देश र दशैं

  

निधारभरी जुन टिका लाएर घरबाहिर निस्किदा
म आफूलाई संसारै जित्ने भाग्यमानी ठान्दथें !

अचेल त्यही टिका देखेर 
मानिसहरु सोध्दछन्, 

ह्वाट् ह्यापेन्ड माई फ्रेण्ड ? 
प्लिज कल नाइन वानवान, इफ यू आर ह्याभिङ एनि प्रोब्लम्स !

र, टिका टिकाजस्तो रहेन !
अनि जीवन ?

जीवन पनि त्यस्तै !

जब दशैं सम्झिन्छु र देश
जब म जीवन सम्झिन्छु र परिवेश

आगो आफै डढेको जस्तो लाग्छ
खरानी आफै खरानी भएजस्तो लाग्छ
मन आफै अमनजस्तो 

टुक्राटुक्रा पारेर भाग लगाउँछु बितेका पलहरु
र तिनको वरिपरि बसेर सपनाहरुलाइ खान्की बाँड्छु 
अनि सम्झिन्छु देश र दशैं
यस्तो लाग्छ
जिन्दगीमा पाउनु, थुपार्नु वा हाँसिल गर्नु भनेको 
जम्माजम्मी मन रहेछ, 
जम्माजम्मी नाटक रहेछ 
हे भाई, हिँड्, फर्की तेरो आप्mनै गुँड
जहाँ केही पनि नकमाईकन कमाई छ
जहाँ केही पनि नहारिकन जित छ
जहाँ छ जीवित जीवन
जहाँ देश छ र दशैं छ