रसुवा। रसुवामा स्थानीय पूर्वाधार र प्रदेश पूर्वाधारको रकमले पूर्वाधार र सिंचाईलाई उच्च प्राथमिकतामा राखेर बजेट विनियोजन गरिएको छ ।
प्रतिनिधी सभा सदस्य मोहन आचार्यको स्थानीय पूर्वाधारको रु चार करोड, प्रदेश सांसदद्धय प्रभात तामाङ र प्रेम तामाङ प्रदेश पूर्वाधार कार्यक्रमबाट प्राप्त ६ करोड गरी जम्मा १० करोड रुपैँयाले जिल्लाका पाँचवटै गाउँपालिका समेट्ने गरी करिब ७७ वटा आयोजना छनोट गरिएको छ ।
पूर्वाधार विकास अन्तर्गत खानेपानी, सडक, गुम्बा, सामुदायिक भवन, प्रतिक्षालय, मठ मन्दिर आदि छन् । यस्तै, सिंचाई पूर्वाधार र पर्यटन पदमार्ग निर्माणलाई समेत वजेटले समेटेको छ ।
प्रतिनिधी सभा सदस्य आचार्यको संयोजकत्वमा हालै जिल्लामा सम्पन्न निर्देशक समितिले सो आयोजनाहरु परित गरेको हो । यसअघि जिल्ला परामर्श समितिले जनप्रतिनिधी र स्थानीय सरोकारवालाहरु सँगको छलफलपछि आयोजनाहरु छनोट गरी निर्देशक समितिमा पेश गरेको थियो ।
