४२ दिनमा प्रदीप खड्का अभिनित ‘प्रकाश’को सुटिङ सकियो

  

 काठमाडौं । सरकारले बिहिबारदेखि निषेधाज्ञा घोषणा गरेपछि नेपाली फिल्मका सुटिङ प्रभावित भएका छन् । राजधानीभन्दा बाहिर छायांकन भइरहेका फिल्मको अधुरैमा सुटिङ रोकेर निर्माण टिम काठमाडौं फर्किन थालेका छन् । 

यता अभिनेता प्रदीप खड्का अभिनित फिल्म ‘प्रकाश’ को टिम भने सम्पूर्ण छायांकन सकेर जुम्लाबाट काठमाडौं फिर्ता भएको छ । 
 
छायांकन सुरु भएको ४२ दिनमा फिल्मको सुटिङ सकाइएको छ । फिल्मको सम्पूर्ण छायांकन जुम्लामा गरिएको हो । फिल्ममा प्रदीपको अपोजिटमा रेनु योगी छिन् । रेनुले यही फिल्मबाट अभिनेत्रीको रुपमा डेब्यू गर्दैछिन् ।

फिल्ममा यी दुईबाहेक दीया मास्के, प्रकाश घिमिरे, राजन खतिवडा, रामबाबु रेग्मी, निरज पन्थी, हुम विसी लगायतको पनि अभिनय रहनेछ । फिल्मले निम्न वर्गीय परिवारमा हुर्किएको एक युवकले सरकारी स्कूलको शिक्षक बन्न गर्ने संघर्षको कथा प्रस्तुत गर्नेछ । फिल्ममा प्रदीप पहिलो पटक गाउँले युवकको रुपमा देखा पर्दैछन् । 
 
विनिश इन्टरटेनमेन्टको ब्यानरमा बनेको फिल्ममा महेन्द्र अधिकारीको लगानी रहेको छ । राजेश श्रेष्ठले खिचेको फिल्मको कथा विकास सुवेदीले लेखेका हुन् ।