काठमाडौं । नेपालले फिफा विश्वकप – २०२२ तथा एसियन कप – २०२३ अन्तर्गत दोस्रो चरणको छनोटमा आज (सोमबार) जोर्डनसँग प्रतिस्पर्धा गर्दैछ ।
कुवेत सिटीस्थित जाबेर अल अहमद अन्तराष्ट्रिय स्टेडियममा खेल राति ९ः४५ बजे सुरु हुनेछ ।
नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताईरीले टिमको प्रमुख लक्ष्य जित निकाल्नु रहेको बताएका छन् ।
यसअघिको खेलमा चाईनिज ताईपेलाई २-० ले पराजित गरेको नेपाल उच्च मनोबलका साथ मैदान उत्रने उनको विश्वास छ ।
यस्तै जोर्डन पनि नेपाललाई हराएर विश्वकपमा छनोट हुने आशा जीवित राख्न चाहन्छ ।
छनोटको समूह 'बी' मा रहेको नेपालले ६ खेलमा ६ अंक जोडेको छ । नेपाल तालिकाको चौंथो स्थानमा रहेको छ । जोर्डन ५ खेलमा १० अंक जोडेर तेस्रो स्थानमा रहेको छ ।
नेपालले विश्वकप छनोटको तेस्रो चरणमा पुग्ने मौका गुमाईसकेको छ । तर नेपाललाई बाँकी खेलमा जित निकाल्दै एसियन कप छनोटको तेस्रो चरणमा स्थान बनाउने अवसर रहेको छ ।
फिफा वरियतामा जोडर्न ९५ औं स्थानमा छ भने नेपाल १७१ औं स्थानमा छ ।
