काठमाडौँ । काठमाडौँ महानगरपालिकाको प्रमुख पदमा स्वतन्त्र उम्मेदवार बालेन्द्र साह (बालेन) को जीत सुनिश्चित भएको छ । अब तीन वटा मात्र वडाको मत गणना बाँकी हुँदै ती वडामा खेसको मत संख्याभन्दा बढीले बालेनले आफ्ना प्रतिस्पर्धीलाई उछिनिसकेकाले उनको जीत सुनिश्चित भएको हो ।
सम्भवतः आजै ती तीनै वटा वडाको मत गणना सम्पन्न भएपछि बालेन विजयी भएको घोषणा हुनसक्छ । उनलाई विजयी घोषणा हुनुबित्तिकै समर्थकहरुले विशाल र्याली आयोजना गर्ने तयारी गरेका छन् । मतगणना भएका स्थल राष्ट्रिय सभागृहबाट र्याली सुरु गर्ने र महानगरका थुप्रै स्थानमा परिक्रमा गर्ने बताइएको छ ।
बालेनको पक्षमा सक्रियरुपमा लागेका पूर्वसचिव भीम उपाध्यायले बालेनको समर्थनमा निस्किने र्याल सभागृहबाट भद्रकाली, शहीदगेट हुँदै त्रिपुरेश्वर र कलंकीसम्म पुग्ने बताएका छन् ।
उपाध्यायले फेसबुकमा लेखेअनुसार कलंकीबाट स्वयम्भू, बालाजु, महाराजगञ्ज, चाबहिल, गौशाल, एयरपोर्ट, सिनामंगल, पुरानो बानेश्वर, मैतिदेवी, पुतलीसडक, बागबजार हुँदै खुलामञ्चमा आएर र्याली समापन गरिने छ ।
यद्यपि हिजो बुधबार आफ्नो जीत सुनिश्चित भएपछि बालेनले फेसबुकमार्फत विजय जुलुस नगर्न र आफू रहेकै ठाउँबाट धन्यवाद र्याली गर्न आग्रह गरेका थिए । त्यसैले बालेनका समर्थकहरुले र्यालीलाई धन्यवाद र्याली नाम दिएका छन् । समर्थकहरुले र्याली सभ्य र अनुशासित हुने तथा कसैको विरोध नगरिने बताएका छन् ।
