वीरगन्ज । हिंसा भड्कनसक्ने भन्दै वीरगन्ज महानगरपालिकामा सोमबारदेखिको कर्फ्यु आज पनि जारी छ ।
सोमबार दिउँसो वीरगन्जमा दुइ समुदायबिच झडप हुने अवस्था देखिएपछि जिल्ला प्रशासन कार्यालय पर्साले साँझ ५ बजेदेखि कर्फ्यु लगाएको थियो ।
सर्वसाधारणको सुविधाका लागि आज बिहान ६ बजेदेखि १० बजेसम्मका लागि खोलिएपनि कर्फ्यु पुन: जारी भएको हो । १० बजे पछि कर्फ्यु पुन: जारी भएपछि महानगरभित्रका पसल तथा सवारीसाधन पूर्णरुपमा बन्द छन् ।
मंगलबार कर्फ्युमा उच्छृङ्खल गतिविधि गरेको भन्दै पर्सा प्रहरीले ९ जनालाई नियन्त्रणमा लिएको छ । कर्फ्यु आदेशको पालना नगरी टायर बालेर प्रदर्शन तथा नाराबाजी गर्ने ९ जनालाई प्रहरीले नियन्त्रणमा लिएको हो ।
महानगरमा लगाइएको कर्फ्युलाई पालना गराउन प्रहरीले मुख्य बजार तथा गल्लीहरुमा समेत पेट्रोलिङ तथा गस्ती गरिरहेको पर्सा प्रहरी प्रवक्ता कुमारविक्रम थापाले जनाए ।
