सुर्खेत। मध्यपश्चिम नापी पेशाकर्मी समाजको १६औं स्थापना दिवसको अवसरमा ब्याटमिन्टन प्रतियोगिता आयोजना हुने भएको छ । यही साउन २२ गतेदेखि सुरु हुने प्रतियोगिता जिल्ला ब्याटमिन्टन संघको कभर्ड हल, सुर्खेतमा सञ्चालन गरिनेछ ।
समाजका अध्यक्ष लोकप्रसाद धमालाका अनुसार आन्तरिक पर्यटन प्रवद्र्धन गर्ने र नापी पेशाकर्मीहरूबीच आपसी एकता, भाइचारा तथा साझा हितको भावना अभिवृद्धि गर्ने उद्देश्यले प्रतियोगिता आयोजना गरिएको हो । देशभरका नापी पेशाकर्मीहरूको सहभागिता रहने प्रतियोगितामा भेट्रान, सिनियर र जुनियर गरी तीन विधामा छुट्टाछुट्टै प्रतिस्पर्धा हुनेछ ।
भेट्रानतर्फ प्रथम हुने टोलीले ३० हजार, दोस्रोले २० हजार र तेस्रोले १० हजार रुपैयाँ पुरस्कार प्राप्त गर्नेछन् । यस्तै, सिनियर र जुनियर समूहका विजेताहरूलाई क्रमशः ४० हजार, ३० हजार र २० हजार रुपैयाँसहित ट्रफी प्रदान गरिनेछ ।
धमालाका अनुसार प्रतियोगिताका लागि हालसम्म ५० टिमले नाम दर्ता गराइसकेका छन् । प्रतियोगिताको उद्घाटन समारोह साउन २२ गते दिउँसो १ बजे वीरेन्द्रनगर नगर प्रमुख मोहनमाया ढकालले गर्ने कार्यक्रम तय भएको छ । प्रतियोगिता साउन २४ गतेसम्म सञ्चालन हुनेछ ।
