काठमाडौँ । अमेरिकी परियोजना मिलेनियम च्यालेन्ज कर्पोरेसन (एमसीसी) की प्रमुख कार्यकारी अधिकृत (सीईओ) एलिस अलब्राइट पाँच दिने नेपाल भ्रमणका क्रममा आइतबार काठमाडौं आउँदै हुनुहुन्छ ।
नेपाल र अमेरिकी सरकारबीच एमसीसी सम्झौतामा छ वर्ष अघि हस्ताक्षर भएको थियो । सम्झौता भएको छ वर्षपछि गत भदौ १३ गते यो कार्यान्वयनमा आइसकेको छ । एमसीसी कार्यान्वयनमा गएको उपलक्ष्यमा सीईओ एलिस काठमाडौँ आउन लाग्नुभएको नेपालस्थित अमेरिकी राजदूतावासले जनाएको छ ।
राजदूतावासले भनेको छ, “एमसीसीकी प्रमुख कार्यकारी अधिकृत एलिस अलब्राइटले नेपाल–अमेरिका बीचको द्विपक्षीय साझेदारी मनाउन र एमसीसी–नेपाल कम्प्याक्ट सम्झौताको सफल सुरुआतको उपलक्ष्यमा अर्को साता नेपाल भ्रमण गर्नुहुने भएको छ ।”
भ्रमणका क्रममा एमसीसीकी सीईओ एलिसले नेपाल सरकारका वरिष्ठ नेतृत्वकर्ताहरूसँग शिष्टाचार भेट गर्ने र कार्यान्वयनका अगाडिका चुनौतीहरूलाई सम्बोधन गर्न एवं कम्प्याक्टका लाभहरू नेपालीहरूसम्म पुर्याउन एमसीसी दृढ साझेदारका रूपमा रहने प्रतिबद्धतामाथि जोड दिने पनि राजदूतावासले जनाएको छ ।
यसअघि एमसीसी नेपाल कम्प्याक्ट कार्यान्वयन घोषणाका क्रममा एमसीसीका उपाध्यक्ष क्यामरुन एस अल्फोर्ड पनि काठमाडौं आउनुभएको थियो ।
