नारद शर्मा, काठमाडौं । आज सभामुख पदको पदबहाली गरेपछि पत्रकारहरुले सभामुख अग्नि सापकोटालाई एक प्रश्न सोधे– सभामुखज्यू नेपालमा हाल बहुचर्चाको विषय एमसीसी तपाईँ आएपछि पास हुन्छ भनिएको छ, के हुन्छ यो कहिले पास गर्नुहुन्छ ? यो प्रश्नपछि एकछिन घोरिएर सोचे र जवाफ दिए । उनको जवाफ र अनुहारको हाउभाउ हेर्दा लाग्दथ्यो उनी एमसीसीप्रति त्यति सकारात्मक थिएनन् । उनको जवाफ थियो– एमसीसीलाई अहिल्यै किन हतार, गरौँला नि । तर सम्वाददाताहरु सन्तुष्ट भएनन् । फेरि सोधे– त्यसो भए के एमसीसी पारित हुदैन ? सभामुखको जवाफ आयो, होइन यस विषयमा बजारमा प्रयाप्त मात्रामा छलफल होस् न किन अहिले नै हतार गर्नुपर्यो ?
सभामुख सापकोटाले हतार गर्नुपर्ने एजेण्डाले पूर्व सभामुख जेल पुर्याएको भन्नेहरुको पनि कमी छैन । अर्काे कुरा प्रधानमन्त्री केपी ओलीले आजै, भोलि नै एमसीसी पारित गर्नुपर्ने हतारो बडो द्रूत गतिमा लगाइरहेको भान परराष्ट्रमन्त्री प्रदीप ज्ञवालीका अभिव्यक्तिबाट पनि देखिने गरेको छ । मन्त्री ज्ञवालीले जुनसकै ‘पब्लिक फोरम’मा पनि एमसीसीको प्रसंग आफै ल्याउँछन् र सरकारले यसलाई पास गरेरै छोड्छ भन्छन् । प्रधानमन्त्री ओलीले त सार्वजनिक रुपमा नै यो एजेण्डा पूर्व सभामुख कृष्णबहादुर महराका कारण पारित हुन नसकेको भनी टिप्पणी नै गरेका थिए ।
त्यस्तै आज सोमबारका नेपाली छापाहरुले चार महिनापछि संसदले सभामुख पायो र अब अग्निको पहिलो अग्नि परीक्षा यही एमसीसी हो भनेर लेखेका छन् । तर पनि उनले पद बहाली गरेलगत्तै समाचारदाताहरुसँग कुरो चपाएर बोलेको देख्दा धेरैले उनी यसप्रति अहिले नै पूरा रुपमा नकारात्मक छन् भन्न नमिले पनि सकारात्मक भने नदेखिएको टिप्पणी गरेका छन् । उनले खुलेरै एमसीसी पास हुन्छ भनेर भन्न नसकेको अवस्थाबाट यो अनुमान गर्न अप्ठेरो मान्नुपर्ने अवस्था भने देखिँदैन ।
अर्काे कुरा नेपालस्थित चिनियाँ राजदूत हाउ याङ्छीले आजै सभामुख सापकोटालाई गरेको भेटबाट पनि धेरैले यो कुराको अनुमान सहजै गरिरहेका छन् । सभामुखको सपथ लिएर पद बहाली गरेलगत्तै नेपालीभन्दा पनि पहिला भेट्ने पहिलो विदेशी नागरिक बनेकी छिन् चिनियाँ राजदूत । कतिपयले एमसीसी चिनियाँ आयोजना बिआरआइको ‘काउन्टर’ दिन अमेरिकाले ल्याएको आयोजना पनि भनेका छन् । यद्यपि यस विषयमा अमेरिका र चीनको औपचारिक भनाई पनि त्यस्तो छैन । तर पनि नेपालमा यो आयोजना पारित नहोस् भन्ने चीन चाहन्छ । यसरी एकातर्फ चीनले कार्यकक्षमै पुगेर सबैभन्दा पहिला चिनियाँ राजदूतले भेट्ने र अर्कातर्फ एमसीसी पारित गर्न अहिले हतार छैन भन्ने सभामुखको प्रतिक्रियाले सहजै यो कुराको अनुमान लगाउन सकिन्छ कि सभामुख सापकोटा एमसीसी पारित गर्ने पक्षमा सकारात्मक देखिएनन् । यसबाट सापकोटालाई एमसीसी पारित गराउने शर्तमा सभामुख बनाउन प्रधानमन्त्री ओली तयार भए भनी अनुमानको बजार तताउनेहरुको अनुमान पनि सही साबित नहुने खतरा बढ्ने देखिन्छ ।
