ढल्यो एमालेको अर्को प्रदेश सरकार

  

काठमाडौं। वाग्मती प्रदेशकी मुख्यमन्त्री अष्टलक्ष्मी शाक्यले पदबाट राजीनामा दिनुभएको छ । 

योसँगै वागमती प्रदेशमा नेकपा एमालेको सरकार ढलेको छ । शाक्य ७१ दिनसम्म मुख्यमन्त्री रहनुभयो । 

विपक्षी गठबन्धनमा बहुमत भएसँगै एमालेले वाग्मती प्रदेश सरकारको सत्ता गुमाएको हो ।

शाक्यको राजीनामासँगै वाग्मती प्रदेशमा गठबन्धनबीच बाँकी रहेको कार्यकाल पहिलो आधा समय नेकपा (एकीकृत समाजवादी) र त्यसपछि नेपाली कांग्रेसले सम्हाल्ने सहमति भइसकेको छ ।

पहिलो कार्यकालका लागि नेकपा एकिकृत समाजवादीका संसदीय दलका नेता राजेन्द्र पाण्डे मुख्यमन्त्री बन्ने भएका छन् ।

प्रतिनिधि सभाको सबभन्दा ठूलो दल एमालेले प्रदेशमा एकपछि अर्को सरकार गुमाउँदै गएको छ । 

२०७४ सालको आम निर्वाचनपछि संघसहित चारवटा प्रदेशमा सरकारको नेतृत्व गरेको एमाले अब प्रदेशको एउटा सरकारमा समिति बनेको हो । 

अब नेकपा एमालेसँग प्रदेश १ को सरकार मात्र बाँकी छ । प्रदेश १ का मुख्यमन्त्री भीम आचार्य पनि अल्पमतमा परिसकेका छन् । आचार्यले कात्तिक १५ मा विश्वासको मत लिँदैछन् । 

२०७४ सालको चुनावमा सबभन्दा ठूलो दल रहेको एमालेले केन्द्रसहित प्रदेश १, वाग्मती, गण्डकी र लुम्बिनीमा सरकारको नेतृत्व गरेको थियो । नेकपा एकता भंग तथा पार्टी विभाजनपछि एमालेको एकपछि अर्को गर्दै सरकार ढल्दै गएको छ  ।