इङलिस प्रिमियर लिग अन्तर्गत नेपाली समय अनुसार आइतबार साँझ भएको खेलमा सन्डरल्यान्ड र लिड्स युनाइटेडले बराबरी खेलेका छन् । निर्धारित ९० मिनेटको खेलमा दुबै टिमबाट एक एक गोल भएको थियो ।
खेलको पहिलो हाफको २८औं मिनेटमा सन्डरल्यान्डका लागि अडिङ्ग्राले जाखाको पासमा गोल गरेर टिमलाई १–० गोलको अग्रता दिलाएका थिए ।
तर दोस्रो हाफको ४७औं मिनेटमा लिड्स युनाइटेडका लागि काल्भर्ट–लेविनले गोल गरेर खेललाई बराबरीमा ल्याए । त्यसपछि दुबै टिमबाट सुन्दर मुभ भएपनि गोल हुन सकेन ।
यो सिजन निकै राम्रो प्रदर्शन गरिरहेको सन्डरल्यान्ड आजको खेलमा बराबरीसँगै लिगमा १८ खेलबाट २८ अंक सहित सातौं स्थानमा छ । सन्डरल्यान्डले पछिल्ला पाँच खेलमा तीन वटामा बराबरी, एक जित र एक हार व्यहोरेको छ ।
लिड्स युनाइटेड भने १८ खेलबाट २० अंक सहित लिगमा १६औं स्थानमा छ । पछिल्ला पाँच खेलमा निकै सुधारिएको प्रदर्शन गरिरहेको लिड्सले तीन खेलमा बराबरी र २ मा जित निकालेको छ ।
आजै राति १०.१५ बजे क्रिस्टल प्यालेस र टोटेनह्याम हस्पर्सबीच खेल हुँदैछ ।
