एजेन्सी । बलिउडका दिग्गज निर्देशक सञ्जय लीला भन्सालीकी भाञ्जी शर्मिन सेगल उनको सिरिज ‘हिरामन्डी’ मा महत्वपूर्ण भूमिकामा देखिएकी छिन् । यस सिरिजमा शर्मिन सेगलका अलावा मनिषा कोइराला, सोनाक्षी सिन्हा र ऋचा चड्डा मुख्य भूमिकामा छन् ।
शोका बाँकी कलाकारले दर्शकको अथाह माया पाइरहेका छन् भने शर्मिन सेगल भने लगातार ट्रोलिङको सामना गरिरहेकी छिन् । अब उनको प्रतिरक्षामा शोकी कास्टिङ डाइरेक्टर श्रुति महाजन अगाडि आएकी छिन् ।
हिरामन्डीले दर्शकको अथाह माया पाइरहेको छ भने केही यस्ता पनि दर्शक छन् जसले सञ्जय लीला भन्सालीको यो सिरिजलाई पटक्कै मन पराएका छैनन् । सिरिजमा आलमजेबको भूमिकामा देखिएकी शर्मिन सेगल लगातार ट्रोल भइरहेकी छन् ।
यसैबीच उनको प्रतिरक्षामा शोका कास्टिङ डाइरेक्टर श्रुतिले भनिन्, ‘शर्मिन सेगलको अभिनयलाई धेरैले रुचाएका छन् । उनीहरुलाई शर्मिनको स्वर पनि मन परेको छ ।’
श्रुतिले आफ्नो कुरा जारी राख्दै भनिन्, ‘केहीले भनेका छन् कि उनी गणिकाको दुनियाँको हिस्सा होइनन्, त्यसमा के हानि छ । ‘आलमजेब’ आफूलाई वेश्या मान्दैनन् । त्यसैले उनको बोलीको लय पनि अन्य पात्रभन्दा फरक छ ।’
श्रुतिले यसअघि पनि सञ्जय लीला भन्सालीसँग काम गरिसकेकी छिन् । श्रुति भन्छिन्, ‘जसरी अरु कलाकारले अडिसन दिएका थिए त्यसरी नै शर्मिनले पनि अडिसन दिएकी हुन् । उनी सञ्जय लीला भन्सालीकी भान्जी हुन्, त्यसैले उनलाई त्यो भूमिका दिइएन ।’
शर्मिन ‘हिरामन्डी’ मा मनिषा कोइरालाकी छोरीको भूमिकामा देखिएकी छन् । सिरिजका अन्य कलाकारहरु पनि शर्मिनकोको पक्षमा बयान दिने गरेको देखिन्छ । अदिति राव हैदरीले हालै शर्मिनलाई यसरी ट्रोल भएको देखेर आफूलाई नराम्रो लागेको बताएकी छन् ।
