काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले पार्टी उपमहासचिव पद अस्वीकार गरेका नेता जनार्दन शर्मालाई पार्टी नेताहरुको रक्षा गर्न र हुर्काउन आफूले मुख्य भूमिका निर्वाह गरेको बताउनुभएको छ ।
बुधबार अनेरास्ववियु क्रान्तिकारी फोर्सको कार्यक्रममा उहाँले आफूले पार्टीमा राम्रो उत्तराधिकारी तयार होउन् भन्ने चाहेको भन्दै अबको आफ्नो सपना पार्टीमा राम्रो उत्तराधिकारी तयार बनुन् भन्ने रहेको बताउनुभयो ।
सोही कार्यक्रममा नेता शर्माले आफू कार्यक्रममा उपमहासचिवको हैसियतले नभई संगठन विभाग प्रमुखका हैसियतमा उपस्थित भएको बताएका थिए ।
उनले आफू अध्यक्ष प्रचण्डको सबैभन्दा कडा आलोचक र सबैभन्दा ठूलो रक्षकसमेत भएको बताएका थिए ।
जवाफमा अध्यक्ष प्रचण्डले जनार्दनले नीति र नेतृत्वको रक्षाको कुरा गरेको उल्लेख गर्दै नेता शर्मालाई रक्षा गर्न र हुर्काउन आफ्नो पनि भूमिका रहेको बताउनुभयो ।
