भाले टाईम

  

म, ग्लोबल भिलेजकी आईमाई 
रातो गुलाबले पुलकित भएदेखि नै
भालेहरुले सडक तताएर युद्धको शंखनाद गरिरहँदा,
सिउँदो पुछिएका र काख रित्तिएका कयौं आमाहरुलाई
फिटिक्कै अनुस्मृति गर्न नसक्ने संवेदनहीन भएकी छु ।

म, फेमिनिजमको वकालत गर्ने आईमाई !
रातो गुलाबले आफू मातिएपछि 
भालेहरुले दिनदहाडै बलात्कार र हत्या गरिरहँदा
न्यायको होईन तर, राजनीतिक ऐजेण्डाको ब्यानरलाई
स्वेच्छाले उठाउँने एक बौद्धिक अपाङ्ग भएकी छु ।

म, स्मार्टफोन बोकेर हिड्ने आईमाई !
रातो गुलाबको चंगुलभित्र परेपछि
भालेहरुले खुलेआम करोडौंको भ्रष्टाचार गरिरहँदा  
नापेर पेट भर्ने अनगिन्ती टाउकाहरुको भोको दृष्यलाई
औचित्यरहित संझने दृष्टिकोणहीन  भएकी छु ।

म, आफ्नै धरातल बिर्सिएकी आईमाई !
रातो गुलाबको खोक्रो आकर्षण र,
भाले टाईमको प्रेमास्पद नाटकबाट 
अविलम्ब छुटकारा पाउॅन चाहन्छु
खोई ? कहिले आउँछ मेरो मस्तिष्क हल्लाईदिने  
एउटा सिंगो युगको नविन वैचारिक कम्पन ?