काठमाडौँ । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले आफ्नो जेल जीवनको अनुभव युट्युबमा सार्वजनिक गरेका छन् ।
‘केपी बा युटुब च्यानल’ मा उनको संस्मरणको दोस्रो भाग आज अपलोड गरिएको हो । ‘मेरो जेल अनुभव र नयाँ पुस्ता’ शीर्षकको २९ मिनेट लामो भिडियोमा ओलीले आफ्नो जेल जीवनको अनुभव सुनाएका छन् ।
यसअघि अध्यक्ष ओलीको ७१ औं जन्मदिनको अवसरमा उक्त भिडिओ च्यानल सुरु गरिएको थियो । पहिलो भागमा ‘ती तीन मृत्यु, जसले मलाई छोएर गए’ शीर्षकमा उनले मृत्युबाट संयोगवश बाँचेका घटनाहरु प्रस्तुत गरेका थिए ।
विचार र वाक् स्वतन्त्रतामा बन्देज रहेको र दलहरुमाथि प्रतिबन्ध रहेको निरंकुश पञ्चायती व्यवस्थाको कठोर कालखण्डमा राज्यविरुद्धको अपराधको झटा मुद्दा लगाएर ओलीलाई १४ वर्ष कारावास राखिएको थियो । १४ वर्षको जेल जीवनमध्ये ४ वर्षसम्म ओलीले गोलघरमा बिताएका थिए ।
