काठमाडाैँ । स्वास्थ्य तथा खाद्य स्वच्छतामन्त्री निशा मेहताले हाल बजारमा अभाव देखिएका औषधिको आपूर्ति तथा व्यवस्थापनलाई सहज बनाउन निर्देशन दिनुभएको छ ।

औषधि व्यवस्था विभागको अनुगमनपछि उहाँले क्यान्सरलगायत औषधिको अभाव हुन नदिन निर्देशन दिनुभएको हो । उहाँले हालसम्म औषधि आपूर्ति र वितरणको अनुमतिका लागि निवेदन पेस गरेका तर अनुमति नपाएका कम्पनीको स्थलगत निरीक्षण गरी प्रक्रिया अगाडि बढाउन निर्देशन दिनुभयो । साथै, मन्त्री मेहताले विभागको नियमन क्षमता वृद्धि गर्न सहयोग गर्ने प्रतिबद्धता व्यक्त गर्नुभएको छ ।

उहाँले विभागलाई प्रभावकारी बनाउन तत्काल गर्नुपर्ने सुधारका लागि आवश्यक स्रोतसाधन र जनशक्तिको विवरण अविलम्ब पेस गर्न आग्रह निर्देशन दिनुभएको छ ।

मन्त्री मेहताले सरकारबाट निःशुल्क वितरण गरिने औषधि र स्वास्थ्य बीमाअन्तर्गत उपलब्ध गराइने औषधीको गुणस्तर परीक्षणलाई जोड दिने गरी आवश्यक व्यवस्थापन गर्न सम्बद्ध पक्षलाई निर्देशन दिनुभएको छ । विभागका निमित्त महानिर्देशक शिवानी खड्गीले विभागका कामकारबाहीबारे जानकारी गराउनुभएको थियो ।

काठमाडौं । स्वास्थ्य तथा खाद्य स्वच्छता मन्त्री निशा मेहताले आज औषधि व्यवस्था विभाग र राष्ट्रिय औषधि प्रयोगशालाको स्थलगत भ्रमण तथा छलफल गर्दै बजारमा देखिएको औषधि अभाव समाधान, आपूर्ति व्यवस्थापन र गुणस्तर सुधारमा केन्द्रित विभिन्न निर्देशन दिनुभएको छ।

छलफलका क्रममा मन्त्रीले बजारमा हाल देखिएको औषधि अभावलाई सम्बोधन गर्न औषधि आपूर्ति तथा व्यवस्थापनलाई सहज बनाउने प्रक्रिया तत्काल अघि बढाउन निर्देशन दिनुभयो। साथै, औषधि आपूर्ति तथा वितरणको अनुमति लिएर पनि नियमित आपूर्ति नगर्ने आपूर्तिकर्ताहरूलाई नियमनको दायरामा ल्याउने कार्य तत्काल सुरु गर्न आग्रह गर्नुभयो।

त्यस्तै, औषधि आपूर्ति तथा वितरणको अनुमति प्राप्तिका लागि निवेदन र आवश्यक कागजात पेस गरे पनि अनुमति पाउन नसकेका कम्पनीहरूको स्थलगत निरीक्षण तथा आवश्यक जाँचबुझ गरी प्रक्रिया अगाडि बढाउन पनि निर्देशन दिइएको छ।

मन्त्रीले विभागको नियमन क्षमता अभिवृद्धिका लागि आवश्यक सबै प्रकारका तयारी गर्न र औषधि आपूर्ति तथा व्यवस्थापनलाई थप प्रभावकारी तथा गुणस्तरीय बनाउन आवश्यक सुधारका लागि स्रोतसाधन र जनशक्तिसहितको विवरण तत्काल पेस गर्न निर्देशन दिनुभयो।

यसैगरी, नेपाल सरकारबाट निःशुल्क वितरण हुने औषधि तथा स्वास्थ्य बीमा कार्यक्रमअन्तर्गत उपलब्ध गराइने औषधिहरूको गुणस्तर परीक्षणलाई प्राथमिकतामा राखेर आवश्यक व्यवस्थापन गर्न पनि सम्बन्धित निकायलाई निर्देशन दिइएको मन्त्रालयले जनाएको छ।

काठमाडौं । स्वास्थ्य तथा खाद्य स्वच्छता मन्त्रालयले विभिन्न परिषद् तथा स्वास्थ्य संस्थाका पदाधिकारी र सदस्यका लागि प्रकाशित गरिएको आवेदनसम्बन्धी सूचना स्थगित गरेको छ।

मन्त्रालयले जेठ २० गते गोरखापत्र दैनिकमा प्रकाशित सूचना अनुसार विभिन्न परिषद्हरू, बी.पी. कोइराला मेमोरियल क्यान्सर अस्पताल, शहीद गंगालाल राष्ट्रिय हृदय केन्द्र तथा स्वास्थ्य बीमा बोर्डका पदाधिकारी तथा सदस्य पदका लागि माग गरिएको आवेदनसम्बन्धी सूचना विशेष कारणवश अर्को सूचना नआएसम्मका लागि स्थगित गरिएको जनाएको छ।

मन्त्रालयका अनुसार सो सम्बन्धी अर्को सूचना केही दिनमै प्रकाशित गरिनेछ। उक्त जानकारी सम्बन्धित सबै सरोकारवालाहरूको जानकारीका लागि सार्वजनिक गरिएको हो।

काठमाडौं । स्वास्थ्य तथा खाद्य स्वच्छता मन्त्री निशा मेहता र नेपालका लागि मित्रराष्ट्र चीनका राजदूत महामहिम चाङ माउ मिङ्गबीच आज शिष्टाचार भेटघाट भएको छ ।

स्वास्थ्य तथा खाद्य स्वच्छता मन्त्रालयस्थित मन्त्रीको कार्यकक्षमा भएको उक्त भेटमा राजदूत चाङ माउ मिङ्गले मन्त्री मेहतालाई औपचारिक रूपमा शिष्टाचार भेट गरेका हुन् ।

भेटका क्रममा दुई पक्षबीच आपसी सम्बन्ध, सहकार्य तथा स्वास्थ्य क्षेत्रसँग सम्बन्धित विषयमा सामान्य छलफल भएको मन्त्रालय स्रोतले जनाएको छ । भेट सौहार्दपूर्ण वातावरणमा सम्पन्न भएको बताइएको छ ।