बेझाङ । भवन अभावमा टहरामा पढाइ हुँदै आएको रामपुर नगरपालिका–२ स्थित कालिका प्राथमिक विद्यालयले अहिले सुविधा सम्पन्न पक्की भवनबाट पठनपाठन कार्य सुरु गरेको छ ।पक्की भवनभित्र बसेर पठनपाठन हुन थालेपछि विद्यार्थी खुसी भएका छन् । सामान्य हावाहुरी चलेका बखत बाँसको टहरा नै उडाउने डरले बीचमै विद्यालय बन्द गर्नुपर्ने समस्या थियो । पानी परेका बखत कक्षा कोठाभित्रै पानी पसेर किताब, कापी, झोला नै भिजेर जोगाउनै समस्या परेको कक्षा ४ मा अध्ययनरत छात्रा सुमित्रा विक बताउँछिन् ।
‘अहिले टहराबाट भवनमै बसेर पढ्न पाइएको छ, घामपानी, हावाहुरीको डर छैन, शान्त वातारणमा सहजसँग कोठामा बसेर पढ्न पाउँदा बल्ल विद्यालय जस्तो अनुभूति भएको छ’, उनले भनि । सामान्य बाँसले बारेको टहराभित्र पठनपाठन हुँदा एउटा कोठामा पढेको कुरा अर्को कोठामा सबै सुनिने हुँदा पढाइमा विद्यार्थीलाई समस्या परिरहेको कक्षा ४ कै छात्र साहिर थापाले बताए । एउटा कोठामा पढाएको कुरा अर्को कोठामा सुनिने हुँदा पढाइमा विद्यार्थीको ध्यान केन्द्रित गराउन समस्या परेको थियो ।
विद्यालयको भवनविना खुल्ला आकाशमुनि पठनपाठन भन्ने समाचार विभिन्न सञ्चारमाध्यममा आएपछि छोटो समयमा विद्यालयले भवन निर्माणमा तदारुकता देखाइएपछि भवन बनेको हो । आव २०७५/७६ मा भूकम्प पुनर्निर्माण प्राधिकरणमार्फत प्राप्त दुईकोठे भवन निर्माण सम्पन्न भएपछि हाल सञ्चालनमा ल्याइएको हो । सो भवन २३ लाखको लागतमा निर्माण भएको छ । यस भवनमा अहिले बालविकास र कक्षा ४ का विद्यार्थीलाई राखेर पढाइ भइरहेको छ । आव २०७६/७७ मा भूकम्प पुनर्निर्माण प्राधिकरणमार्फत तीनकोठे भवनका लागि ३५ लाख रकम प्राप्त भएको प्रधानाध्यापक बाबुराम घिमिरेले बताए ।
सो भवन निर्माणको काम अन्तिम चरणमा छ । त्यस्तै जापानीज नागरिक काजुमासा काकिमी (ओकेबाजे) को १० लाख सहयोगमा चारकोठे भवन पनि निर्माणाधीनमा अवस्थामा छ । सो भवनको ढलानका लागि रामपुर नगरपालिकाले तीन लाख रकम सहयोग गरेको छ । निर्माण कार्य सकिन लागेको छ । निर्माणाधीन अवस्थामा रहेका दुई भवन माघसम्ममा सम्पन्न हुने सहायक प्रधानाध्यापक रुक्मिणि जिसीले बताइन् ।
यहाँ कक्षा बालविकासदेखि ४ सम्म अंग्रेजी माध्यममा पठनपाठन भइरहेको छ । तीन स्थायी दरबन्दीका शिक्षक, चार निजी स्रोतका शिक्षक, एक बालविकास शिक्षक र एक कार्यालय सहयोगी कार्यरत छन् । कक्षा बालविकासमा १३, कक्षा १ मा १८, कक्षा २ मा दुई, ३ मा तीन, कक्षा ४ मा ११ गरी जम्मा ४७ विद्यार्थी अध्ययनरत छन् । भवन निर्माण तथा शौचालय निर्माणमा वडागत बजेटले अपुग हुने भएपछि नगरपालिका कार्यालयबाट नै बजेट विनियोजन गरेर भौतिक संरचना निर्माणमा जोड दिएको वडाध्यक्ष ताराबहादुर थापा बताउँछन् ।
‘शिक्षा क्षेत्रमा वडा र नगरले प्राथमिकता दिएको छ, शैक्षिक सामग्री सहयोग, भौतिक संरचना निर्माण गरी गुणस्तरीय शिक्षा दिइरहेका छौँ’, उनले भने । नगरपालिकाको सात लाख सहयोगमा सुविधा सम्पन्न शौचालय निर्माण गरिएको उनले बताए । रामपुर नगरपालिका–२ कागतीडाँडामा सञ्चालन भइरहेको विद्यालय बस्ती पातलिँदै जादा विद्यार्थी नै न्यून भएपछि २०७५ को शैक्षिक सत्रको सुरुआतमा नै बस्ती नजिकै स्थानान्तरण गरेर पठनपाठन गरेपछि भवन अभावको समस्या परेको हो ।
पहिलेको ठाउँमा बस्ती पातलिँदै गएपछि विद्यालयमा विद्यार्थीको उपस्थिति नै न्यून भएपछि अर्को विद्यालयसँग गाभिन लागेको विद्यालय स्थानीयको जोडबलमा तल सारिएको वडा सदस्य बालकुमारी थापा बताउँछिन् । ‘बस्ती पातलियो, वन जंगल नजिकै विद्यालय, विद्यार्थीलाई विद्यालय एक्लै आउन जान समस्या थियो, तल बस्तीमा सारेपछि विद्यार्थी संख्या ह्वात्तै बढेको छ’ उनले भनिन् । घामपानी प्रचण्ड गर्मीको तापमा बसेर खुला आकाशमुनी निकै कष्टसँग पढ्न विद्यार्थी बाध्य थिए । खुल्ला आकाशमुनी, केही समय स्थानीय सामुदायिक भवन हुँदै टहरामा पढाउन थालिएको हो । सौर्य दैनिकबाट
