न्यायपालिकाको समस्या समाधान गर्न सर्वदलीय बैठकबाट उपाय खोज्नुपर्छ : सभामुख सापकोटा (भिडियो सहित)

  

काठमाडौँ । सभामुख अग्निप्रसाद सापकोटाले न्यायालयमा देखिएको समस्या समाधानका लागि नयाँ धारणा बनाएर अघि बढ्ने बताउनु भएको छ । 

बिहीबार अन्तर व्यवस्थापिका संघ (आईपीयू) को १४३ औँ सम्मेलनमा सहभागी भइ स्वदेश फर्किनुभएका सभामुख सापकोटाले न्यायालयमा देखिएको समस्या समाधानका लागि नयाँ धारणा बनाएर अघि बढ्ने बताउनु भएको हो । 

उहाँले सम्मेलनमा राष्ट्रिय राजनीतिको विषयमा सामान्य जानकार रहेको बताउँदै अब संसद र न्यायपालिकाको समस्या समाधान गर्नका लागि सर्वदलीय बैठक बोलाएर उपाय खोज्ने बताउनु भयो । सभामुख सापकोटाले सम्मेलनमा नेपालमा संविधान जारी भएपछि लोकतान्त्रिक कुरा, समानुपातिक समावेशी सिद्धान्तका  कुरा, सबै आयामहरुलाई समेटेका कुरा, एक तिहाई केन्द्रमा, ४१ प्रतिशत भन्दा बढी महिलाहरु प्रदेशसभामा रहेका कुराहरुको उल्लेख गर्दै र त्यसमा पनि लोकतान्त्रिक अभ्यासलाई जीवन्त र जनमुखि बनाउनु पर्छ भन्ने कुरामा जोड दिएको बताउनु भयो ।    

सभामुख सापकोटाले भन्नुभयो, ‘जहाँसम्म यहाँको कुरा छ, अहिले म यहाँ आउँदैछु, यी संलग्न कुरामा म जानुभन्दा पहिला नेपाल बारले मलाई ध्यानाकर्षण पत्र बुझाएको थियो । हामी त्यहाँ यसरी केन्द्रित भयौँ, देशको प्रतिनिधित्व गर्नुपर्ने भएकोले देशको बारेमा सकेसम्म धेरै कुराहरु स्थापित गर्न हामीले कोशिस गर्नुपर्ने भएकोले ती केन्द्रित रहियो, राष्ट्रिय राजनीतिको बारेमा सामान्य त थाहा हुने नै भयो, म जानकारीमा छु, तर फेरि कसरी पहल कदमी लिने, धारणा कसरी बनाएर अगाडि जाने भन्ने कुरामा यहाँ आएपछि नै मैले सोचेको छु । संसदको कुरा पनि म भर्खर आउँदैछु आएपछि सर्वदलीय बैठक अरु बैठक केके हुन्छ, उपाय खोज्नको लागि अब म यसमा नै केन्द्रित हुनेछु ।’

सभामुख सापकोटाले नेपाल र विश्वमा नै अहिलेको चुनौति भनेको सबैलाई समेटेर लैजानुपर्ने कुरा रहेको बताउनुभयो । उहाँले आदीवासी, जनजाती, सिमान्तकृत जनसमुदायहरु लोकतन्त्रमा विभाजित हुनु भनेको न्यायप्रणालीमा कमजोर हुनु रहेको बताउनु भयो । सभामुख सापकोटाले सम्मेलनमा प्रविधि र सञ्चारको विकास राम्रो भएपनि कहिलेकाहीँ तथ्यहीन प्रचारका कारण राजनीतिक पार्टीहरुप्रति विश्वास कमजोर बन्दै गएको र पार्टीका आन्तरिक लोकतान्त्रिक अभ्यास गर्ने कुरामा कमजोरी रहेको लागयतका विषयमा छलफल भएको बताउनु भयो । अन्तर व्यवस्थापिका संघ (आईपीयू) को १४३ औँ सम्मेलनमा सहभागी हुन सभामुख सापकोटा मंसिर ८ गते स्पेनको म्याड्रिड जानुभएको थियो ।