म्यान्चेस्टर युनाइटेडका फर्वार्ड मार्कस रास्फोर्ड (Marcus Rasford) एस्टन भिल्लामा आबद्ध भएका छन् । विगत तीन–चार सिजनदेखि प्रिमियर लिगमा खासै राम्रो प्रदर्शन गर्न नसकेको म्यान्चेस्टर युनाइटेडले आफ्ना प्रभावशाली खेलाडी एस्टन भिल्लालाई ऋणमा दिएपछि त युनाइटेडको सङ्कट अझ चुलिएको छ ।
समाचार अनुसार, यो सिजनका बाँकी खेलहरु रास्फोर्डले एस्टन भिल्लाबाट खेल्नेछन् ।
सन् २०१६ मा म्यान्चेस्टर युनाइटेडमा आबद्ध भएयता उनले क्लबका लागि ४२६ खेल खेलिसकेका छन् । उनले क्लबका लागि १३८ गोल गर्नुका साथै पाँच वटा ट्रफी उचालेका छन् ।
यस सिजन पनि रास्फोर्डले युनाइटेडका लागि २४ खेल खेलेर सात गोल गरेका थिए । यद्यपी पछिल्लो समय उनको खेलस्तर केही खस्केको छ । उनी पछिल्लो पटक युनाइटेडका लागि गत डिसेम्बरमा युरोपा लिग अन्तर्गत भिक्टोरिया प्लाजेन विरुद्धको खेलमा सहभागी भएका थिए । त्यस खेलमा युनाइटेड २–१ गोलले विजयी भएको थियो ।
२७ वर्षीय रास्फोर्ड इङल्यान्डको राष्ट्रिय टोलीबाट ६० वटा खेल खेल्नुका साथै १७ गोल गर्न सफल भएका छन् । उनी दुई पटक इङल्यान्डको विश्वकप टिममा सहभागी भइसकेका छन् ।
रास्फोर्डलाई एस्टल भिल्ला पठाएसँगै युनाइटेडले २० वर्षीय डेनिस डिफेन्डर प्याट्रिक डोर्गुलाई इटालीयन क्लब लिसबाट टिममा भित्र्याएको छ । यस्तै, आर्सनलका १८ वर्षीय डिफेन्डर आइडेन हेभनलाई पनि युनाइटेडले लिएको छ ।
उता, युनाइटेडका प्रभावशाली ब्राजिली फर्वार्ड एन्टोनी (Antony) पनि यस सिजनको अन्त्यसम्मका लागि भन्दै स्पेनिस ला लिगाको क्लब रियल बेटिसमा लोनका रुपमा गएका छन् ।
अहिले युनाइटेड इङलिस प्रिमियर लिगको १५ स्थानमा छ । #ManchesterUnited
