ट्रम्पले अन्ततः हार स्वीकारे, संसदद्वारा बाइडेन राष्ट्रपति भएको घोषणा

  


वासिङटनः लामो रस्साकस्सी र हिंसा पश्चात अमेरिकी राष्ट्रपति डोनाल्ड ट्रम्पले अन्ततः गत नोभेम्बरको चुनावमा आफू पराजित भएको स्वीकारेका छन् ।

अमेरिकी संसदको संयुक्त सदनले डेमोक्रेटिक उम्मेदवार जो बाइडेन ३०६–२३२ इलेक्टोरल मतका आधारमा विजयी भएको घोषणा गरेसँगै आफू सहज सत्ता हस्तान्तरणका लागि तयार रहेको बताउनु भएको छ ।

उपराष्ट्रपति माइक पेन्सले बाइडेनले ३०६ इलेक्टोरल मत ल्याएर राष्ट्रपतिमा विजयी हुनुभएको भन्दै इलेक्टोरल मतलाई प्रमाणीकरण गर्नु भएको थियो ।
अब बाइडेनले जनवरी २० मा औपचारिक समारोहका साथ राष्ट्रपति पदको सपथ लिनु हुनेछ ।

संसदको संयुक्त सदनको कारबाही बुधबार अपराह्न सकिनु पर्ने भएपनि ट्रम्पका समर्थकले संसद भवनमा आक्रमण गरी संसदीय कारबाहीलाई अबरुद्ध पारेका थिए । तर साँझ पुनः शुरु भएको बैठकले बाइडेनको विजयी सुनिश्चित गरेको हो ।

अमेरिकी इतिहासमा पहिलो पटक भएको र लोकतन्त्रकै उपहास गरेको ठानिएको यस वर्षको राष्ट्रपति चुनावले विश्वभर नयाँ तरंग प्रवाह गरेको छ भने अमेरिकी समाज नै विभक्त भएको छ ।

राष्ट्रपति ट्रम्पका अराजक गतिविधि एवं चुनावमा धाँधली भयो भन्ने निरन्तरको आक्रोश बाइडेनको विजय भएको घोषणासँगै समाप्त भएको छ, तर लोकतन्त्रमाथि लागेको घाउ केही वर्षसम्म मत्थर हुने देखिन्न ।

अमेरिकी लोकतन्त्रलाई विश्वमै अनुकरणीय मान्ने गरिए पनि त्यो अवस्थामा ठूलो क्षति पुगेको छ । यसको घाउ निको बनाउन र मल्हमट्टी लगाउन कैयौं वर्ष लाग्नेछ ।