लकडाउनको समयमा क्यासिनो शैलीमा होटेलमा जुवा खेलिरहेका नौ व्यापारी पक्राउ परेका छन् । कमलादीस्थित गगौंर बुटिक होटेलबाट सोमबार साँझ प्रहरीले उनीहरूलाई पक्राउ गरेको हो ।
होटेल सञ्चालक भारतीय निक्की जोगाईसहितलाई जुवा खेलिरहेको अवस्थामा पक्राउ गरिएको महानगरीय प्रहरी वृत्त दरबारमार्गका डिएसपी रञ्जन दाहालले बताए । उनका अनुसार पक्राउ पर्नेहरूमा नन्दकिशोर शर्मा, पुरुषोत्तमकुमार अग्रवाल, विमल खेतान, विमल अहोजा, रामचन्द्र संघाई, सुरेशकुमार अग्रवाल, गोविन्दराम सरिया र अशोककुमार अग्रवाल छन् ।
उनीसँग दुई लाख ७७ हजार सात सय २० रुपैयाँ नगद र एक सय ७९ वटा चिप्स बरामद भएको छ । उनीहरूले तास खेलिरहेको चिप्समार्फत हिसाब गरेकाले ठूलो परिमाणमा हारजित भएको प्रहरी अनुमान छ ।
डिएसपी दाहाल भन्छन्, ‘क्यासिनोकै शैलीमा जुवा खेलेको देखिन्छ ।’ उनीहरूमध्ये एकजनासँग लकडाउनमा गाडी चलाउने पाससमेत फेला परेको डिएसपी दाहालले बताए । होटेल सञ्चालक निक्कीले लकडाउनमा पनि होटेलमा जुवा खेलाउँदै आएको खुलेको छ । नयाँ पत्रिका दैनिक
