इन्डोनेसियामा ११ जना विद्यार्थीको नदीमा डुबेर मृत्यु

  

जकार्ताः इन्डोनेसियाको पश्चिमी जाभा प्रान्तमा एउटा नदी सफा गर्ने क्रममा एक विद्यालयका ११ जना विद्यार्थीहरुको डुबेर मृत्यु भएको छ । स्थानीय अधिकारीहरुका अनुसार अरु १० जना विद्यार्थीलाई भने जीवितै उद्धार गरिएको छ ।

स्थानीय अधिकारीहरुका अनुसार एक इस्लामिक जूनियर हाई स्कूलका १५० विद्यार्थीहरु शुक्रबार सिलिओर नदीको किनारमा सफाईमा भाग लिइरहेका थिए । सफाईमा सहभागी ती विद्यार्थीमध्ये २१ जना नदीमा खसेका थिए ।

बानडुड खोज र उद्धार कार्यालयका प्रमुख डेडेन रिदवंस्याहले मौसम राम्रो रहेको र त्यहाँ बाढी पनि नआएको जानकारी दिए । नदीमा पसेका ती बालबालिकाले एकअर्काका हात समातेको पनि डेडेनले बताए ।

नजिकैका बासिन्दा र एक उद्धार टोलीले १० जना विद्यार्थीहरुलाई बचाउन सफल भएका थिए ।  उनीहरुलाई उपचारका लागि नजिकैको अस्पताल पठाइएको थियो । एपी