सुर्खेत । सुर्खेत प्रहरीले पाँच किलोभन्दा बढी अफिमसहित एकजनालाई पक्राउ गरेको छ। भेरीगंगा नगरपालिका–१०, छिन्चुबाट जाजरकोटको जुनिचाँदे गाउँपालिका–१० का ४६ वर्षीय जयबहादुर बस्नेतलाई बुधबार पक्राउ गरिएको हो।
जिल्ला प्रहरी कार्यालय सुर्खेतका प्रमुख प्रहरी उपरीक्षक सुधिरराज शाहीका अनुसार अफिम कारोबार भइरहेको गुप्त सूचनाको आधारमा निरन्तर निगरानी र अनुसन्धानपछि प्रहरीले बस्नेतलाई पक्राउ गर्न सफल भएको हो । पक्राउका क्रममा बस्नेतसँग ५ किलो ४५० ग्राम अफिम बरामद गरिएको छ ।
यद्यपि अफिम ओसारपसारमा संलग्न मुख्य व्यक्ति भने फरार रहेको प्रहरीले जनाएको छ । प्रारम्भिक बयानमा बस्नेतले आफैँ अफिम उत्पादन तथा बिक्री गर्दै आएको स्वीकारेका छन् ।
अनुसन्धानका क्रममा बरामद गरिएको अफिमको प्रारम्भिक मूल्य ८ लाख ८६ हजार ४ सय रुपैयाँ रहेको प्रहरीले जनाएको छ । तर पक्राउ परेका बस्नेतले उक्त परिमाणको अफिम भारत पुर्याउन सकेमा यसको मूल्य पाँच करोड रुपैयाँसम्म पुग्ने दाबी गरेका छन् ।
पक्राउ परेका बस्नेतमाथि लागू औषध सम्बन्धी कसुरमा अनुसन्धान अगाडि बढाइएको छ भने फरार व्यक्तिको खोजी कार्य पनि जारी रहेको प्रहरीले जनाएको छ ।
