काठमाडौँ । भारतीय विदेश सचिव विक्रम मिस्री दुई दिने नेपाल भ्रमणका लागि आज काठमाडौँ आउँदै हुनुहुन्छ । सचिव मिस्री विशेष विमान मार्फत् आज बिहान ९ बजे काठमाडौँ आइपुग्नुहुने छ ।
उहाँ काठमाडौँ ओर्लिए लगत्तै प्रधानमन्त्री केपी ओलीसँग शिष्टाचार भेटघाट रहेको छ । त्यसक्रममा उहाँले प्रधानमन्त्री केपी शर्मा ओलीलाई भारत भ्रमणको औपचारिक निमन्त्रणा पत्र हस्तान्तरण गर्नुहुनेछ ।
त्यसपछि उहाँले आज नै राष्ट्रपति रामचन्द्र पौडेलसँग शिष्टाचार भेट गर्नुहुनेछ । विदेश सचिव मिस्रीले आज नै नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डसँग भेटवार्ता गर्नुहुने पनि कार्यक्रम रहेको छ ।
त्यसैगरी परराष्ट्र सचिव अमृतबहादुर राइसँग द्विपक्षीय भेटवार्ता गर्ने र अपराह्न ५ बजे परराष्ट्रमन्त्री डा आरजु देउवासँग भेटवार्ता गर्ने कार्यक्रम रहेको छ । त्यसपछि साँझ उहाँको सम्मानमा परराष्ट्र सचिव राइले रात्रिभोजको आयोजना गर्नुभएको छ ।
यस भ्रमणका बेला उहाँले प्रधानमन्त्री ओलीको भारत भ्रमणको एजेण्डाका बारेमा पनि छलफल गर्नुहुने परराष्ट्र स्रोतले जनाएको छ । विदेश सचिव मिस्री भोलि अपराह्न सोही विमानबाट स्वदेश फर्कनुहुने कार्यक्रम छ ।
