काठमाडौं । महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालयले मन्त्रालयमा सेवा लिन आउने सेवाग्राहीको सहज पहुँच सुनिश्चित गर्न आजदेखि ह्वीलचेयर सेवा सञ्चालनमा ल्याएको छ।

मन्त्रालयले शारीरिक रूपमा हिँडडुल गर्न कठिनाइ भएका व्यक्ति, अपाङ्गता भएका व्यक्ति, ज्येष्ठ नागरिक तथा आवश्यकताअनुसार अन्य सेवाग्राहीलाई लक्षित गर्दै मन्त्रालय परिसरभर ह्वीलचेयर सेवा उपलब्ध गराएको जनाएको छ।

सेवाग्राहीलाई सहज, सुरक्षित र सम्मानजनक वातावरणमा सेवा प्रदान गर्ने उद्देश्यले सुरु गरिएको यस सेवाले सार्वजनिक सेवा प्रवाहलाई थप पहुँचयुक्त, समावेशी र नागरिकमैत्री बनाउन सहयोग पुग्ने मन्त्रालयको विश्वास छ।

यस व्यवस्थासँगै मन्त्रालयमा आउने सेवाग्राहीले आवश्यकता अनुसार ह्वीलचेयर प्रयोग गरी सहज रूपमा आफ्नो कामकाज सम्पन्न गर्न सक्नेछन्। विशेषगरी अपाङ्गता भएका व्यक्ति तथा शारीरिक रूपमा असहजता भएका नागरिकको सेवा पहुँचमा यसले महत्वपूर्ण सहयोग पुर्‍याउने अपेक्षा गरिएको छ।

समावेशी शासन, समान पहुँच र नागरिकमैत्री सेवा प्रवाहप्रति सरकारको प्रतिबद्धताअनुरूप मन्त्रालयले यो पहल अघि बढाएको जनाएको छ। साथै, आगामी दिनमा पनि सेवाग्राहीको आवश्यकता र सुविधालाई केन्द्रमा राखेर सेवा प्रवाहलाई थप प्रभावकारी र पहुँचयुक्त बनाउने कार्यक्रम सञ्चालन गर्दै जाने मन्त्रालयले जनाएको छ।