काठमाडौँ । विश्वकप छनोट अन्तर्गतको खेलमा अर्जेन्टिनाले ब्राजिललाई उसकै घरेलु मैदान माराकाना स्टेडियममा १–० गोलले हरायो ।
अर्जेन्टिनालाई जित दिलाउन एकमात्र निर्णायक गोल निकोलास ओटामेन्डीले खेलको ६३ औं मिनेटमा गरे । खेलमा ब्राजिल र अर्जेन्टिनाका फ्यानहरुबीच स्टेडियमभित्रै हात हालाहाल भएपछि खेल आधा घण्टा ढिलो सुरु भएको थियो ।
यसैबीच मैदान बाहिर मात्रै होइन खेलमा पनि दुबै टोलीबीच निकै फउल भए । ९० मिनेटमा थप ६ मिनेट खेलाइएको खेलमा ब्राजिलले २६ र अर्जेन्टिनाले १६ फउल गर्यो । दुबैतर्फबाट ४२ फउल भए । ब्राजिलका ३ खेलाडीले पहेँलो तथा एक खेलाडी जोएलिन्टले रातो कार्ड खाए ।
ब्राजिलले घरेलु मैदानमा विश्वकप छनोट खेल हारेको यो पहिलो पटक हो ।
जितसँगै अर्जेन्टिना शीर्षस्थानमा उक्लिएको छ । उसको ६ खेलबाट १५ अंक छ । यता ब्राजिल समान खेलबाट ७ अंकका साथ छैटौं स्थानमा छ ।
