एजेन्सी । भारतको ब्लकबस्टर फिल्म आरआरआरको सिक्वेल आरआरआर २ मा काम सुरु भएको छ । हालै, फिल्म आरआरआरका पटकथा लेखक र निर्देशक एसएस राजामौलीका पिता विजयेन्द्र प्रसादले आरआरआरको आगामी सिक्वेलको बारेमा जानकारी दिए ।
उनले फिल्मको काम पाइपलाइनमा रहेको बताए । यस पटक पनि आरआरआर २ मा राम चरण र जुनियर एनटीआर मुख्य भूमिकामा देखिनेछन् ।
पटकथा लेखक विजयेन्द्र प्रसादले एसएस राजामौली फिल्मको सिक्वेलको निर्देशक नहुने बताए । यद्यपि, राजामौली अझै पनि पर्यवेक्षकको भूमिकामा परियोजनामा संलग्न हुनेछन् । उनले फिल्मको सिक्वेलको कथा पहिलो फिल्मसँग सीधै सम्बन्धित नहुने पनि बताए । तर, यसपटक पनि फिल्मको कथा ब्रिटिश राज र भारतको स्वतन्त्रता संग्रामसँग जोडिएको हुनसक्छ ।
रामचरण र जुनियर एनटीआर बाहेक अजय देवगन, श्रिया सरन र आलिया भट्टले पनि फिल्म आरआरआरमा काम गरेका थिए । गत वर्ष मार्चमा रिलिज भएको यो फिल्मले विश्वभर बक्स अफिसमा करिब १३ सय करोड कमाएको थियो । फिल्मको लोकप्रिय डान्स नम्बर नाटु नाटुले उत्कृष्ट मौलिक गीतको विधामा ओस्कार अवार्ड पनि प्राप्त गर्यो ।
