रसियाको तास न्यूज एजेन्सीले अन्तरिक्षमा कार्यालय खोल्ने

  

तस्वीरः सिन्ह्वा न्यूज एजेन्सी

मस्कोः रसियाको अग्रणी तास न्यूज एजेन्सीले अन्तर्राष्ट्रिय अन्तरिक्ष केन्द्र (आइएसएस) मा स्थायी प्रतिनिधि राख्ने गरी रसियाको अन्तरिक्ष नियामक निकाय रस्कोमोससँग एउटा समझदारी सम्झौता गरेको छ ।

रस्कोमोसका प्रमुख डिमिट्री रोगोजिनसँग सम्झौतामा हस्ताक्षर गरेपछि तास न्यूज एजेन्सीका प्रमुख सर्गेई मिखाइलोभले भन्नुभयो, “अन्तरिक्षमा पहिलो संवाददाताका रुपमा रस्कोसमोसका अन्तरिक्षयात्री अलेक्जान्डर मिसुरकिन हुनु हुनेछ । उहाँ रसियाकै हिरो पनि हुनुहुन्छ ।”

मिसुरकिन आगामी डिसेम्बर ८ मा आइएसएसका लागि कजाकस्थानको बाइकोनुर कस्मोड्रोमबाट प्रस्थान गर्ने कार्यक्रम छ । मिसुरकिनका साथ एक जना जापानी अर्बपति र उनका व्यावसायिक साथी हुनेछन् । सोयुज एमएस–२० बाट हुने यो व्यावसायिक उडान हो ।

तास एजेन्सीका प्रमुख मिखाइलोभले अन्तरिक्ष यात्री मिसुरकिनले समाचारका साथै अन्तरिक्षबाट लिइने विशेष फोटो एवं भिडियो उपलब्ध गराउने जानकारी दिनुभयो ।

हुनत, रसियाली अन्तरिक्ष यात्रीहरुले अन्तरिक्षसँग सम्बन्धित फोटोहरु खिच्ने गरेका छन् तर न्यूज एजेन्सीका लागि यो अपूर्व अवसर हुनेछ ।    सिन्ह्वा न्यूज एजेन्सी