फेरि चम्किए प्रबल, अमेरिकी उपराष्ट्रपति ह्यारिसले लगाइन् प्रबलले डिजाइन गरेको ड्रेस

  

काठमाडौंः अमेरिकी उपराष्ट्रपति कमला ह्यारिसका लागि ड्रेस डिजाइन गरेर नेपाली मुलका अमेरिकी नागरिक प्रबल गुरुङ फेसन डिजाइनको दुनियाँमा फेरि चर्चामा आएका छन् ।

प्रबलले डिजाइन गरेको ड्रेस लगाएर ह्यारिसले उपराष्ट्रपति पदको सपथ लिएकी छिन् । राष्ट्रपति जो बाइडेन र उपराष्ट्रपति ह्यारिसले सपथ ग्रहणकाे विशेष समारोहमा राष्ट्रपति र उपराष्ट्रपति पदको सपथ लिएका थिए ।

ह्यारिसले समारोहमा प्रबलले डिजाइन गरेको कलेजी रंगको ड्रेस लगाएकी थिइन् । पर्पल कलरका कपडा लगाउने प्रचलन अमेरिकी राष्ट्रपति जर्ज वासिङटनको सपथ समारोहदेखि शुरु भएको हो । ह्यारिसले भने पर्पल कलर मिश्रित कलेजी (बेरी) रंगको ड्रेस लगाएकी थिइन् ।

यो रंगमा ह्यारिसको प्रतिभा अझ खुलेको अमेरिकी अखबार इल्लीले लेखेको छ ।

प्रबलले यसअघि पनि ह्यारिसका लागि ड्रेस डिजाइन गर्ने गरका थिए । दक्षिण एसियाली मुलकी भएकीले पनि ह्यारिस र प्रबलको सम्बन्ध विगतदेखि नै निकट रहेको अमेरिकी अखबारहरुले लेखेका छन् ।

हुनत, अमेरिकाका सम्भ्रान्त र चर्चित महिलाका लागि ड्रेस डिजाइन गरिसकेका प्रबलका लागि यो कुनै नयाँ घटना भने होइन । अमेरिकी राष्ट्रपति बाराक ओबामाकी पत्नी मिसेल ओबामा र अमेरिकी कलाकार ओपराह त उनका फ्यान नै हुन् ।  

सन् २०१९ मा १०औं वर्षगाँठको अवसरमा प्रबलले “को अमेरिकी हो ?” भन्दै अनौठो प्रश्न पनि गरेका थिए । उनले त्यस अवसरमा पूर्व राष्ट्रपति डोनाल्ड ट्रम्पले अमेरिकीबीच ल्याएको फाटोमाथि व्यङ्ग्य पनि गरेका थिए ।

सिंगापुरमा जन्मेर काठमाडौंमा हुर्के बढेका र अहिले न्यूयोर्कलाई कर्मथलो बनाएका प्रबल अमेरिकी सपना (अमेरिकन ड्रिम) को खोजीमै छन् । ह्यारिसले आफूले डिजाइन गरेको ड्रेस लगाएको देखेर आफू भावुक र गौरवान्वित भएको इल्ली अखबारलाई बताएका छन् ।

नेपालका लागि अमेरिकी राजदूत र्यान्डी बेरीले पनि प्रबललाइ झण्डै एक वर्षअघि नेपालस्थित अमेरिकी दूतावासमा भेटेकाे बताउँदै प्रबलले डिजाइन गरेकाे ड्रेसमा उपराष्ट्रपति ह्यारिस अझै राम्री र उत्कृष्ट देखिनु भएकाे प्रतिकृया दिनु भएकाे छ ।