काठमाडौं । संचारकर्मी रूपा सुनारले शिक्षा मन्त्री कृष्णगोपाल श्रेष्ठविरूद्ध सर्वोच्च अदालतमा रिट दर्ता गराएकी छन् ।
उनले आइतबार दर्ता गराएको रिटमा जातीय भेदभाव तथा छुवाछुत कसुरको कसुरदारलाई कानुन अनुसार कारबाहीको माग गरेकी छन् ।
संविधान र कानुनले बर्जित जातीय भेदभाव तथा छुवाछूत जस्तो गम्भीर मुद्दाको अपराध अनुसन्धानलाई प्रभावित गरि अदालतबाट म्याद थप भइ अनुसन्धानमा रहेका विपक्षीलाई पदीय ओहदा र सरकारीपद तथा स्रोत समेतको दुरूपयोग गरी प्रहरी कार्यालयमै पुगेर अनुसन्धान प्रभावित पारेको आरोप रिटमा उल्लेख छ ।
यस्तै उनले मन्त्री श्रेष्ठलाई कारबारी गर्दै प्रहरीमा दिएको जाहेरी तत्काल दर्ता गराइ पाउँ भनी उल्लेख गरेकी छन् ।
थरकै कारण कोठा नदिएको भन्दै उनले बबरमहलकी घरबेटी सरस्वती प्रधान विरूद्ध प्रहरी कार्यालयमा जाहेरी दिएकी थिइन् । जाहेरी पछि प्रधान पक्राउ परेकी थिइन् ।
पक्राउ परेकी प्रधानलाई प्रहरीले तीन दिन हिरासतमा राखेर अनुसन्धान गरेको थियो। अनुसन्धान सकाएर प्रहरीले जिल्ला सरकारी वकिल कार्यालय बुझाएको थियो ।
घरबेटी प्रधान श्रीमान मुकुन्दको रोहबरमा जमानतमा छुटेका बेला शिक्षा मन्त्री श्रेष्ठ उनलाई लिन महानगरीय प्रहरी वृत्त सिंहदरबार पुगेका थिए ।
