एजेन्सी । इङ्ल्यान्डका टेस्ट कप्तान बेन स्टोक्सले जेद्दाहमा हालै सम्पन्न आईपीएल २०२५ मेगा लिलामीबाट आफ्नो नाम फिर्ता लिनुको कारण दिएका छन् ।
आईपीएल २०२५ को लागि मेगा लिलामी २४ र २५ नोभेम्बरमा साउदी अरेबियाको जेद्दाहमा आयोजित गरिएको थियो ।
आईपीएलको नयाँ नियम र गाइडलाइन्स अनुसार ३३ वर्षीय स्टोक्सले आफ्नो नाम लिलामीमा दर्ता गरेमा उनी आगामी दुई वर्षसम्म आईपीएलमा हिस्सा हुनुपर्छ ।
तर, इङ्ल्यान्डका लागि सकेसम्म खेल्ने आफ्नो लक्ष्य रहेकोले आईपीएल नखेल्नेमा आफू चिन्तित नभएको इङ्ल्यान्डका अलराउन्डरले बताए ।
न्यूजिल्याण्डविरुद्धको पहिलो टेस्ट अघि स्टोक्सले आफू करियरको अन्तिम चरणमा रहेको र सकेसम्म इंग्ल्याण्डको जर्सी लगाउन चाहेको बताएका थिए । जसका कारण उनले आईपीएलको मेगा अक्सनबाट आफ्नो नाम फिर्ता लिएका हुन् ।
बीबीसी टेस्ट म्याच स्पेशलसँगको कुराकानीमा स्टोक्सले भने, ‘धेरै क्रिकेट भइरहेको छ । म मेरो करियरको अन्तिम चरणमा छु भन्ने कुरा लुकाउनुपर्ने कुरा छैन । म निश्चित रूपमा लामो समयसम्म खेल्न चाहन्छु । मैले आफ्नो शरीरमा बढी ध्यान दिनुपर्छ । मैले कहिले र कहाँ खेल्ने भन्ने कुरालाई प्राथमिकता दिनुपर्छ ।’
