नबुझ्ने, नचाहने वा राजनीति प्रति वितृष्णा राख्ने व्यक्ति किन सांसद बन्नुपर्‍यो भन्ने प्रश्न राख्दा गुरुङले मुस्कुराउँदै आफ्नो राजनीतिक यात्राको मूल कारण खुलाउनुभयो। उहाँले भन्नुभयो, “भदौ २३ र २४ गते जेन्जी आन्दोलनमा उठेका आवाजलाई कार्यान्वयन गराउन, दोषीलाई कानुनअनुसार कारबाही गर्न र संविधान संशोधन गराउन म राजनीतिमा आएको हुँ।”

उहाँले थप्नुभयो, “अरू माननीयहरूलाई भन्नुभन्दा आफैँ सांसद बनेर काम गर्नुमा धेरै फरक हुन्छ। मलाई देशको विकृत सिस्टम बदल्नु छ। संसद्मा देशको उज्ज्वल भविष्यका लागि आवाज उठाउनु छ। त्यसैले आफ्नो काम आफैँ गर्नुपर्छ भन्ने सोचका साथ राजनीतिमा लागेको हुँ। गोरखाका जनताले मलाई जिताएर पठाउनुभएकोमा उहाँहरूप्रति हार्दिक आभार व्यक्त गर्दछु।”

गोरखा क्षेत्र नम्बर १ का जनताका लागि प्राथमिकता के रहनेछ भन्ने प्रश्नमा गुरुङले महिला सशक्तीकरण, सीपमूलक कार्यक्रम र आधुनिक कृषिलाई पहिलो प्राथमिकतामा राखेको बताउनुभयो। उहाँका अनुसार गाउँ–गाउँबाट युवा वैदेशिक रोजगारीमा गएकाले ग्रामीण क्षेत्रमा महिलामाथि कृषिको मुख्य जिम्मेवारी परेको छ।

उहाँले भन्नुभयो, “सबैभन्दा पहिला गाउँ–गाउँका महिला दिदीबहिनीहरूलाई समूहमा संगठित गरेर सीपमूलक कार्यक्रममार्फत दक्ष बनाउँदै अघि बढाउँछु। अहिले धेरै युवा वैदेशिक रोजगारीमा गएका छन्, जसका कारण गाउँमा महिलाहरूलाई कृषिमा काम गर्न निकै गाह्रो भइरहेको छ। त्यसैले आधुनिक कृषि औजार, मल तथा आवश्यक स्रोत–साधन उपलब्ध गराएर उहाँहरूलाई सहज बनाउनेछु। यदि महिलाहरूलाई काम गर्न सजिलो वातावरण बन्यो भने गोरखाको कृषि क्षेत्रलाई अग्रस्थानमा ल्याउन सकिन्छ। साथै महिलाहरूलाई हरेक क्षेत्रमा सशक्त बनाउने मेरो स्पष्ट प्रतिबद्धता छ।”

देशमा बढ्दो बलात्कार तथा लैंगिक हिंसाका घटनाबारे सोधिएको प्रश्नमा सांसद गुरुङले विशेषगरी नाबालिगमाथि हुने जघन्य अपराधप्रति कडा असन्तुष्टि जनाउँदै १७ वर्षमुनिका बालबालिकामाथि बलात्कार गर्ने अपराधीलाई फाँसीको सजाय दिने कानुन आवश्यक रहेको बताउनुभयो।

उहाँले भन्नुभयो, “१७ वर्षमुनिका बालबालिकालाई बलात्कार गर्ने व्यक्तिलाई फाँसीको सजाय दिने कानुन बनाउन सबै मिलेर पहल गर्नुपर्छ। यस्तो कानुन त धेरै पहिल्यै बन्नुपर्ने थियो। तर विडम्बना, देशका नेताहरूले यसतर्फ गम्भीर ध्यान दिएनन्। बनेका कानुनहरू पनि प्रभावकारी रूपमा कार्यान्वयन हुन सकेनन्। प्रमाण हुँदाहुँदै पनि राजनीतिक र आर्थिक दबाबमा धेरै घटनाहरू ढाकछोप गरिएका छन्। पीडितले न्याय नपाउने अवस्था अन्त्य हुनुपर्छ।”

उहाँले थप्नुभयो, “अब बन्ने सरकारले यस्ता जघन्य अपराधविरुद्ध कडा कानुन र कठोर कार्यान्वयन ल्याउने विश्वास लिएको छु। हामी राम्रो कुराका लागि आन्दोलन गर्दा गोली हान्ने अनुमति दिने राज्यले यस्ता अपराधीप्रति किन कठोर हुँदैन भन्ने प्रश्न जनतामा छ। यस्ता घटनामा कुनै पनि हालतमा सम्झौता हुनुहुँदैन।”

