काठमाडौँ । पूर्वराजा ज्ञानेन्द्र शाहले बेलायतकी महारानी एलिजाबेथ द्वितीयाको निधनप्रति दुःख व्यक्त गर्नुभएको छ ।
पूर्वराजा ज्ञानेन्द्रले आज एक शोक संदेश प्रकाशित गर्दै स्वर्गीय महारानी राजगद्दीमा ७ दशक अवधि विराज भएर उहाँले शालीन र उच्च राजकीय मूल्य निर्वाह गरेको कुरा सदा स्मरणीय छ भन्नुभएको छ ।
उहाँले नेपालप्रति स्वर्गीय महारानीको अगाध आत्मीयता सदा उल्लेख्य रहेको भन्दै नेपाल र बेलायतबीच दुई शताब्दीभन्दा बढी समयदेखि स्थापित भएको दौत्य सम्बन्धको स्मरण गर्नुभएको छ । साथै उहाँले विभिन्न भ्रमणका अवसरमा स्वर्गीय महारानीसँगको भेटवार्तालाई गहनतम प्राथमिकता दिनुभएको छ ।
पूर्वराजा ज्ञानेन्द्रले स्वर्गीय महारानीप्रति श्रद्धाञ्जलि प्रकट गर्दै शोक सन्तप्त राजपरिवार, बेलायती सरकार एवं बेलायती जनताप्रति हार्दिक समवेदन प्रकट गर्नुभएको छ ।
