काठमाडौँ। यूइएफए च्याम्पियन्स लिग फुटबलको क्वार्टरफाइनल समिकरण पूरा भएको छ ।
गएराति अन्तिम– १६ का खेल सकिएसँगै क्वार्टरफाइनलमा पुग्ने सबै टोलीको टुंगो लागेको हो । क्वार्टरफाइनलमा स्पेनको रियल मड्रिडले जर्मन क्लब बायर्न म्युनिखको सामना गर्ने भएको छ । अन्तिम– १६ मा रियलले म्यानचेस्टर सिटी र बायर्नले एट्लान्टालाई पराजित गरेका थिए ।
यस्तै, इंग्लिस क्लब आर्सनलको भेट पोर्चुगिज टोली स्पोर्टिङ सीपीसँग हुने भएको छ । आर्सनलले बायर लेभरकुसन तथा स्पोर्टिङले बोडो ग्लिमटलाई हराउँदै क्वार्टरफाइनलको यात्रा तय गरेका हुन् ।
यसैगरी, दुई स्पेनिस क्लब बार्सिलोना र एट्लेटिको मड्रिडको भेट पनि क्वार्टरफाइनलमै हुने भएको छ । अन्तिम– १६ मा बार्सिलोनाले न्युकासल युनाइटेड तथा एट्लेटिकोले टोटनहमलाई निरास बनाएका थिए ।
यस्तै, साविक विजेता फ्रेन्च क्लब पेरिस सेन्ट जर्मेन (पीएसजी)ले इंग्लिस क्लब लिभरपुलसँग प्रतिस्पर्धा गर्नेछ । पीएसजीले चेल्सी तथा लिभरपुलले गालातासरेको चुनौतीलाई पन्छाउँदै क्वार्टरफाइनलमा प्रवेश गरेका हुन् ।
क्वार्टरफाइनलका पहिलो लेग अप्रिल दोस्रो तथा दोस्रो लेग तेस्रो साता हुनेछन् ।
