काठमाडौँ । अमेरिका र वेस्टइन्डिजमा हुन लागेको आइसीसी टी २० विश्वकप क्रिकेटको अनलाइन टिकट बिक्री खुला गरिएको छ ।
आईसीसीका अनुसार टिकट ७ फेब्रुअरीसम्म जारी रहने छ । टी २० विश्वकप क्रिकेट जुन १ देखि २९ तारिखसम्म आयोजना हुँदैछ ।
आइसीसीले अनलाइन टिकट खरिद गर्दा एउटा आइडीबाट बढीमा ६ वटामात्रै किन्न पाइने नियम बनाएको छ । यसैगरी प्रत्येक खेलको टिकट मूल्य पनि फरक फरक रहेको छ । विश्वकपको सबैभन्दा सस्तो टिकट ६ डलरको र महँगो २५ डलरको रहेको छ ।
कसरी किन्न सकिन्छ टिकट ?
टिकटहरूको लागि, पहिले टी २० विश्वकपको आधिकारिक वेबसाइटमा गएर रजिस्टर्ड हुनुपर्छ । त्यसपछि प्रक्रिया सफल भएमा आवेदकले इ–मेल प्राप्त गर्नेछन् । यस मार्फत उनीहरूलाई कुन खेलको टिकट सुरक्षित गरेका छन् भन्नेबारे जानकारी दिइनेछ । त्यसपछि एउटा लिङ्क उपलब्ध हुनेछ जसमार्फत भुक्तानी गर्नुपर्नेछ । यदि तोकिएको समयभित्र भुक्तान नगरेमा टिकटहरू खुला बिक्रीको लागि पूलमा फिर्ता गरिनेछ ।
विश्वकपमा नेपालसहित २० देशले प्रतिस्पर्धा गर्दैछन् । लिगचरणदेखि फाइनलसम्म ५५ वटा खेल हुने छन् । आइसीसीले निकालेको खेल तालिका अनुसार नेपाल समूह डीमा रहेको छ । यो समूहमा नेपालसहित दक्षिण अफ्रिका, श्रीलंका, बंगलादेश र नेदरल्यान्ड्स छन् ।
हरेक समूहमा रहेका देशले ४–४ खेल खेल्ने छन् । ४ समूहका शीर्ष २–२ टिम गरी कुल ८ टिम सुपर–८ मा पुग्नेछन् । सुपर–८ मा पनि २ समूहमा प्रतिस्पर्धा हुनेछन् । सुपर–२ को २ समूहका शीर्ष २–२ टिम सेमिफाइनलमा पुग्नेछन् ।
नेपालले पहिलो खेल जुन ४ मा नेदरल्यान्डस्, दोस्रो खेल श्रीलंकासँग जुन ११, तेस्रो खेल दक्षीण अफ्रिकासँग जुन १४ र चौथो खेल बंगलादेशसंग जुन १६ मा खेल्नेछ ।
