एजेन्सी । इङलिस प्रिमियर लिग अन्तर्गत शनिबार राति सम्पन्न खेलमा म्यान्चस्टर युनाइटेडले डिएगो डालोको सुन्दर गोल मद्दतले शेफिल्ड युनाइटेडलाई २–१ गोल अन्तरले पराजित गरेको छ ।
यस सिजन युनाइटेडको लिगमा लगातार दोस्रो जित हो । यसअघि ब्रेनफोर्डलाई पनि २–१ गोल अन्तरले नै पराजित गरेको थियो ।
युनाइटेडका लागि पहिलो गोल ब्रुनो फर्नान्डेजको क्रसपासमा स्कट म्याकटोमेनीले खेलको २८ औं मिनेटमा गरेका थिए । तर युनाइटेडको अग्रता धेरैबेर टिकेन ।
शेफिल्ड युनाइटेडका लागि ३४औं मिनेटमा ओलिभर म्याकबर्नीले गोल गर्दै खेललाई बराबरीमा ल्याएका थिए ।
त्यसपछि पनि युनाइटेडले शेफिल्डको पोस्टमा लगातार प्रहार गरे पनि गोल हुन सकेको थिएन । अन्तत: ७७ औं मिनेटमा डिबक्स रेखानजिकबाट डिएगो डालोले सुन्दर गोल गरेका थिए ।
यो जितसँगै युनाइटेडले ९ खेलबाट १५ अंक सहित आठौं स्थानमा उक्लेको छ । यद्यपी अंक तालिकाको पहिलो स्थानमा रहेको म्यान्चेस्टर सिटीको ९ खेलबाटै २१ अंक छ ।
शेफिल्ड युनाइटेड भने यस सिजनमा कमजोर प्रदर्शन गर्दै एक अंक सहित लिगको पुछारमा छ ।
