काठमाडौँ । इंग्लिस प्रिमियर लिग फुटबलमा चेल्सीले बराबरी खेलेको छ । गएराति भएको खेलमा चेल्सीले बर्नलेसँग २–२ गोलको बराबरी खेल्दै अंक बाँडेको हो । घरेलु मैदान स्टामफोर्ड ब्रिजमा खेलको ४४ औं मिनेटमा पेनाल्टीमा गोल गर्दै कोल पाल्मेरले चेल्सीलाई सुरुवाती अग्रता दिलाएका थिए ।
४७ औं मिनेटमा जोश कुलेनले गोल गर्दै बर्नलेलाई १–१ गोलको बराबरीमा ल्याए । यता, ७८ औं मिनेटमा पाल्मेरले व्यक्तिगत तथा टोलीका लागि दोस्रो गोल गर्दै चेल्सीलाई २–१ ले अघि बढाए ।
८१ औं मिनेटमा डारा ओ’सिआले गोल गर्दै बर्नलेलाई २–२ गोलको बराबरीमा ल्याउँदै हारबाट जोगाए । खेलको ४० औं मिनेटमा लोरेन्ज एसिग्ननले रातो कार्ड खाएपछि बर्नले १० खेलाडीमा समेटिएको थियो ।
बराबरीसँगै चेल्सी २८ खेलबाट ४० अंकका साथ ११ औं स्थानमा छ । बर्नले ३० खेलबाट १८ अंकका साथ १९ औं स्थानमा छ ।
