काठमाडौँ । राजस्व अनुसन्धान विभागले राजस्व छली गरेको आरोपमा सौगात इन्टरनेसनलका तीनजना विरुद्ध उच्च अदालत पाटनमा मुद्दा दायर गरेको छ । उक्त फर्मले जालसाजीयूक्त, नक्कली तथा झुट्टा मूल्य अभिवृद्धि बिजकमार्फत वित्तीय विवरणहरु तथा आय विवरणहरु तयार गरी मू.अ.कर र आयकरसमेत चुहावट गरेकोले आयकर ऐन तथा मूल्य अभिवृद्धि कर ऐन तथा नियमबमोजिम तिर्नुपर्ने कर नतिरी राजस्व चुहावटको कार्य गरेको विभागले जनाएको छ।
विभागले सौगात इन्टरनेसनलका प्रोप्राइटर दीपककुमार देउजा र खाता सञ्चालक मोहनप्रसाद भट्टराईविरुद्ध राजस्व चुहावट (अनुसन्धान तथा नियन्त्रण) (पहिलो संशोधन) ऐन बमोजिम कुल आठ करोड २१ लाख ७२ हजार ६४१ बिगो असुलउपर गरी बिगोको शतप्रतिशत जरिवाना गर्न र कैद सजाय हुन माग गरेको छ ।
त्यसैगरी विभागले सो फर्मका लेखापरीक्षक सुनिलमान शाक्यका हकमा राजस्व चुहावट (अनुसन्धान तथा नियन्त्रण) (पहिलो संशोधन) ऐन बमोजिम मतियार हुने सजाय हुन मागदावी गरी अभियोग पत्र दायर गरेको छ ।
