कवि शंकर अर्यालको कविता:  'देश दुखेको चिन्ता'

  

नेपाल  राष्ट्र हो हाम्रो
पुर्खाको यो धरोहर
यसलाई बचाएर
सन्ततिलाइ छाड्नु छ ।।

नेपाल राष्ट्रका लागि
हाम्रा ती वीर पुर्खाको
धेरै रगत बगेको छ
बुझौँ हामी नेपाली हो ।।

आफ्ना सन्ततीलाई
हुर्काउन बढाउन
दशनंग्रा खियाएर
धेरै गरे परिश्रम ।।

मानवीय जीवन जिउन
धर्म कर्म बचाउन
शान साथ लडे युद्ध
वैरीलाइ हराउन ।।

देश नेपाल हो हाम्रो
शान र मान पनि हो
हाम्रो जीवनको आधार
मातृभूमि यहि नै हो ।।

हामीले नलिउँ हल्का
सस्ता र स्वार्थी भावना
स्वराष्ट्र र धर्म प्रति
होस् सधैं उच्च भावना ।।

देश विना कति दुख
पाएका छन् हामी हेरौँ
सुशासनको अभावमा
देश बिग्रिएको बुझौँ ।।

त्यसैले युवा जनशक्ति 
देश बचाउन आउ
राजनीति र विकासको
जिम्मा लिन चाँडै आऊ ।।