जनकपुरधाम । जनता समाजवादी पार्टी (जसपा) का अध्यक्ष उपेन्द्र यादवले लोकतान्त्रिक समाजवादी पार्टी (लोसपा) पाँच दलीय सत्ता गठबन्धनमा सहभागी भए स्वागत गर्ने बताएका छन् ।
जनकपुरमा बुधबार आयोजित पत्रकार सम्मेलनमा उनले लोसपालाई पाँच दलीय गठबन्धनमा स्वागत गर्न आफूहरु खुला रहेको बताए । प्रधानमन्त्री शेरबहादुर देउवाले सत्ता गठबन्धनमा सहभागी गराउन लोसपाका नेताहरुसँग छलफल अगाडि बढाइरहनुभएको छ ।
मधेशको मत बाँडिदा मधेशलाई नै नोक्सान हुने भन्दै अध्यक्ष यादवले वर्तमान अवस्थामा फुटेर नभई जुटेर अगाडि बढ्नुपर्ने आवश्यकता रहेको बताए । यद्यपि अब हिजोको गल्ती सच्याएर बढ्नुपर्ने उनको भनाइ थियो । मंगलबार जनकपुरमै आयोजित एक कार्यक्रममा उनले लोसपाका नेताहरुलाई एकतामा आउन आह्वान गरेका थिए ।
नाफा घाटाको हिसाब नहेरी पाँच दलीय सत्ता गठबन्धन आगामी प्रदेश र संघीय निर्वाचनसम्म कायम रहनुपर्ने उनको भनाइ थियो ।
