एजेन्सी । साउथका सुपरस्टार राम चरणलाई वेल्स विश्वविद्यालय, चेन्नईले मानार्थ विद्यावारिधि प्रदान गरेको छ । शनिबार सामाजिक सञ्जालमा एक तस्बिर सेयर गर्दै अभिनेताले यो जानकारी दिएका हुन् ।
सो दीक्षान्त समारोहमा रामचरण प्रमुख अतिथि थिए । फिल्म उद्योगमा दिएको योगदानका लागि वेल्स विश्वविद्यालयले रामलाई यो सम्मान दिएको हो ।
कार्यक्रमको तस्बिर सेयर गर्दै रामचरणले लेखेका छन्, ‘वेल्स विश्वविद्यालयबाट मानार्थ विद्यावारिधिको उपाधि प्राप्त गर्न पाउँदा म निकै खुसी छु । म चेन्नईका जनता र मेरो यात्रामा सहभागी हुने सबैलाई धन्यवाद दिन्छु । धेरै सपना र उपलब्धिहरू पूरा हुन बाँकी छ ।
कार्यक्रममा रामचरणसँगै उनकी पत्नी उपासना कामिनेनी पनि थिइन् । कार्यक्रमका धेरै तस्बिर र भिडियोहरू सेयर गर्दै उपासनाले रामचरणलाई ‘डाक्टर’ भनेकी थिइन् ।
कार्यक्रममा जानुअघि उपासनाले एउटा भिडियो पनि सेयर गरेकी छिन् जसमा उनले आफू यस पलका लागि कति उत्साहित भएको बताएकी छिन् ।
कामको कुरा गर्दा रामचरणको अर्को फिल्म ‘गेम चेन्जर’ हो । १७० करोडको बजेटमा बन्न लागेको यो फिल्मलाई शंकरले निर्देशन गर्नेछन् । फिल्ममा रामचरण बाहेक कियारा आडवाणी, अञ्जली, एसजे सूर्य, जयराम लगायतका कलाकारहरु देखिनेछन् ।