तराई–मधेशका महिलाहरू दहेज प्रथा र घरेलु हिंसाबाट पीडित भइरहेका विषयमा अर्चना झाले प्रश्न उठाउँदा गुरुङले कानुन बनेर मात्र नहुने, त्यसको प्रभावकारी कार्यान्वयन र महिलालाई कानुनी सचेतना आवश्यक रहेको बताउनुभयो।

उहाँले भन्नुभयो, “महिला दिदीबहिनीहरूलाई देशको ऐन–कानुनबारे विशेष रूपमा शिक्षित बनाउन जरुरी छ। दहेज र घरेलु हिंसाबाट पीडितका लागि कानुन त बनेका छन्, तर ती कानुनहरू स्थानीय तहदेखि माथिल्लो तहसम्म प्रभावकारी रूपमा कार्यान्वयन हुन सकेका छैनन्। यदि यस्ता घटना गराउने व्यक्तिलाई समयमै कानुनअनुसार कारबाही गरिएको भए समाजमा डर र चेतना दुवै पैदा हुन्थ्यो।”

उहाँले थप स्पष्ट पार्दै भन्नुभयो, “दुःखको कुरा, राजनीतिक दबाबकै कारण धेरै पीडित पक्षले न्याय पाउन सकेका छैनन्। त्यसैले तराईका महिलाहरू अझ बढी पीडित बनेका छन्। अब महिला दिदीबहिनीहरू चुप लागेर बस्नु हुँदैन। आफ्नो आवाज बुलन्द गर्दै अधिकार माग्नुपर्छ। हरेक क्षेत्रमा महिलाहरू सबल, सक्षम र सशक्त हुन जरुरी छ। हामी अझ सशक्त कानुन निर्माणतर्फ अगाडि बढ्नेछौँ।”

अन्तर्राष्ट्रिय सम्बन्ध र परराष्ट्र नीतिबारे पत्रकार अर्चना झाले जिज्ञासा राख्दा गुरुङले रास्वपाले राष्ट्रिय स्वाभिमानलाई केन्द्रमा राखेर सबै देशसँग सन्तुलित, सम्मानजनक र हितकारी सम्बन्ध कायम गर्ने बताउनुभयो। उहाँले भन्नुभयो, “सबैभन्दा पहिला, देशको शिर झुकाउने काम म र मेरो पार्टीले कहिल्यै गर्दैन। हामी सबै देशसँग मित्रवत् सम्बन्ध राखेर, राष्ट्रिय हितलाई

प्राथमिकतामा राख्दै काम गर्नेछौँ। पहिलेका सरकारले विभिन्न देशहरूसँग गरेका सम्झौता र समझदारीहरू पनि गम्भीर समीक्षा र छलफलपछि मात्र अगाडि बढाइनेछ। राष्ट्रिय हित विपरीत कुनै पनि निर्णय स्वीकार्य हुँदैन।”

गुरुङले अन्त्यमा भन्नुभयो, “म केवल सांसद बन्नका लागि राजनीतिमा आएको होइन, जनताको आवाजलाई संसद्‌सम्म पुर्याएर सेवा, त्याग र उत्तरदायित्वका साथ काम गर्न आएको हुँ। सरकारी सुविधा होइन, जनहित मेरो प्राथमिकता हो। महिला सशक्तीकरण, सामाजिक विकृतिविरुद्ध कडा कानुन र राष्ट्रिय स्वाभिमानको पक्षमा सधैं दृढ भएर उभिनेछु।”

काठमाडौं । प्रतिनिधिसभा निर्वाचनअन्तर्गत गोरखा १ मा रास्वपाका सुधन गुरुङ बिजयी हुनु भएको छ । गुरुङ ले २९ हजार ८सय ९६ मत सहित बिजयी हुनु भएको छ ।

उहाँका निकटतम नेपाली काग्रेसका प्रेम खत्रीले १५ हजार २ सय ४६ प्राप्त गर्नुभयो ।

यसै गरी इलाम १ बाट कांग्रेसका निश्कल राई १४ हजार ५४३ मत प्राप्त गरेर विजयी हुनु भएको छ । श्रम संस्कृति पार्टीका विनोद नेम्वाङ्ग लिम्बूले १३ हजार ६३२ मत प्राप्त गर्नुभयो ।

अब संखुवासभाको मात्र मतगणना बाकि रहेको छ । मतगणनामा  एमालेका अर्जुनकुमार कार्कीले निरन्तर लिड गरेका छन् । कार्कीले १२७६२ मत ल्याउँदा रास्वपाका मिङ्मा शेर्पाले ११४४० मतले पछ्याइरहेका छन् । कांग्रेसका दिपनकुमार श्रेष्ठको १०४४६ मत छ ।